លោកនាយករដ្ឋមន្ត្រី ហ៊ុន សែន បានស្នើឱ្យរដ្ឋមន្ត្រីក្រសួងអប់រំ យុវជន និងកីឡា ពិនិត្យមើលលទ្ធភាពក្នុងការបើកសាលារៀនឡើងវិញ ដោយចាប់ផ្តើមពីតំបន់ជនបទឬទីតាំងដែលមិនមានការឆ្លងជំងឺកូវីដ-១៩។
តាមរយៈសារសំឡេងពិសេសនៅថ្ងៃទី៣១ ខែសីហានេះ ប្រមុខរាជរដ្ឋាភិបាលកម្ពុជាបានកត់សម្គាល់ថា ស្ថានភាពឆ្លងជំងឺកូវីដ-១៩ នៅរាជធានីភ្នំពេញ និងខេត្តក្រុងមួយចំនួនបានធ្លាក់ចុះជាបន្តបន្ទាប់ ដែលនេះគឺជាចំណុចវិជ្ជមានមួយក្នុងការត្រៀមបើកឡើងវិញនូវសង្គមសេដ្ឋកិច្ចកម្ពុជា ហើយក្នុងនោះក៏មានការបើកសាលារៀនឡើងវិញផងដែរ។
បើតាមលោកនាយករដ្ឋមន្ត្រី ហ៊ុន សែន ការបើកសាលារៀនឡើងវិញ គួរចាប់ផ្តើមពីតំបន់ជនបទ ចាប់ពីកម្រិតបឋមសិក្សារហូតដល់កម្រិតមធ្យមសិក្សា នៅតាមទីតាំងដែលមិនមានការឆ្លងជំងឺកូវីដ-១៩ ឬការឆ្លងដែលមានកម្រិតទាប។
ប៉ុន្តែទោះជាយ៉ាងនេះក្តី លោកថា ការបើកសាលារៀនឡើងវិញ ត្រូវធ្វើឡើងដោយគោរពតាមវិធានការសុខាភិបាល និងការរក្សានូវគម្លាតសុវត្ថិភាពសង្គម។ លោកនាយករដ្ឋមន្ត្រីបានបន្ថែមថា ការបន្តបិទសាលារៀននៅក្នុងក្របខណ្ឌទូទាំងប្រទេស នឹងបង្កផលវិបាកដល់កុមារនៅតាមជនបទដែលអាចនឹងត្រូវបោះបង់ចោលការសិក្សាឬភ្លេចអក្សរជាដើម។
ក្រសួងអប់រំ យុវជន និងកីឡា បានប្រកាសបិទសាលារៀនទាំងរដ្ឋនិងឯកជនគ្រប់កម្រិត ចាប់តាំងពីពាក់កណ្តាលខែមីនា រហូតមកដល់ចុងខែសីហានេះ ដោយមិនកំណត់ពេលវេលានោះឡើយ។ ក្រសួងអះអាងថា វិធានការនេះ គឺដើម្បីបង្ការនិងទប់ស្កាត់ការរីករាលដាលជំងឺកូវីដ-១៩។
បើតាមលោកនាយករដ្ឋមន្ត្រី ហ៊ុន សែន ការពិនិត្យលើលទ្ធភាពក្នុងការបើកសាលារៀនឡើងវិញនេះ ស្របពេលដែលកុមារកម្ពុជាដែលមានអាយុចាប់ពី១២ឆ្នាំ ដល់១៥ឆ្នាំ ប្រមាណជា១លាន៥សែននាក់ ក្នុងចំណោមកុមារជាង២លាននាក់ បានចាក់វ៉ាក់សាំងបង្ការជំងឺកូវីដ-១៩រួចហើយ៕