សមាគមខ្មែរកម្ពុជាក្រោម បាននិយាយថា ព្រះសង្ឃខ្មែរកម្ពុជាក្រោមមួយអង្គ ព្រះនាម ប៉ាង សុដា ត្រូវបានផ្តល់ភេទទៅជាព្រះសង្ឃវិញហើយ ក្រោយពីអាជ្ញាធរខេត្តកំពង់ចាមចាប់ឃាត់ព្រះកាយកាលពីថ្ងៃព្រហស្បតិ៍ ក្រោមកិច្ចអន្តរាគមន៍ពីរដ្ឋាភិបាល និងមន្ត្រីសង្ឃជាន់ខ្ពស់។
លេខាធិការដ្ឋានអង្គការសមាគមខ្មែរកម្ពុជាក្រោម លោក ប៊ុន មុនី ប្រាប់ VOD នៅថ្ងៃចន្ទនេះថា ព្រះតេជគុណ ប៉ាង សុដា ជាព្រះចៅអធិការវត្ត វង្គត់បុរីភ្នំពេញ (ហៅវត្តភ្នំពេញថ្មី) ស្ថិតនៅស្រុកចំការលើ ខេត្តកំពង់ចាម ត្រូវបានបំពាក់ភេទជាសង្ឃវិញហើយ ក្រោយពីមានការចាប់ព្រះកាយនិងផ្សឹកព្រះអង្គកាលពីចុងសប្តាហ៍មុន។
តែយ៉ាងណា លោកថា ព្រះចៅអធិការអង្គនេះនៅមិនទាន់បានវិលត្រឡប់ទៅវត្តវិញនៅឡើយទេ ខណៈចំណុះជើងវត្ត កំពុងមានការព្រួយបារម្ភពីការចាប់ព្រះកាយព្រះអង្គជាថ្មីទៀត។
លោកថា៖ «លោក [ព្រះតេជគុណ ប៉ាង សុដា] កំពុងនៅកន្លែងមានសុវត្ថិភាពមួយក្នុងរាជធានីភ្នំពេញ [ព្រះអង្គអត់ទាន់ទៅគង់នៅវិញទេ?] អត់ទេ នៅទេ»។
លោក ប៊ុន មុនី ឱ្យដឹងទៀតថា ព្រះអង្គ ប៉ាង សុដា រងការចោទថា បានរារាំងដល់ការអនុវត្តវិធានទប់ស្កាត់ជំងឺឆ្លងកូវីដ-១៩ ខណៈព្រះអង្គស្រោចទឹកឱ្យពុទ្ធបរិស័ទនៅក្នុងវត្ត និងនិមន្តទៅសូត្រមន្តតាមផ្ទះពុទ្ធបរិស័ទ តាមការនិមន្តពីពលរដ្ឋតាមបែបជំនឿសាសនា។
ព្រះតេជគុណ ប៉ាង សុដា ជាព្រះចៅអធិការវត្ត វង្គត់បុរីភ្នំពេញ (វត្តភ្នំពេញថ្មី) ស្ថិតនៅស្រុកចំការលើ ខេត្តកំពង់ចាម មានសង្ឃដីកាប្រាប់ វីអូឌី នៅថ្ងៃនេះដែរថា រឿងរបស់ព្រះតេជគុណនេះពុំទាន់មានការចោទប្រកាន់អីទេ ពោលគឺមិនមានអ្វីទាំងអស់ ព្រោះពុំបានចូលតុលាការ និងមិនមានពាក្យបណ្តឹងពីព្រះរាជអាជ្ញាដែរ។ ព្រះតេជគុណមានសង្ឃដីកាបន្តថា រឿងនេះប្រហែលជាមានការវិភាគនិងពិចារណាពីថ្នាក់ដឹកនាំ។
ព្រះអង្គបន្ថែមថា កន្លងមកមានទំព័របណ្តាញសង្គមខ្លះត្រូវបានបង្កើតថ្មី ដើម្បីវាយប្រហារព្រះអង្គតាមរបៀបផ្សេងៗ។ យ៉ាងណា ព្រះតេជគុណថា មកទល់ពេលនេះ ការវាយប្រហារទាំងនោះមានការធ្លាក់ចុះ ហើយជំនួសមកវិញដោយមានអ្នកគាំទ្រលើកទឹកចិត្តព្រះអង្គ។
ព្រះតេជគុណ ប៉ាង សុដា មានសង្ឃដីកាថា៖ «ឥលូវនេះ អ្នកគាំទ្រលោកបង អាចនិយាយបានថាមានពី ៧០[ទៅ]៨០%។ វានៅប្រហែលជា ២០[ទៅ]៣០% ទេ ដែលនៅវាយប្រហារតាមអន្តរបណ្តាញមួយៗ [បណ្តាញសង្គម]»។
