អ្នកនាំពាក្យពន្ធនាគារឱ្យដឹងនៅថ្ងៃអង្គារនេះថា លោក រ៉ុង ឈុន ដែលបានជាប់ពន្ធនាគារអស់រយៈពេលជាង១ឆ្នាំ កំពុងមានបញ្ហាភ្នែកធ្ងន់ធ្ងរ រង់ចាំការកំណត់ពេលវេលាដើម្បីធ្វើការវះកាត់ ដោយបញ្ហានេះ គ្រួសាររបស់លោកកំពុងបារម្ភជាខ្លាំង។
អ្នកនាំពាក្យអគ្គនាយកដ្ឋានពន្ធនាគារ លោក នុត សវនា លើកឡើងថា លោក រ៉ុង ឈុន ត្រូវបានបញ្ជូនទៅពិនិត្យនៅមន្ទីរពេទ្យមិត្តភាពកម្ពុជា-សូវៀត កាលពីថ្ងៃសៅរ៍ បន្ទាប់ពីមានបញ្ហាស្រវាំងភ្នែកខាងស្តាំខ្លាំង ដែលចាំបាច់ត្រូវធ្វើការវះកាត់ ដើម្បីកុំឱ្យឆ្លងរាលដាលដល់ភ្នែកម្ខាងទៀត។ លោកថា មន្រ្តីពន្ធនាគារកំពុងរង់ចាំពេលវេលាកំណត់របស់គ្រូពេទ្យដើម្បីវះកាត់។
លោកបន្ថែមថា៖ «យើងរង់ចាំខាងពេទ្យជំនាញគាត់លៃពេល ដើម្បីធ្វើការវះកាត់ជូនគាត់»។
យ៉ាងណា មន្ត្រីអ្នកនាំពាក្យរូបនេះមិនអាចបញ្ជាក់ថាតើការវះកាត់នោះនឹងត្រូវធ្វើយ៉ាងណាទេ ដោយលោកបង្វែរសំណួរនេះទៅគ្រូពេទ្យដែលទទួលបន្ទុក។
វីអូឌី មិនអាចទាក់ទងសុំការអធិប្បាយបន្ថែមពីប្រធានមន្ទីរពេទ្យកម្ពុជា-សូវៀត លោក ងឺ ម៉េង បានទេនៅថ្ងៃនេះ ដោយលោកជាប់រវល់។
ពាក់ព័ន្ធបញ្ហានេះ ក្មួយប្រុសរបស់លោក រ៉ុង ឈុន គឺលោក រ៉ុង វិជ្ជា លើកឡើងថា លោកមានការបារម្ភពីសុខភាពភ្នែកពូរបស់ខ្លួនយ៉ាងខ្លាំង។ លោកថា មុនពេលជាប់ពន្ធនាគារ លោក រ៉ុង ឈុន មានបញ្ហាភ្នែកដែលត្រូវការការពិនិត្យព្យាបាលពីគ្រូពេទ្យភ្នែកជាទៀងទាត់។
ប្រភពដដែលបន្ថែមថា កន្លងមក លោកបានដឹងពីបញ្ហានេះ នៅពេលលោកត្រូវបានអនុញ្ញាតឱ្យសួរសុខទុក្ខគាត់តាមទូរសព្ទ ប៉ុន្តែចំពោះការដែលគាត់ត្រូវទទួលបានការព្យាបាលដោយវះកាត់បែបណានោះ គឺលោកមិនទាន់ទទួលបានព័ត៌មានណាមួយនៅឡើយ។
លោកចាត់ទុកថា កង្វះការយកចិត្តទុកដាក់ថែទាំសុខភាពឱ្យបានដិតដល់ និងបញ្ហាអនាម័យក្នុងពន្ធនាគារ ជាដើមហេតុដែលនាំឱ្យបញ្ហាភ្នែករបស់លោក រ៉ុង ឈុន វិវត្តកាន់តែធ្ងន់ធ្ងរ។
លោកនិយាយថា៖ «បញ្ហាភ្នែកហ្នឹង ប្រសិននៅតែបន្តមិនទទួលបានការព្យាបាលយកចិត្តទុកដាក់ពីគ្រូពេទ្យ ហើយគាត់នៅតែជាប់ឃុំបន្តទៀត ហើយគិតថាបញ្ហាភ្នែកគាត់នឹងអាចវិវត្តកាន់តែធ្ងន់ធ្ងរ អាចនឹងប៉ះពាល់ទៅដល់ភ្នែកទាំងសងខាងផង។ អ៊ីចឹងហើយ គឺយើងបារម្ភ គឺបារម្ភខ្លាំងមែនទែន»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត លើកឡើងថា មណ្ឌលសុខភាពនៅតាមពន្ធនាគារ មិនមានបុគ្គលិកពេទ្យ សម្ភារ និងបរិក្ខារគ្រប់គ្រាន់សម្រាប់ពិនិត្យនិងព្យាបាលអ្នកជាប់ឃុំដែលមានចំនួនច្រើននោះទេ។ ដូច្នេះ លោកថា មន្រ្តីពន្ធនាគារគួរតែបញ្ជូនលោក រ៉ុង ឈុន ក៏ដូចជាអ្នកជាប់ឃុំណាដែលមានបញ្ហាសុខភាពទៅសម្រាកព្យាបាលនៅមន្ទីរពេទ្យទៅតាមវេជ្ជបញ្ជា ចៀសវាងការរិះគន់ពីមជ្ឈដ្ឋានផ្សេងៗ។
លោកមានប្រសាសន៍ថា៖ «បញ្ហាភ្នែកគឺជារឿងសំខាន់ដែរ អ៊ីចឹងហើយបានថានៅពេលដល់ថ្ងៃណាវះកាត់ហ្នឹង ខាងពន្ធនាគារត្រូវតែបញ្ជូនគាត់ឱ្យបានទាន់ពេលវេលា ក្នុងការពិនិត្យនិងការវះកាត់ភ្នែកគាត់។ ពីព្រោះជាធម្មតាទេ ទោះបីជាអ្នកជាប់ឃុំក៏ដោយ សិទ្ធិទទួលបានថែទាំសុខភាព ព្យាបាលផ្នែកសុខភាព គឺដូចជាពលរដ្ឋដទៃទៀតដែរ»។
សមាជិកក្រុមប្រឹក្សាឃ្លាំមើលកម្ពុជា និងជាប្រធានសហភាពសហជីពកម្ពុជា លោក រ៉ុង ឈុន ត្រូវបានសាលាដំបូងរាជធានីភ្នំពេញ កាត់ទោសកាលពីថ្ងៃទី១៨ ខែសីហា ឆ្នាំ២០២១ ឱ្យជាប់ពន្ធនាគាររយៈពេល២ឆ្នាំ ពីបទ «ញុះញង់ឱ្យមានភាពវឹកវរដល់សន្តិសុខសង្គម» បន្ទាប់ពីលោកត្រូវបានចាប់បញ្ជូនទៅឃុំខ្លួននៅពន្ធនាគារព្រៃសបានរយៈពេលប្រមាណ១៣ខែ៕
