ទីក្រុងទេសចរណ៍ក្នុងខេត្តកំពត បានពង្រីកឆ្នេរខ្សាច់មួយនៅតាមមាត់ព្រែកដ៏ស្ងប់ស្ងាត់របស់ខ្លួន ប៉ុន្តែបរិយាកាសត្រូវបានរំខានដោយក្លិនមិនល្អពីទឹកស្អុយដែលត្រូវបានបញ្ចេញនៅឆ្នេរខ្សាច់។
នៅទីតាំងហាងកាហ្វេ River Park ជាកន្លែងបង្ហូរទឹកកខ្វក់ត្រូវបានដាក់នៅខាងក្រោមកម្រាលឈើ ជិតកន្លែងអង្គុយខាងក្រៅ ដែលបង្កជាក្លិនមិនល្អនៅទីនោះ។
ម្ចាស់ទីតាំងហាងកាហ្វេ River Park បានបដិសេធមិនផ្ដល់កិច្ចសម្ភាសន៍ក្នុងអត្ថបទនេះ។
ទោះជាយ៉ាងណាក៏ដោយ លោកបានគាំទ្រការលើកឡើងរបស់បុគ្គលិកម្នាក់នៅហាងកាហ្វេរបស់លោកដែលបានប្រាប់អ្នកយកព័ត៌មាន វីអូឌី។
យោងតាមលោក ស៊ឹម ដារ៉ា អាយុ៣០ឆ្នាំ ជាបុគ្គលិកបម្រើការនៅទីតាំងហាងកាហ្វេ River Park បានលើកឡើងថា ទឹកកខ្វក់នេះហូរចេញពីផ្សារក្នុងទីក្រុង ហើយបន្តហូរចូលទៅក្នុងព្រែក ដោយមិនបានឆ្លងកាត់ការធ្វើប្រព្រឹត្តកម្មនោះទេ។ ក្នុងរយៈពេលប្រមាណជា២ខែមុន ហាងកាហ្វេបានសាងសង់បំពង់បង្ហូរទឹកកខ្វក់ផ្ទាល់ខ្លួន ដើម្បីបញ្ជូនទឹកស្អុយទៅកាន់កណ្តាលព្រែកឱ្យឆ្ងាយពីភ្ញៀវទេសចរ។
បច្ចុប្បន្ន ទីក្រុងកំពុងស្ថិតនៅក្នុងការកែលម្អមាត់ព្រែក ក៏ដូចជាគម្រោងដែលផ្តល់មូលនិធិដោយធនាគារអភិវឌ្ឍន៍អាស៊ី (ADB) ក្នុងទំហំទឹកប្រាក់៣៣លានដុល្លារអាមេរិក ដើម្បីសាងសង់ប្រព័ន្ធប្រព្រឹត្តកម្មទឹកកខ្វក់ និងប្រព័ន្ធបង្ហូរទឹកស្អុយ។
មន្រ្តីរដ្ឋបាលក្រុងកំពតមួយរូបបានឱ្យដឹងថា ប្រព័ន្ធបំពង់បង្ហូរទឹកកខ្វក់របស់ហាងកាហ្វេត្រូវបានរុះរើចេញ ដោយត្រូវជំនួសមកវិញនូវបំពង់បេតុងថ្មីសម្រាប់ការកែលម្អនៅតាមមាត់ព្រែក ប៉ុន្តែបច្ចុប្បន្ន អាជ្ញាធរខេត្តត្រូវរង់ចាំការសម្រេចចិត្តពីធនាគារអភិវឌ្ឍន៍អាស៊ី (ADB) ថាតើត្រូវពង្រីកការផ្តល់មូលនិធិពីកាលបរិច្ឆេទនៅថ្ងៃទី៣០ ខែមិថុនា របស់ខ្លួនឬយ៉ាងណា។
ទោះយ៉ាងណា ADB បានលើកឡើងថា ការផ្តល់មូលនិធិនេះត្រូវបានពន្យារដល់ឆ្នាំ២០២៣ ខណៈដែលការអភិវឌ្ឍមាត់ព្រែក គឺជាកិច្ចការងាររបស់រដ្ឋ។
