រដ្ឋបាលខេត្តព្រះសីហនុ ដាក់ឱសានវាទចំនួន១៥ថ្ងៃ ដើម្បីឱ្យប្រជាពលរដ្ឋជាង៣០គ្រួសាររុះរើសំណង់លើអូរចេញដោយខ្លួនឯងឱ្យអស់ បើពុំនោះទេ អាជ្ញាធរនឹងចុះអនុវត្តវិធានការរដ្ឋបាល ដោយមិនទទួលខុសត្រូវចំពោះការខូចខាតឬបាត់បង់សម្ភារនោះឡើយ។
ក្នុងលិខិតរបស់រដ្ឋបាលខេត្តព្រះសីហនុ បានឱ្យដឹងកាលពីថ្ងៃទី៦ ខែកញ្ញា ម្សិលមិញ ថាកន្លងមក រដ្ឋបាលខេត្តធ្លាប់បានជូនដំណឹងដល់ប្រជាពលរដ្ឋឱ្យរុះរើផ្ទះ របង និងសំណង់នានាដោយស្ម័គ្រចិត្តចេញពីលើអូរនិងដីចំណីអូរ ដែលមានទីតាំងស្ថិតនៅភូមិ៥ សង្កាត់លេខ៤ ក្រុងព្រះសីហនុ ដើម្បីទុកលទ្ធភាពឱ្យក្រុមការងារចុះរៀបចំកាយស្តារអូរប្រឡាយ ស្របតាមនិយាមកាដែលបានកំណត់ដែរ ប៉ុន្តែមកដល់ពេលនេះ ពលរដ្ឋទាំងនោះមិនគោរពតាមការជូនដំណឹងនោះទេ។
ករណីនេះ អភិបាលខេត្តព្រះសីហនុ លោក គួច ចំរើន បានជូនដំណឹងដល់ប្រជាពលរដ្ឋទាំង៣១គ្រួសារ (ឬស្មើនឹង៣២ខ្នងផ្ទះ) ដែលសង់សំណង់រំលោភលើអូរនិងដីចំណីអូរ ស្ថិតនៅភូមិ៥ សារជាថ្មី ឱ្យរុះរើសំណង់ដោយខ្លួនឯងចេញឱ្យអស់ក្នុងរយៈពេល១៥ថ្ងៃ ដោយរាប់ចាប់ពីថ្ងៃទី៦ ខែកញ្ញា ដល់ថ្ងៃទី២១ ខែកញ្ញា ឆ្នាំ២០២១នេះ។
លិខិតដដែលបញ្ជាក់ថា បើសិនជាប្រជាពលរដ្ឋទាំងនោះមិនព្រមរុះរើចេញដោយស្ម័គ្រចិត្តអំឡុងពេល១៥ថ្ងៃនេះទេ ក្រុមការងារនឹងចុះអនុវត្តវិធានការរដ្ឋបាល ដោយមិនទទួលខុសត្រូវចំពោះការខូចខាតឬបាត់បង់សម្ភារនានារបស់ពលរដ្ឋទាំងនោះឡើយ។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ សុំមិនធ្វើការបកស្រាយបន្ថែមជុំវិញករណីនេះទេ នៅថ្ងៃអង្គារនេះ។
អុ្នកស្រី ហេង ស្រីមុំ រស់នៅសង្កាត់លេខ៥ និយាយថា ផ្ទះរបស់គាត់នឹងរងផលប៉ះពាល់ប្រហែលជា៤ម៉ែត្រ បើសិនត្រូវរុះរើសំណង់ចេញពីលើអូរក្នុងភូមិ៥នោះ។ អ្នកស្រីបន្តថា គាត់មិនជំទាស់នឹងគម្រោងដែលរដ្ឋធ្វើការអភិវឌ្ឍនៅតំបន់នោះទេ តែគាត់ស្នើសុំឱ្យរដ្ឋជួយសម្រួលធ្វើលូរំដោះទឹកនិងរបាំងឱ្យមានរចនាសម្ព័ន្ធល្អផងដែរ ដើម្បីកុំឱ្យប៉ះពាល់ដល់ពលរដ្ឋដែលរស់នៅទីនោះនាថ្ងៃអនាគត។
