តាមរយៈសារសំឡេងពិសេសនៅថ្ងៃទី៣១ ខែសីហានេះ ប្រមុខរដ្ឋាភិបាល លោក ហ៊ុន សែន បានកត់សម្គាល់ថា ស្ថានភាពឆ្លងជំងឺកូវីដ-១៩ នៅរាជធានីភ្នំពេញ និងខេត្ត-ក្រុងមួយចំនួនបានធ្លាក់ចុះជាបន្តបន្ទាប់។ លោកថា ករណីនេះ ជាចំណុចវិជ្ជមានមួយក្នុងការត្រៀមបើកឡើងវិញនូវដំណើរការសាលារៀនផងដែរ។
លោកនាយករដ្ឋមន្ត្រីបន្តថា ការបើកសាលារៀនឡើងវិញ គួរចាប់ផ្តើមពីតំបន់ជនបទចាប់ពីកម្រិតបឋមសិក្សារហូតដល់កម្រិតមធ្យមសិក្សា នៅតាមទីតាំងដែលមិនមានការឆ្លងជំងឺកូវីដ-១៩ ឬការឆ្លងដែលមានកម្រិតទាប។ ប៉ុន្តែទោះជាយ៉ាងនេះក្តី លោកថា ការបើកសាលារៀនឡើងវិញ ត្រូវធ្វើឡើងដោយគោរពតាមវិធានការសុខាភិបាល និងការរក្សានូវគម្លាតសុវត្ថិភាពសង្គម។
បើតាមលោកនាយករដ្ឋមន្ត្រី ហ៊ុន សែន ការបន្តបិទសាលារៀននៅក្នុងក្របខណ្ឌទូទាំងប្រទេស នឹងបង្កផលវិបាកដល់កុមារនៅតាមជនបទត្រូវបោះបង់ចោលការសិក្សា ឬភ្លេចអក្សរជាដើម។
លោកថា៖ «ដោយសង្កេតឃើញថា នៅតាមសាលាជនបទរបស់យើងដែលពុំមានការឆ្លង យើងមានលទ្ធភាពបើកនូវសាលារៀននោះ ដោយមិនរង់ចាំថាទូទាំងប្រទេសត្រូវតែបើក ឬក៏ខេត្តមួយត្រូវតែបើក ឬស្រុកមួយត្រូវតែបើកទាំងអស់នោះទេ។ យើងគួរជ្រើសរើសនៅតាមភូមិ តាមឃុំដែលពុំមានការកើតនូវជំងឺឆ្លងនេះ ហើយកុមារា-កុមារីរបស់យើងបានចូលសិក្សា ដោយរក្សានូវគម្លាតសុវត្ថិភាព រក្សានូវវិធានការសុខាភិបាលចាំបាច់នានា ដើម្បីឱ្យកុមារា-កុមារីរបស់យើងបានចូលរៀន»។
លោក អ៊ុង គឹមអូន ពលរដ្ឋរស់នៅតាមបណ្ដោយផ្លូវរថភ្លើង រាជធានីភ្នំពេញ បានសាទរចំពោះរដ្ឋាភិបាលដែលគិតគូររឿងបើកសាលារៀនវិញ។ លោកថា តាំងពីមានវិបត្តិកូវីដ-១៩មក កូនរបស់លោករៀនពុំសូវបានដិតដល់ទេ ដោយសារតែខ្វះថវិកាក្នុងការបញ្ចូលលុយទូរសព្ទ ដើម្បីរៀនតាមប្រព័ន្ធអនឡាញ ខណៈកូនរបស់លោកក៏តែងតែរអ៊ូថារៀនមិនយល់ ហើយចំពោះលោកក៏មិនយល់ដូចគ្នា ដោយសារបច្ចេកវិទ្យារៀនតាមអនឡាញជារឿងថ្មីសម្រាប់លោកនិងកូនៗ។
ខណៈកូនមិនទាន់គ្រប់អាយុសម្រាប់ចាក់វ៉ាក់សាំងនៅឡើយ ពេលសួរថា តើលោកបារម្ភទេ នៅពេលកូនចូលរៀននៅសាលាឡើងវិញនោះ? លោកឆ្លើយថា មិនសូវបារម្ភទេ ដោយសារខាងក្រសួងចេះរៀបចំនិងដោះស្រាយបញ្ហានេះហើយ។
