រដ្ឋាភិបាលសម្រេចកាត់ដី៣កន្លែង ស្ថិតនៅខេត្តចំនួន៣ផ្សេងគ្នាប្រគល់ទៅឱ្យប្រជាពលរដ្ឋ២២គ្រួសារ និងបញ្ជាការដ្ឋានអង្គរក្សអគ្គមេបញ្ជាការដ្ឋាននៃកងយោធពលខេមរភូមិន្ទនៃក្រសួងការពារជាតិ ដើម្បីធ្វើជាកម្មសិទ្ធិផ្ទាល់។
បើតាមអនុក្រឹត្យចុះថ្ងៃទី៣០ ខែមិថុនា ឆ្នាំ២០២១ និងទើបមានការផ្សព្វផ្សាយថ្មីៗនេះ លោកនាយករដ្ឋមន្ត្រី ហ៊ុន សែន បានសម្រេចកាត់ឆ្វៀលដីក្នុងទំហំ៤ហិកតា ស្ថិតនៅស្រុកព្រៃនប់ ខេត្តព្រះសីហនុ ចេញពីដែនគម្របព្រៃឈើឆ្នាំ២០០២ ដើម្បីធ្វើអនុប្រយោគជាដីឯកជនរបស់រដ្ឋ ប្រគល់ទៅឈ្មោះ ឡៅ អានី ធ្វើជាកម្មសិទ្ធិ។
មេឃុំបិតត្រាង លោក មាន ចាន់ បានប្រាប់ វីអូឌី នៅថ្ងៃនេះថា រដ្ឋាភិបាលពិតជាបានកាត់ដីប្រគល់ឱ្យអ្នកស្រី ឡៅ អានី មែន។ លោកបន្តថា ដីនៅក្នុងភូមិសាស្រ្តនោះក៏ធ្លាប់មានជម្លោះដីធ្លីយូរឆ្នាំណាស់មកហើយដែរ រវាងអ្នកស្រី ឡៅ អានី និងប្រជាពលរដ្ឋ។
លោកថា៖ «ពាក់ព័ន្ធនឹងភូមិសាស្រ្តតំបន់ខ្ញុំហ្នឹង ឃើញថាមិនទាន់បានចុះច្រើនទេ មួយចំនួនគាត់មានបណ្ណដាច់ដោយដុំ មួយចំនួនក៏អត់បានធ្វើដែរ។ អ៊ីចឹងវានៅចន្លោះប្រហោងច្រើន ដោយសារដីវានៅមានបណ្ណចេះតែមានបញ្ហាបន្តបន្ទាប់ អ៊ីចឹងហើយទំនាស់ដី វិវាទមានច្រើន បើនិយាយជាទូទៅ»។
ចំណែកនៅថ្ងៃទី០៦ ខែកក្កដា ឆ្នាំ២០២១ លោកនាយករដ្ឋមន្ត្រី ហ៊ុន សែន បានសម្រេចផ្ទេរការចុះបញ្ជីសារពើភណ្ឌទ្រព្យសម្បត្តិរដ្ឋរបស់រដ្ឋបាលឃុំព្រែករការ នូវដីទំហំជាង១១ហិកតា ស្ថិតនៅភូមិខ្នុរ ឃុំព្រែករការ ស្រុកកណ្ដាលស្ទឹង ខេត្តកណ្ដាល ដើម្បីប្រគល់ឱ្យបញ្ជាការដ្ឋានអង្គរក្ស អគ្គមេបញ្ជាការដ្ឋាន នៃកងយោធពលខេមរភូមិន្ទនៃក្រសួងការពារជាតិ ធ្វើការគ្រប់គ្រង។
អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការនៃបញ្ជាការដ្ឋានអង្គរក្ស លោក ហ៊ីង ប៊ុនហៀង បានលើកឡើងថា ប្រមុខរដ្ឋាភិបាលបានសម្រេចកាត់ដីទំហំ១១១ ២៨១មែត្រការ៉េ ប្រគល់ឱ្យជាសម្បត្តិរបស់ក្រសួងការពារជាតិ ដែលគ្រប់គ្រងដោយនាយកដ្ឋានអង្គរក្ស។
លោកថា៖ «ពីមុនជាដីរដ្ឋ ឥលូវប្រគល់ឱ្យក្រសួងការពារជាតិ ដែលគ្រប់គ្រងដោយបញ្ជាការដ្ឋានអង្គរក្ស សម្រាប់មធ្យោបាយបណ្ដុះបណ្ដាល»។
នៅថ្ងៃទី៩ ខែកក្កដា ឆ្នាំ២០២១ លោកនាយករដ្ឋមន្ត្រី ហ៊ុន សែន ក៏បានចេញអនុក្រឹត្យដាច់ដោយឡែកមួយទៀត បានសម្រេចកាត់ឆ្វៀលដីទំហំ៥៨,៨៤ហិកតា ចេញពីតំបន់ប្រើប្រាស់ដោយចីរភាពនៃឧទ្យានជាតិព្រះមុនីវង្ស (បូកគោ) កំណត់ជាតំបន់សហគមន៍ ដោយថា ដើម្បីប្រគល់ទៅប្រជាពលរដ្ឋធ្វើជាកម្មសិទ្ធិ។