លោក ភា រុណ អាយុ៦០ឆ្នាំ អង្គុយនៅតាមមាត់ព្រែកដែលមានចម្ងាយប្រមាណជា១០០ម៉ែត្រពីហាងកាហ្វេ River Park ថ្លែងថា៖ «ខ្ញុំទើបតែមកកាន់ទីនេះជាលើកដំបូង ហើយវាជាកន្លែងដ៏ល្អមួយនៅទីនេះ។ ប៉ុន្តែវាមានក្លិនមិនល្អបន្តិចបន្តួច ដែលខ្ញុំមិនដឹងថា ក្លិននេះមកពីណានោះទេ»។
លោកបន្តថា៖ «ខ្ញុំមកទីនេះក្នុងរយៈពេលខ្លីប៉ុណ្ណោះ ដូច្នេះហើយ វាមិនបង្កជាបញ្ហាសម្រាប់ខ្ញុំនោះទេ»។
ទាក់ទិននឹងករណីនេះ លោក ស៊ឹម ដារ៉ា ជាបុគ្គលិកហាងកាហ្វេ River Park បន្តថា ឧទ្យានមាត់ព្រែកកំពុងតែស្ថិតនៅក្នុងការកែលម្អ ដែលនឹងមានភាពប្រសើរឡើងសារជាថ្មីម្តងទៀត។
លោកថា៖ «អតិថិជនភាគច្រើនមកពីខេត្តផ្សេង ពួកគេចូលចិត្តទីតាំងហាងនេះ ប្រសិនបើពួកគេមិនធ្លាប់ចូលមកកាន់តំបន់នេះកាលពីពេលកន្លងទៅ។ ប៉ុន្តែនៅពេលពួកគេចូលមកទីនេះ ពួកគេនឹងឡើងទៅជាន់ខាងលើ ឬចាកចេញពីហាងតែម្ដង»។
លោក ស៊ឹម ដារ៉ា បន្ថែមថា លោកមិនមានអារម្មណ៍ល្អនោះទេក្នុងការធ្វើការជាមួយនឹងក្លិនមិនល្អរៀងរាល់ថ្ងៃបែបបេះ។
លោកថា៖ «ប៉ុន្តែខ្ញុំត្រូវការការងារជាចាំបាច់។ ខ្ញុំគ្មានកន្លែងណាដែលត្រូវទៅនោះទេ ហើយវាពិបាករកការងារថ្មីស្របពេលដែលមានវិបត្តិនៃជំងឺកូវីដ-១៩»។
យោងតាមឯកសាររបស់ធនាគារអភិវឌ្ឍន៍អាស៊ី បង្ហាញថា ប្រាក់កម្ចីចំនួន៣៣លានដុល្លារ ត្រូវបានអនុម័ត និងចុះហត្ថលេខានៅឆ្នាំ២០១៥។ គម្រោងនេះ រួមបញ្ចូលទាំងប្រព័ន្ធប្រព្រឹត្តកម្មទឹកកខ្វក់ និងការបង្ហូរទឹកក្នុងទីក្រុងកំពត ដែលគ្រោងនឹងសាងសង់ប្រព័ន្ធរំដោះទឹកមួយចំនួននិងរោងចក្រប្រព្រឹត្តកម្មទឹកកខ្វក់ផងដែរ។
ការធ្វើបច្ចុប្បន្នភាពនៅខែមិថុនា បានឱ្យដឹងថា កិច្ចសន្យាសម្រាប់ការងារសាងសង់ត្រូវបានផ្តល់ជូននៅខែកញ្ញា ឆ្នាំ២០១៩ ហើយក្នុងនោះ ការងាររបស់គម្រោងប្រមាណជា១៥ភាគរយត្រូវបានបញ្ចប់ ខណៈបញ្ហាជំងឺកូវីដ-១៩ ស្ថានភាពដីមិនល្អ និងឧបសគ្គអាកាសធាតុ បានបណ្តាលឱ្យមានការពន្យារពេល។
អភិបាលរងក្រុងកំពត លោក អែត សារិទ្ធ បានលើកឡើងថា ៧០ភាគរយនៃបណ្តាញលូបង្ហូរទឹកដែលមានតាំងពីសម័យអាណានិគមនិយមបារាំង គិតមកដល់បច្ចុប្បន្ននេះ មានលក្ខណៈតូចចង្អៀត។
លោកបានបន្ថែមថា បច្ចុប្បន្ននេះ ទឹកកខ្វក់ហូរចូលព្រែកនិងសមុទ្រដោយមិនបានឆ្លងកាត់ការធ្វើប្រព្រឹត្តកម្ម ដែលនាំឱ្យប៉ះពាល់ដល់បរិស្ថាននិងប្រព័ន្ធអេកូឡូស៊ី។