លោក អ៊ុង គឹមអូន និយាយថា៖ «ខ្ញុំគិតថា វាមិនអីទេ ព្រោះសាលាគេចេះរៀបចំហើយ ថាត្រូវធ្វើម៉េចឱ្យអាចសិក្សាបាន ដោយមិនឱ្យមានបញ្ហាប្រឈមខ្ពស់។ ខាងក្រសួង ខាងអាជ្ញាធរ គេចេះរៀបចំហើយ»។
ចំណែកកសិករនៅខេត្តសៀមរាប អ្នកស្រី ប៊ុន កិមឡា លើកឡើងថា កូនរបស់អ្នកស្រីអាយុ១០ឆ្នាំ កំពុងរៀនថ្នាក់ទី៥ នៅមិនទាន់បានចាក់វ៉ាក់សាំងនៅឡើយ។ យ៉ាងណា អ្នកស្រីនៅតែចង់ឱ្យកូនទៅរៀនក្នុងថ្នាក់ ប្រសិនបើសាលាបើកដំណើរការឡើងវិញប្រាកដមែន។
អ្នកស្រីថា៖ «បើបានទៅរៀនកាន់តែល្អ ហើយអារឿងភ័យមិនភ័យ យើងការពារខ្លួនយើង ពាក់ម៉ាស កាន់អាល់កុលឱ្យជាប់ទៅ។ បើគេអ្នកផ្សេងៗ គេបានចាក់ [វ៉ាក់សាំង] ហើយ មិនបញ្ហាទេ។ អ្នកមិនចាក់តិចតួចទេ ព្រោះអ្នកចាក់ច្រើនហើយ អត់អីទេ ព្រោះយើងការពារខ្លួនយើងដែរ»។
លោក ស សុផល គ្រូបង្រៀនថ្នាក់ទី៩ នៃអនុវិទ្យាល័យចំបក់ ខេត្តស្វាយរៀង លើកឡើងតាមរយៈបណ្តាញសង្គមហ្វេសប៊ុកថា ការបើកសាលារៀនវិញជារឿងល្អ ព្រោះសិស្សបានខកខានការរៀនសូត្រជាយូរខែមកហើយ ម្យ៉ាងការរៀនផ្ទាល់មានភាពងាយស្រួលសម្រាប់សិស្សនៅជនបទផងដែរ។
លោកបន្តថា៖ «នៅជនបទ ការរៀនអនឡាញបានខ្លះដែរ តែមិនបានគ្រប់ជ្រុងជ្រោយទេ ទី១ មិនមានទូរសព្ទ និងទោះមានទូរសព្ទ ក៏មិនមានលុយបញ្ចូលទូរសព្ទ។ ហើយឪពុកម្តាយចេញរកស៊ី មិនបានមើលថែកូនទេ ពោលគឺកូនចង់រៀនក៏រៀនទៅ មិនចង់រៀនក៏អត់ទៅ»។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី គាំទ្រចំពោះការបើកសាលារៀនឡើងវិញ។ ប៉ុន្តែអ្នកស្រីថា ក្រសួងសុខាភិបាលដែលជាស្ថាប័នជំនាញ គួរជាអ្នកចេញសេចក្តីប្រកាសពីលទ្ធភាពនៃការបើកសាលាទាំងអស់ និងសហការជាមួយស្ថាប័នពាក់ព័ន្ធ ជាជាងឱ្យក្រសួងអប់រំជាអ្នកធ្វើការងារនេះតែម្នាក់ឯង។
អ្នកស្រីបន្តថា៖ «ការបង្រៀនផ្ទាល់ជារឿងល្អប្រសើរហើយ ប៉ុន្តែបារម្ភបំផុតខ្លាចបើកបិទៗដូចរាល់ដង ចូលរៀនបានតែប៉ុន្មាន បិទដោយសារតែកូវីដ-១៩ឆ្លងអ៊ីចឹង។ អ៊ីចឹងចង់ឱ្យក្រសួងសុខាភិបាលហ្នឹងចេញសេចក្តីប្រកាសតែម្តងថា លែងមានហើយកូវីដ-១៩! អ៊ីចឹងយើងអាចទៅសិក្សា មានគ្រូហើយនិងសិស្សផ្ទាល់ អ៊ីចឹងយើងមិនបារម្ភអីទៀតទេ»។