បើតាមអនុក្រឹត្យដដែល ប្រជាពលរដ្ឋបានដីនោះមានចំនួន២២គ្រួសារ ដោយទទួលក្បាលដី២៤ក្បាលដី មានទីតាំងស្ថិតនៅឃុំកោះតូច ស្រុកទឹកឈូ ខេត្តកំពត។
មេឃុំកោះតូច លោក ឈូក ភូ មានប្រសាសន៍ថា តាមរយៈគម្រោងដីដែលរដ្ឋាភិបាលបានកាត់ឆ្វៀលនោះ លោកមិនទាន់ដឹងថាមានពលរដ្ឋណាខ្លះត្រូវទទួលបានដីនោះនៅឡើយ ខណៈពលរដ្ឋមួយចំនួនដែលនៅក្រៅឃុំកោះតូចនេះ ក៏មានសិទ្ធិទទួលដែរ។
លោកថា៖ «ការកំណត់ឱ្យប្រជាពលរដ្ឋប៉ុន្មានគ្រួសារ ដែលបានកាត់ជូនគាត់ យើងអត់ទាន់ដឹងចំនួន អ៊ីចឹងយើងអត់មានអីថែមលើសពីនេះទេ។ ដល់ពេលសម្ដេចឱ្យឈ្មោះ ឧទាហរណ៍ ២០នាក់អ៊ីចឹង ហើយកាត់ឆ្វៀល សម្ដេចឱ្យជាកម្មសិទ្ធិ១០នាក់អ៊ីចឹង យើងអាចទាក់ទងគ្នាបាន ហើយពេលខ្ញុំទទួលបានដំណឹងនេះ ខ្ញុំនឹងជម្រាបជូនទៅវិញ»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មានប្រសាសន៍ថា លោកស្រីមិនជំទាស់ចំពោះការផ្ដល់ដីជូនប្រជាពលរដ្ឋឡើយ ប៉ុន្តែស្នើរដ្ឋាភិបាលបង្ហាញព័ត៌មានដល់ប្រជាពលរដ្ឋឱ្យបានដឹងពីហេតុផលឱ្យបានច្បាស់លាស់។ ជាមួយគ្នានេះដែរ លោកស្រីកត់សម្គាល់ដែរថា កន្លងមក លោកស្រីសង្កេតឃើញថា ដីដែលកាត់នោះភាគច្រើនប្រគល់ឱ្យបុគ្គលមានអំណាចច្រើនជាងពលរដ្ឋ។
លោកស្រី ចក់ សុភាព ថា៖ «ការផ្ដល់កម្មសិទ្ធិណាមួយត្រូវមានបង្ហាញតម្លាភាពដែរ ត្រូវបង្ហាញឱ្យសាធារណជនបានដឹង ថាហេតុអ្វីបានបុគ្គលឬសហគមន៍ណាមួយគាត់ទទួលបានផលប្រយោជន៍ពីការអនុប្រយោគហ្នឹង ព្រោះកន្លងមក យើងឃើញហើយភាគច្រើន គឺបន្ទាប់ពីអនុប្រយោគហើយជាឯកជន និងភាគច្រើនអ្នកមានអំណាចមួយចំនួនច្រើនទទួលបាន។ អ៊ីចឹងអាជ្ញាធរមានកាតព្វកិច្ចក្នុងការបង្ហាញឱ្យសាធារណជនយល់ថា ការបំប្លែងដីសម្បត្តិសាធារណៈ ហើយដីខ្លះជាតំបន់ការពារទៀត ថាតើវាបាត់បង់គុណនៃផលប្រយោជន៍សាធារណៈបែបណា បានជាអាជ្ញាធរលោកត្រូវធ្វើការផ្លាស់ប្ដូរ។ ទី២ បុគ្គលដែលទទួលបានសិទ្ធិជាបន្តបន្ទាប់ហ្នឹង តើគាត់ចូលរួមចំណែកបែបណា ឬមូលហេតុអ្វីបានជាអាជ្ញាធរប្រគល់សិទ្ធិឱ្យពួកគាត់ហ្នឹង កន្លែងហ្នឹងសំខាន់ណាស់»។
កាលពីថ្ងៃទី៨ ខែឧសភា ឆ្នាំ២០២០ លោកនាយករដ្ឋមន្ត្រី ហ៊ុន សែន បានសម្រេចកាត់ផ្ទៃដីទំហំ១២ ០១៦ (ដប់ពីរពាន់ ដប់ប្រាំមួយ) ហិកតា ចេញពីតំបន់ប្រើប្រាស់ដោយចីរភាពនៃតំបន់ឧទ្យានជាតិព្រះមុនីវង្ស «បូកគោ» ក្នុងភូមិសាស្រ្តខេត្តកំពត និងខេត្តព្រះសីហនុ ប្រគល់ទៅឱ្យក្រុមហ៊ុន សុខា អូតែល ដើម្បីធ្វើការអភិវឌ្ឍ៕
