អាជ្ញាធរបានឃាត់ខ្លួនមន្ត្រីនគរបាលផ្នែកកងអន្តរាគមន៍ម្នាក់ដែលបង្កការរងរបួសដល់ស្ត្រីម្នាក់បណ្តាលឱ្យបែកក្បាលធ្ងន់ធ្ងរ កាលពីយប់មិញនេះ។
លោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានប្រាប់ វីអូឌី នៅថ្ងៃព្រហស្បតិ៍នេះថា មន្ត្រីនគរបាលរូបនេះមានឈ្មោះ ម៉ាត់ ពិសី ជាមន្ត្រីអន្តរាគមន៍នៃអធិការដ្ឋាននគរបាលខណ្ឌ៧មករា ត្រូវបានឃាត់ខ្លួនហើយ ក្រោយរកឃើញថា បានយកអាយឌី (ID) វាយស្ត្រីម្នាក់ឱ្យរងរបួសបែកក្បាលធ្ងន់ធ្ងរ ហើយត្រូវបានមហាជនរិះគន់យ៉ាងខ្លាំងក្លា។
ប្រភពដដែលបន្តថា បើការស្រាវជ្រាវរកឃើញថា មន្ត្រីនគរបាលរូបនេះមានកំហុសមែននោះ មន្ត្រីនគរបាលរូបនេះនឹងត្រូវប្រឈមការអនុវត្តបន្តតាមនីតិវិធីច្បាប់ និងរងការអនុវត្តវិន័យរបស់កងកម្លាំងផងដែរ។ ដោយឡែក ចំពោះអ្នកបើកបរល្មើសច្បាប់ បើកបរគេចវេះពីសមត្ថកិច្ចនោះ លោកថា ក៏នឹងត្រូវអនុវត្តតាមច្បាប់ផងដែរ។
គួរបញ្ជាក់ជូនថា ការឃាត់ខ្លួនមន្ត្រីនគរបាលផ្នែកអន្តរាគមន៍នៃអធិការដ្ឋាននគរបាលខណ្ឌ៧មករា ឈ្មោះ ម៉ាត់ ពិសី រូបនេះ គឺបន្ទាប់ពីមានបទបញ្ជាពីលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បន្ទាប់ពីមានការរិះគន់ពីសកម្មភាពមិនល្អរបស់មន្ត្រីនគរបាលរូបនេះដែលយកអាយឌីវាយក្បាលស្ត្រីម្នាក់ជិះម៉ូតូគេចពីគោលដៅត្រួតពិនិត្យច្បាប់ចរាចរណ៍ កាលពីយប់មិញនេះ៕
