មន្ត្រីជាន់ខ្ពស់រដ្ឋាភិបាលថា សមត្ថកិច្ចកំពុងស្រាវជ្រាវចាប់ខ្លួនម្ចាស់គណនីហ្វេសប៊ុកឈ្មោះ Tharith Bun ដែលបង្ហោះសារលើបណ្តាញសង្គមថា លោក ស ខេង មានជំនួបជាថ្មីជាមួយលោក សម រង្ស៊ី នៅប្រទេសបារាំង ដើម្បីបង្កើតរដ្ឋាភិបាលបណ្តោះអាសន្នមួយ ដោយថាជាព័ត៌មានមិនពិតនិងមានចរិតញុះញង់ផងដែរ។
កាលពីថ្ងៃទី២៥ ខែសីហា ២០២១ គណនីហ្វេសប៊ុកឈ្មោះ Tharith Bun បានបង្ហោះរូបភាពជំនួបអតីតកាលរវាងលោក ស ខេង រដ្ឋមន្ត្រីក្រសួងមហាផ្ទៃ និងលោក សម រង្ស៊ី មេដឹកនាំអតីតបក្សប្រឆាំង នៅក្នុងរដ្ឋសភា កាលពីខែកញ្ញា ឆ្នាំ២០១៥ មកផ្សព្វផ្សាយជាថ្មី អមដោយខ្លឹមសារថា «សម្តេច ស ខេង បានទៅជួប សម រង្ស៊ី ស្ងាត់ៗនៅប្រទេសបារាំង»។
អ្នកនាំពាក្យអគ្គស្នងការនគរបាលជាតិ លោកឧត្តមសេនីយ៍ឯក ឆាយ គឹមខឿន ប្រាប់ វីអូឌី នៅថ្ងៃទី៣០ ខែសីហានេះថា ការបង្ហោះសាររបស់បុគ្គលឈ្មោះ Tharith Bun ជាបទល្មើសជាក់ស្តែង និងបានបង្កឱ្យប៉ះពាល់ធ្ងន់ធ្ងរដល់កិច្ចការផ្ទៃក្នុងរបស់រដ្ឋមួយ ព្រមទាំងជាសារដែលបំពុលសង្គម ដែលចាំបាច់សមត្ថកិច្ចត្រូវតែចាត់វិធានការតាមច្បាប់ឱ្យខានតែបាន។
លោកថា៖ «អាហ្នឹងវាជាបទល្មើសមួយ ហើយជាបទល្មើសជាក់ស្តែងទៀត។ ការធ្វើយ៉ាងនេះ វាធ្វើឱ្យប៉ះពាល់ធ្ងន់ណាស់ដល់កិច្ចការផ្ទៃក្នុងរបស់រដ្ឋមួយ ហើយធ្វើឱ្យបំពុលសង្គម។ វាជាការបំបែកបំបាក់ផ្ទៃក្នុងថ្នាក់ដឹកនាំទៀត។ ហើយវាគ្រោះថ្នាក់ដល់ប្រទេសជាតិ ពាក់ព័ន្ធសន្តិសុខប្រទេសជាតិ ធ្វើឱ្យមានការយល់ច្រឡំច្រើនណាស់។ អ៊ីចឹងចាំបាច់សមត្ថកិច្ចត្រូវតែចាត់នូវវិធានការដើម្បីស្រាវជ្រាវ»។
ដោយឡែក អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់សារព័ត៌មានក្នុងស្រុកកាលពីម្សិលមិញថា ក្រសួងមហាផ្ទៃកំពុងស្រាវជ្រាវចាប់ខ្លួនម្ចាស់គណនីហ្វេសប៊ុកមួយឈ្មោះ Tharith Bun ត្បិតបានបង្ហោះបែបរូបភាពនិងសំណេរ ដែលមានចេតនាញុះញង់បង្កចលាចល។ លោកថា ពេលនេះសមត្ថកិច្ចកំពុងស្រាវជ្រាវរកបុគ្គលរូបនោះ ដើម្បីចាត់វិធានការតាមច្បាប់។ ជាមួយគ្នានេះ លោកស្នើឱ្យសាធារណជនកុំចាប់អារម្មណ៍ និងកុំចែកចាយព័ត៌មានបែបញុះញង់នេះបន្តទៀត ដើម្បីកុំឱ្យមានការភ័ន្តច្រឡំ។