អ្នកស្រីស្នើដូច្នេះថា៖ «ខ្ញុំចង់ឱ្យខាងរដ្ឋាភិបាលចុះមកមើលផលប៉ះពាល់ជាក់ស្តែងដែលពួកខ្ញុំធ្វើរបាំងការពារអូរ ព្រោះអីខាងខ្ញុំបានរៀបចំរចនាសម្ព័ន្ធលូរួចរាល់អស់ហើយ។ ប៉ុន្តែបើសិនជាខាងរដ្ឋត្រូវឱ្យពួកខ្ញុំរុះរើបន្តទៀត ខាងខ្ញុំរុះរើ តែរចនាសម្ព័ន្ធធ្វើឱ្យមកជិតដល់ផ្ទះខ្ញុំសិន ខាងខ្ញុំមិនជំទាស់ទេ ដោយសារខ្ញុំក៏បានរក្សាប្រយោជន៍ឱ្យទៅខាងរដ្ឋាភិបាល ដោយខ្ញុំបានធ្វើរបាំងការពារកុំឱ្យបាក់អូរប្រឡាយតទៅទៀតដែរ»។
មន្ត្រីសម្របសម្រួលសមាគមអាដហុកប្រចាំខេត្តព្រះសីហនុ លោកស្រី ជៀប សុធារី គាំទ្រចំពោះចំណាត់ការរបស់អាជ្ញាធរខេត្ត។ ប៉ុន្តែអ្នកស្រីក៏ជំរុញឱ្យអាជ្ញាធរត្រូវរកវិធីដោះស្រាយសងសំណងសមរម្យជូនពលរដ្ឋក្នុងគ្រាលំបាកនេះដែរ។
លោកស្រីលើកឡើងថា៖ «ខ្ញុំថាឱ្យមានការជជែកគ្នានិងមានការដោះស្រាយបញ្ហាផ្លាស់ប្ដូរទីលំនៅពួកគាត់វិញ ព្រោះអីក៏ជាការទទួលខុសត្រូវ ដូចដែលខ្ញុំជម្រាបជូនអ៊ីចឹងថា ប្រជាពលរដ្ឋដែលរស់នៅសាងសង់ផ្ទះនៅលើដីចំណីអូរប្រឡាយទាំងអស់ហ្នឹង ក៏មានការទទួលដឹងឮពីអាជ្ញាធរមូលដ្ឋានដែរ ហើយវាមិនមែនទើបកើតមានទេ ការរស់នៅបែបហ្នឹងមានការរស់នៅយូរហើយ»។
កាលពីថ្ងៃទី២៤ ខែសីហា ឆ្នាំ២០២១នេះ នៅក្រុងព្រះសីហនុ ខេត្តព្រះសីហនុ មានភ្លៀងធ្លាក់យ៉ាងខ្លាំង ដោយកម្រិតទឹកភ្លៀងកើនឡើងពីចន្លោះ១២០មម ទៅដល់២៧៩មម បណ្តាលឱ្យទឹកជន់លិចនៅតំបន់ទំនាបមួយចំនួន ក្នុងនោះសង្កាត់លេខ៤ ក៏មានករណីជន់លិចផងដែរ។
បើតាមអ្នកនាំពាក្យរដ្ឋបាលខេត្តប្រាប់ វីអូឌី កាលពីថ្ងៃទី២៥ ខែសីហា ថាកត្តាដែលធ្វើឱ្យមានការជន់លិចខ្លាំងនៅតំបន់មួយចំនួន គឺមានការរួមផ្សំដោយផ្នែក ក្នុងនោះមានដូចជា ភ្លៀងធ្លាក់ច្រើន ផ្ទៃដីរងទឹកភ្លៀងមានការថយចុះបើធៀបនឹងពីមុន និងកត្តាសំរាមស្ទះប្រព័ន្ធបង្ហូរទឹកដែលទាមទារឱ្យមានការស្តារជាប្រចាំ ជាដើម។ លោកបន្តថា កន្លងមក អាជ្ញាធរបានរៀបចំអូរ ប្រឡាយ ទៅតាមប្លង់-ប្រព័ន្ធសូរិយោដី និងបានរុះរើសំណង់ (ផ្ទះ) រាប់រយរាប់ពាន់ខ្នងដែលសង់រំលោភលើអូរប្រឡាយនោះផងដែរ៕