លោកថា៖ «ទោះជាយ៉ាងណា បច្ចុប្បន្ននេះ យើងមិនអាចបន្តការងាររបស់យើងបានទេ ដោយសារតែវាជារដូវភ្លៀងធ្លាក់។ នេះគឺជាកិច្ចការងារធំមួយ ដោយសារតែតាមរយៈកិច្ចសហប្រតិបត្តិការជាមួយ ABD យើងបានធ្វើការជួសជុលនិងផ្លាស់ប្តូរសម្ភារជាច្រើន ដូចជា ការស្ថាបនាហេដ្ឋារចនាសម្ពន្ធឡើងវិញ ជាដើម។ យើងដឹងថា វាអាចនឹងមានក្លិនអាក្រក់នៅទីនោះ ប៉ុន្តែយើងនឹងបន្តធ្វើដោយខ្លួនឯង ជាជាងរង់ចាំ ADB ក្នុងការបន្តគម្រោងរបស់ពួកគេ»។
លោកបន្ថែមថា៖ «បើទោះបីជាគម្រោង ADB បានបញ្ចប់ក្នុងរយៈពេលពីរបីខែមុនក៏ដោយ ក៏យើងនៅតែព្យាយាមឱ្យអស់ពីសមត្ថភាព ដើម្បីបញ្ចប់ការសាងសង់ ខណៈដែលយើងបានរៀបចំបំពង់ និងចាក់បំពេញខ្សាច់នៅតាមមាត់ព្រែករួចហើយ»។
លោក អែត សារិទ្ធ បន្តថា ទីក្រុងកំពុងធ្វើការកែលម្អឧទ្យានមាត់ព្រែក និងបានពង្រីកឆ្នេរក្បែរស្ពានធំ។
អភិបាលខេត្តកំពត លោក ជាវ តាយ បញ្ជាក់ថា លោកមិនអាចផ្តល់ព័ត៌មានជាក់លាក់អំពីផែនការសម្រាប់គម្រោងទឹកកខ្វក់នេះបានទេ ខណៈដែលគម្រោងបន្តមានការផ្លាស់ប្តូរ។
លោកថា៖ «ក្នុងឆ្នាំ២០១៩ មានការសិក្សាមួយអំពីគម្រោងនេះ ហើយវាបានដំណើរការជាជំហានៗ។ ប៉ុន្តែ ADB ក្រុមហ៊ុនចុះកិច្ចសន្យា និងក្រសួងសេដ្ឋកិច្ចនិងហិរញ្ញវត្ថុ មិនបានសហការគ្នាបានល្អនោះទេ»។
លោកបន្តថា៖ «នៅឆ្នាំ២០២១នេះ យើងនឹងបន្តគម្រោង ប៉ុន្តែខ្ញុំមិនអាចបញ្ជាក់លម្អិតបាននោះទេ ខណៈដែលគម្រោងនេះស្ថិតនៅក្នុងការសម្រេចចិត្តរបស់ ADB នៅឡើយ»។
អភិបាលខេត្តកំពតរូបនេះបន្ថែមថា៖ «យើងដឹងថា ទឹកកខ្វក់មិនល្អសម្រាប់សមុទ្រនិងព្រែកនោះទេ ប្រសិនបើយើងមិនបានចម្រោះវាជាមុន។ យើងមានបញ្ហាមួយចំនួនទាក់ទងទៅនឹងការរៀបចំផែនការ។ ប៉ុន្តែខ្ញុំសង្ឃឹមថា នៅពេលអនាគត គម្រោងនេះនឹងសម្រេចបាន១០០ភាគរយ។ យើងនឹងមិនបន្តទុកឱ្យនៅដូច្នេះនោះទេ បើទោះបីជាគ្មាន ADB ក៏ដោយ ខណៈដែល៤០ភាគរយនៃគម្រោងត្រូវបានបញ្ចប់រួចរាល់ហើយ»។
ទោះជាយ៉ាងណា នាយិកាប្រចាំប្រទេសកម្ពុជារបស់ ADB លោកស្រី Sunniya Durrani-Jamal បានឱ្យដឹងថា ការផ្តល់មូលនិធិត្រូវបានពង្រីករួចហើយ ដែលគម្រោងនេះកំពុងបានដំណើរការឡើងវិញ។