ទោះបីជាយ៉ាងណា លោក ប៊ុន ថារិទ្ធ ដែលអះអាងថាជាម្ចាស់គណនីហ្វេសប៊ុក Tharith Bun បានប្រាប់ វីអូឌី តាមបណ្តាញប្រព័ន្ធសារ Messenger ឬឆាត នៅថ្ងៃទី៣០ ខែសីហានេះថា ការដែលអាជ្ញាធរស្រាវជ្រាវតាមចាប់លោកនេះ វាមិនមែនជារឿងចម្លែកទេសម្រាប់លោក។ បុរសដែលមានអាសយដ្ឋាននៅក្រៅប្រទេសរូបនេះ បន្ថែមថា លោកនឹងទទួលខុសត្រូវចំពោះមុខច្បាប់ ប្រសិនបើអ្វីដែលលោកបង្ហោះនោះជារឿងខុសច្បាប់មែន។
ម្ចាស់គណនីហ្វេសប៊ុក Tharith Bun និយាយថា៖ «គ្មានអីចម្លែកទេ របបផ្តាច់ការតែងតែប្រើពាក្យចាប់ចង គំរាមកំហែង សម្លុតសម្លាប់ ដើម្បីបំបិទសិទ្ធិប្រជាពលរដ្ឋ។ តែសម្រាប់ខ្ញុំ ដូចវាស៊ាំទៅហើយ គេតាមចាប់មិនដឹងជាប៉ុន្មានដងហើយទេ គ្រាន់តែគេចាប់មិនបាន។ តាមខ្ញុំចាំ គេប្រកាសផ្លូវការ ដូចជាពីរដងហើយ អារឿងតាមចាប់ខ្ញុំហ្នឹង»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោក សេក សុជាតិ មានប្រសាសន៍ថា ក្នុងករណីណាក៏ដោយ បើសិនជាការផ្សាយព័ត៌មានមិនពិត ទោះព័ត៌មាននោះតូចឬធំក្តី គឺពាក់ព័ន្ធជាមួយផ្លូវច្បាប់។ លោកថា បើសិនមានអ្នកបំពានលើច្បាប់ អាជ្ញាធរមានសិទ្ធិនៅក្នុងការអនុវត្តតាមការដែលច្បាប់បានរៀបចំ។
ទោះយ៉ាងណា លោកមិនគាំទ្រឡើយចំពោះការចែកចាយព័ត៌មានមិនពិត ហើយគាំទ្រចំពោះការអនុវត្តច្បាប់ផងដែរ។
លោក សេក សុជាតិ បន្តថា៖ «ខ្ញុំនៅតែគាំទ្រនៅលើផ្នែកច្បាប់ដដែល ព្រោះខ្ញុំមិនគាំទ្រនូវការចែកចាយព័ត៌មានមិនពិតដោយបំពានច្បាប់នោះទេ។ បើព័ត៌មានមិនពិតនោះមិនមានច្បាប់ ក៏ខ្ញុំនៅតែមិនគាំទ្រដែរ ក៏ប៉ុន្តែខ្ញុំក៏មិនគាំទ្រជាមួយនឹងអាជ្ញាធរដែលទៅអនុវត្តទៅលើបុគ្គលដែលផ្សព្វផ្សាយព័ត៌មានមិនពិត ដោយមិនមានច្បាប់នោះដែរ»។
