របាយការណ៍ស្នងការដ្ឋាននគរបាលខេត្តបន្ទាយមានជ័យ ឱ្យដឹងថា រយៈពេល៨ខែមកនេះ ការបង្ក្រាបបទល្មើសព្រហ្មទណ្ឌក្នុងខេត្តនេះបានកើនឡើងចំនួន១៨ភាគរយ បើធៀបនឹងរយៈពេលដូចគ្នាកាលពីឆ្នាំមុន។
យោងតាមរបាយការណ៍បូកសរុបការងាររបស់ស្នងការដ្ឋាននគរបាលខេត្តបន្ទាយមានជ័យ ដែលត្រូវបានសារព័ត៌មានក្នុងស្រុកមួយយកមកចុះផ្សាយ បានឱ្យដឹងថា សភាពការណ៍បទល្មើសព្រហ្មទណ្ឌកើតឡើង៧៣លើក លើ៦២លើក ដែលចំនួនកើនឡើង១១លើក ស្មើនឹង ១៨% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះ បទល្មើសឧក្រិដ្ឋ កើតឡើង១៩លើក លើ១៧លើក កើនឡើង១២% និងបទមជ្ឈិម កើតឡើង៥៤លើក លើ៤៥លើក កើនឡើង២០%។
ស្នងការនគរបាលខេត្តបន្ទាយមានជ័យ លោកឧត្តមសេនីយ៍ទោ សិទ្ធិ ឡោះ បានប្រាប់ វីអូឌី នៅថ្ងៃទី០២ ខែកញ្ញា ថាបទល្មើសកើតឡើងភាគច្រើន សុទ្ធតែជាបទល្មើសមជ្ឈិម។ ករណីនេះ លោកចាត់ទុកថា បញ្ហាទាំងនេះជារឿងធម្មតាដែលកើតឡើងនៅពេលនេះ។
លោកបញ្ជាក់ថា៖ «បទល្មើសហ្នឹងគឺអត់មានចរិតលក្ខណៈធ្ងន់ធ្ងរអីទេ! ហើយប្អូនក៏បានដឹងហើយណាថា កូវីដ ដែលបងប្អូនមួយចំនួនមានការបិទខ្ទប់ បិទអីអ៊ីចឹងទៅ! ខ្លះទៅគាត់មិនសូវសប្បាយចិត្ត អ៊ីចឹងគាត់គ្រប់គ្រងអារម្មណ៍មិនបាន គាត់ហូបចុក ហើយបានវាយតប់នៅខាងក្រៅខ្លះអីខ្លះ វាជារឿងធម្មតានៅក្នុងសង្គមរបស់យើង»។
អ្នកសម្របសម្រួលនៃសមាគមអាដហុកប្រចាំខេត្តបន្ទាយមានជ័យ លោក ស៊ុំ ចាន់គា បង្ហាញការព្រួយបារម្ភចំពោះការកើនឡើងនៃចំនួនបទល្មើសនេះ។ ករណីនេះ លោកបានស្នើដល់សមត្ថកិច្ចជួយពង្រឹងវិធានការទប់ស្កាត់និងបង្រ្កាបបទល្មើសទាំងនោះបន្ថែមទៀត ដើម្បីការពារសន្តិសុខសណ្តាប់ធ្នាប់និងសុវត្ថិភាពជូនប្រជាពលរដ្ឋឱ្យមានប្រសិទ្ធភាព។
លោកបន្តថា៖ «តួនាទីដែលជាភ្នាក់ងាររបស់មន្រ្តីនគរបាលយុត្តិធម៌ ត្រូវធ្វើការស៊ើបអង្កេតស្វែងរកមុខសញ្ញាទៅលើជនទាំងអស់នោះ ដើម្បីទប់ស្កាត់ ដើម្បីបង្ក្រាបឱ្យអស់លទ្ធភាព មុននឹងចាប់បញ្ជូនមកតុលាការ មានន័យថា ការទប់ស្កាត់បង្រ្កាបហ្នឹងកើតឡើង ព្រោះបញ្ហាហ្នឹងឈានដល់ការបង្ករបួសស្នាម ឈានដល់ការប្រព្រឹត្តបទល្មើសផ្សេងៗ»៕