លោកស្រីថ្លែងថា៖ «គម្រោងអភិឌ្ឍន៍ក្រុងរបៀង២ [Second Greater Mekong Sub-region Corridor Towns Development Project] នៅមិនទាន់បញ្ឈប់សកម្មភាពនោះទេ ខណៈដែលការងារនានាកំពុងតែបន្តជាមួយនឹងការសាងសង់រោងចក្រប្រព្រឹត្តកម្មទឹកកខ្វក់ និងបណ្តាញលូបង្ហូរទឹក»។
លោកស្រីបន្ថែមថា ការធ្វើឱ្យប្រសើរឡើងនៅតាមមាត់ព្រែក កំពុងត្រូវបានធ្វើដោយរដ្ឋាភិបាលកម្ពុជា។
នាយិការូបនេះបន្តថា៖ «ទីតាំងរបស់រោងចក្រប្រព្រឹត្តកម្មទឹកកខ្វក់ មិនស្ថិតនៅតាមបណ្តោយមាត់ព្រែកនោះទេ ហើយ ADB ក៏គ្មានសកម្មភាពហេដ្ឋារចនាសម្ពន្ធណាមួយនៅតាមបណ្តោយមាត់ព្រែកផងដែរ ដែលយើងយល់ថា នេះជាកិច្ចការងារដែលកំពុងត្រូវបានធ្វើឱ្យប្រសើរឡើងដោយរដ្ឋាភិបាល។ គម្រោងអភិឌ្ឍន៍ក្រុងរបៀង២ មិនទាន់បញ្ចប់នោះទេ ហើយហេដ្ឋារចនាសម្ពន្ធដែលបានគ្រោងទុកទាំងអស់នឹងត្រូវផ្តល់ជូន»។
លោកស្រី Sunniya Durrani-Jamal បន្ថែមថា ការពង្រីកគម្រោងនេះ ផ្តល់នូវការគាំទ្រហេដ្ឋារចនាសម្ពន្ធបន្ថែមសម្រាប់ខេត្តកំពត រួមទាំងរោងចក្រប្រព្រឹត្តកម្មទឹកកខ្វក់។
មន្រ្តីមន្ទីរសេដ្ឋកិច្ច និងហិរញ្ញវត្ថុខេត្តកំពត មិនអាចទាក់ទងដើម្បីសុំការអធិប្បាយបន្ថែមទាក់ទងនឹងករណីនេះនោះទេ។
លោក ហាក់ លី ជាអ្នកលក់នំបុ័ងសាំងវិចមួយរូបនៅតាមមាត់ព្រែក បានលើកឡើងថា លោកទើបតែត្រលប់មកកាន់ខេត្តកំណើតរបស់ខ្លួនវិញ ក្នុងរយៈពេលប៉ុន្មានសប្តាហ៍ចុងក្រោយនេះ បន្ទាប់ពីធ្វើការនៅរោងចក្រមួយនៅខេត្តព្រះសីហនុ អស់រយៈពេល២ឆ្នាំ ដោយសារតែការរស់នៅប្រឈមនឹងការលំបាក។
លោកថា ខេត្តកំពតមានភាពស្ងប់ស្ងាត់ជាមួយនឹងចំនួនភ្ញៀវទេសចរតិចតួច។ ជាគំនិតរបស់លោក ការសម្អាតបរិស្ថាន គឺជាកិច្ចការបន្ទាន់មួយសម្រាប់ទីក្រុងមួយនេះ។
លោក ហាក់ លី ថ្លែងថា៖ «នៅលើឆ្នេរខ្សាច់ មានសំរាមជាច្រើន។ នៅពេលដែលមានភ្លៀងធ្លាក់ខ្លាំង វាបង្កជាក្លិនមិនល្អ ដែលធ្វើឱ្យភ្ញៀវទេសចរមិនចង់មកកម្សាន្តនៅទីនេះនោះទេ»៕
ប្រែសម្រួលពី VOD English ៖ លោក ភុន ច័ន្ទឧសភា