ទាក់ទងនឹងការលើកឡើងមួយចំនួននៅលើបណ្តាញសង្គម ដូចជា ការដែលថាព្រះអង្គមានពាក់ព័ន្ធនឹងស្ត្រីជាដើមនោះ ព្រះអង្គបានច្រានចោល និងអះអាងថាជារឿងមិនពិតឡើយ។
ព្រះអង្គថា៖ «បើសិនជារឿងហ្នឹងវាពិតមែន ពួកហ្នឹងវាបះបោរហែកស្បង់ចីវរលោកហើយ ព្រោះលោកសាច់៣ជាន់ផង! ឯកឧត្តមលោកផង! […] ធ្វើម៉េចផ្តួលលោកឱ្យបានអ៊ីចឹង ។ល។ តែមកទល់ថ្ងៃនេះ គឺស្ងាត់ស្ងៀមល្អណាស់»។
លោក សេង សុមុនី្ន រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា មានប្រសាសន៍ថា សម្រាប់ព្រះសង្ឃក្នុងព្រះពុទ្ធសាសនា ការសឹកត្រឹមមួយម៉ោងក៏ដាច់និស្ស័យ មិនថាធម៌វិន័យ និងតួនាទីក៏ត្រូវបាត់ដែរ។ លោកបន្ថែមថា បើក្នុងករណីព្រះតេជគុណ ប៉ាង សុដា ធ្វើជាព្រះសង្ឃវិញ គឺត្រូវបួសឱ្យបានត្រឹមត្រូវ។
ពេលសួរថា តើព្រះតេជគុណអាចនឹងធ្វើជាចៅអធិការវិញបានទេក្រោយសឹក? លោក សេង សុមុនី្ន ថាគណៈសង្ឃជាអ្នកចាត់ចែងរឿងនេះ ពោលគឺមិនមែនចេះតែចង់ធ្វើ រួចធ្វើបានវិញនោះទេ។
លោក សេង សុមុនី្ន ថា៖ «តាមច្បាប់ក្នុងព្រះពុទ្ធសាសនា បើគាត់ [ព្រះតេជគុណ ប៉ាង សុដា] សឹកហើយ បួសវិញគឺជាភិក្ខុសង្ឃដ៏សាមញ្ញ។ ទី ១ បើគាត់ធ្វើជាព្រះសង្ឃវិញ ត្រូវបួសឱ្យបានត្រឹមត្រូវ តាមព្រះត្រ័យបិដក។ ត្រូវសុំឧបជ្ឈា សុំច្បាប់រដ្ឋឱ្យបានត្រឹមត្រូវ។ ការធ្វើចៅអធិការ មិនមែនលោកចង់ អាចបានតាមចិត្តទេ […] តែត្រូវមានគណៈសង្ឃស្រុក គណៈសង្ឃខេត្ត ជាអ្នកចាត់តាំងចៅអធិការ មិនមែនចេះតែសុំធ្វើបានទេ។ គេមើលទៅលើគុណធម៌ ថាយើងអាចធ្វើបានឬទេ បើមិនមាន គេមិនព្រមទេ»។
បើតាមសេចក្តីប្រកាសព័ត៌មាន ចុះថ្ងៃទី៣ ខែកញ្ញា ឆ្នាំ២០២១ របស់សមាគមនេះ ព្រះតេជគុណ ប៉ាង សុដា ត្រូវបាននគរបាលស្រុកខេត្ត និងព្រះអនុគណស្រុក ព្រះមេគណខេត្តកំពង់ចាម បានឡោមព័ទ្ធនិងចាប់ព្រះកាយកាលពីថ្ងៃទី២ ខែកញ្ញា ឆ្នាំ២០២១ វេលាម៉ោង១២និង៤៥នាទីរសៀល។
សេចក្តីប្រកាសព័ត៌មានបញ្ជាក់ថា៖ «ការចាប់ព្រះកាយព្រះអង្គនេះ ធ្វើឡើងក្នុងស្ថានភាពយ៉ាងតក់ក្រហល់ និងមិនមានដីកាតាមនីតិវិធីច្បាប់ឡើយ។ សមត្ថកិច្ចថ្នាក់ឃុំ ស្រុក ខេត្ត និងមន្ត្រីសង្ឃខេត្តជាច្រើនអង្គ/នាក់ បាននិមន្តនិងទៅដល់ទីតាំងវត្ត ចាប់ព្រះកាយទាំងព្រះអង្គដោយមិនបានដឹងខ្លួនជាមុន និងមិនបានត្រៀមលក្ខណៈឱ្យបានត្រឹមត្រូវ សូម្បីតែស្បែកជើងក៏គ្មានដែរ»៕