ភ្លាមៗ ក្រោយការថ្លែងសាររបស់នាយករដ្ឋមន្ត្រី ក្រសួងអប់រំ យុវជន និងកីឡា បានចេញសេចក្តីណែនាំមួយស្តីពីគោលការណ៍សំខាន់ៗដែលស្ថាប័នពាក់ព័ន្ធនឹងវិស័យអប់រំ ការបង្រៀន និងរៀន នៅភូមិសាស្ត្រដែលមានហានិភ័យទាបចំនួន៥ចំណុច។
ក្រសួងបានណែនាំដល់អាជ្ញាធររាជធានី-ខេត្ត ត្រូវធ្វើការវាយតម្លៃស្ថានភាពជាក់ស្តែង និងការអនុវត្តនូវគម្លាតសុវត្ថិភាព និងវិធានការសុខាភិបាលចាំបាច់នានា ដើម្បីឈានទៅដល់ការបើកដំណើរការឡើងវិញនូវគ្រឹះស្ថានសិក្សាចំណេះទូទៅគ្រប់កម្រិត នៅតាមក្រុង ស្រុក ខណ្ឌ ដែលមានហានិភ័យទាប។ ក្រសួងបន្តថា ការបន្តរៀនតាមបណ្តុំដែលមានសិស្សចំនួនតិចជាង១៥នាក់ និងឆ្លាស់វេន ឬការរៀនតាមបែបចម្រុះចំពោះតំបន់ប្រជុំជននិងទីក្រុងដែលមានការឆ្លងតិច និងមានការចាក់វ៉ាក់សាំងរួចហើយ។
បន្ថែមពីនេះ ក្រសួងក៏បានណែនាំគ្រឹះស្ថានសិក្សា ត្រូវរក្សាការបង្រៀននិងរៀនពីចម្ងាយតាមអនឡាញចំពោះភូមិសាស្ត្រដែលមានហានិភ័យខ្ពស់ និងត្រូវពង្រឹងវិធានការការពារសុខភាពបុគ្គលិកអប់រំ ជាពិសេសគ្រូបង្រៀនដែលមានអាយុលើសពី៥០ឆ្នាំឡើងទៅ ព្រមទាំងត្រូវបង្កើតគណៈកម្មការគ្រប់គ្រងសាលា ដោយមានការចូលរួមពីមាតាបិតានិងអាជ្ញាធរមូលដ្ឋាន ដើម្បីសម្រេចនៅកម្រិតសាលារៀន ក្នុងការបើកឬផ្អាកដំណើរការសាលារៀន។
ក្រសួងអប់រំ យុវជន និងកីឡា បានប្រកាសបិទសាលារៀនទាំងរដ្ឋនិងឯកជនគ្រប់កម្រិតចាប់តាំងពីពាក់កណ្តាលខែមីនា រហូតមកដល់ចុងខែសីហានេះ ដោយមិនកំណត់ពេលវេលានោះឡើយ ក្រោមហេតុផលថា ដើម្បីបង្ការនិងទប់ស្កាត់ការរីករាលដាលជំងឺកូវីដ-១៩។
បើតាមលោកនាយករដ្ឋមន្ត្រី ហ៊ុន សែន ការពិនិត្យលើលទ្ធភាពក្នុងការបើកសាលារៀនឡើងវិញនេះ ស្របពេលកុមារកម្ពុជាដែលមានអាយុចាប់ពី១២ឆ្នាំ ដល់១៥ឆ្នាំ ប្រមាណ១លាន៥សែននាក់ ក្នុងចំណោមកុមារជាង២លាននាក់ បានចាក់វ៉ាក់សាំងបង្ការជំងឺកូវីដ-១៩រួចហើយ៕