លោក សម រង្ស៊ី ប្រធានអតីតគណបក្សសង្គ្រោះជាតិ នៅថ្ងៃទី២៩ ខែសីហា ឆ្នាំ២០២១កន្លងនេះ បានបង្ហោះរូបថតចាស់មួយសន្លឹកដែលបង្ហាញពីការចាប់ដៃរវាងរូបលោកនិងលោកនាយករដ្ឋមន្ត្រី ហ៊ុន សែន ព្រមជាមួយលោក ស ខេង ឈរនៅកណ្តាល។ ក្នុងនោះ លោក សម រង្ស៊ី បង្ហោះសារបន្តថា «លោក ស ខេង ជាមនុស្សកណ្តាល»។
លោក អេង ឆៃអ៊ាង អនុប្រធានអតីតគណបក្សសង្គ្រោះជាតិ បានបង្ហោះសារនៅថ្ងៃអាទិត្យនេះ ដោយថា ការបង្កើតរដ្ឋាភិបាលបង្រួបបង្រួមជាតិដែលមានវត្តមានលោក ស ខេង ចូលរួមដែរ គឺជារឿងល្អ។
លោកថា៖ «ការបង្កើតរដ្ឋាភិបាលបង្រួបបង្រួមជាតិដែលមានលោក ស ខេង ចូលរួមផងដែរ គឺជាគំនិតមួយដ៏ត្រឹមត្រូវ»។
ទោះបីជាយ៉ាងនេះក្តី កូនប្រុសបង្កើតរបស់លោក ស ខេង និងបច្ចុប្បន្នជារដ្ឋលេខាធិការក្រសួងអប់រំ យុវជន និងកីឡា គឺលោក ស សុខា បានបញ្ជាក់នៅលើទំព័រហ្វេសប៊ុកផ្លូវការនៅព្រឹកថ្ងៃចន្ទនេះថា ការដែលឪពុករបស់លោកទៅប្រទេសបារាំងនោះ គឺជាការធ្វើដំណើរទៅពិនិត្យសុខភាពសុទ្ធសាធ ពុំមានការជួបជាមួយអ្នកនយោបាយណាម្នាក់ឡើយ។
លោក ស សុខា បានសរសេរបន្តថា៖ «វត្តមានសម្តេចក្រឡាហោម ស ខេង ទៅប្រទេសបារាំង រយៈពេល២សប្តាហ៍ ចាប់ពីថ្ងៃទី២២ ខែសីហា ដល់ថ្ងៃទី៥ ខែកញ្ញា គឺជាការអញ្ជើញទៅពិនិត្យសុខភាពសុទ្ធសាធ ពុំមានការជួបជាមួយអ្នកនយោបាយណាម្នាក់ដូចការលើកឡើងរបស់អ្នកវិភាគ ក៏ដូចជាអ្នកនយោបាយមួយចំនួនតូចនៃអតីតគណបក្សសង្គ្រោះជាតិនោះឡើយ»។
លោកបន្ថែមថា ការលើកឡើងរបស់អ្នកនយោបាយមួយចំនួនតូចនៃអតីតគណបក្សសង្គ្រោះជាតិ គ្រាន់តែជាការប្រតិដ្ឋឡើងដើម្បីបំភ័ន្តមតិជាតិនិងអន្តរជាតិ សំដៅកេងចំណេញនយោបាយរបស់ខ្លួននិងបក្ខពួកប៉ុណ្ណោះ។
ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង បានធ្វើដំណើរទៅកាន់ប្រទេសបារាំងរយៈពេល២សប្តាហ៍ គឺចាប់ពីថ្ងៃទី២២ ខែសីហា ដល់ថ្ងៃទី០៥ ខែកញ្ញា ឆ្នាំ២០២១នេះ ដោយខុទ្ទកាល័យរបស់លោកបញ្ជាក់ថាជាដំណើរដែលមានធុរៈផ្ទាល់ខ្លួនប៉ុណ្ណោះ៕