គិតមកដល់ថ្ងៃទី៩ ខែកញ្ញា ឆ្នាំ២០២១នេះ ក្រសួងសុខាភិបាលបានរកឃើញអ្នកឆ្លងវីរុសកូវីដ-១៩បំប្លែងថ្មី ប្រភេទ B.1.617.2 (Delta) ចំនួន៣ ៧៣១នាក់ ក្នុងនោះមានស្រី១ ៩០៤នាក់។
យោងតាមសេចក្ដីប្រកាសព័ត៌មានរបស់ក្រសួងសុខាភិបាលស្ដីពីបច្ចុប្បន្នភាពវីរុសកូវីដ-១៩ បំប្លែងថ្មី ដែលតា (Delta) បានឱ្យដឹងថា កម្ពុជាបានរកឃើញអ្នកជំងឺកូវីដ-១៩ បំប្លែងថ្មី ដែលតា (Delta) ជាលើកដំបូង នៅថ្ងៃទី៣១ ខែមីនា ដោយការវិភាគរកវីរុសពីវិទ្យាស្ថានប៉ាស្ទ័រកម្ពុជា ហើយបើគិតមកដល់ថ្ងៃទី៩ ខែកញ្ញា ករណីឆ្លងបានកើនដល់៣ ៧៣១នាក់។
ក្រសួងបន្តថា វីរុសបំប្លែងថ្មីនេះបានឆ្លងទៅលើអ្នកដំណើរមកពីបរទេសតាមជើងហោះហើរ ពលករដែលត្រលប់មកពីប្រទេសថៃនិងប្រទេសវៀតណាម ប្រជាជនអ្នកភូមិក្នុងសហគមន៍ ក្រុមហ៊ុនឯកជន និងបុគ្គលិកសុខាភិបាល ជាដើម។
សេចក្ដីប្រកាសព័ត៌មានដដែលបានរកឃើញទៀតថា រាជធានី-ខេត្តដែលមានចំនួនអ្នកឆ្លងច្រើនជាងគេ រួមមាន រាជធានីភ្នំពេញ មានចំនួន១ ២៥៦នាក់ ខេត្តបន្ទាយមានជ័យ មាន៨២៧នាក់ និងខេត្តឧត្តរមានជ័យ មាន២៨៧នាក់ រួមនឹងបណ្តាខេត្តផ្សេងៗទៀតសរុប២៤រាជធានី-ខេត្ត។ ចំណែកឯខេត្តកែប ក្រសួងថា នៅមិនទាន់រកឃើញករណីវីរុសកូវីដ-១៩ បំប្លែងថ្មី ដែលតា (Delta) នៅឡើយទេ។
នៅថ្ងៃនេះដែរ ក្រសួងសុខាភិបាលបានចេញសេចក្ដីជូនដំណឹងស្ដីពីការសរុបស្ថានភាពជំងឺកូវីដ-១៩ ដោយរកឃើញថា ករណីឆ្លងសរុបឈានដល់៩៨ ១៨៤នាក់ ករណីឆ្លងថ្មី៦៦០នាក់ ករណីស្លាប់ថ្មី១២នាក់ ដែលធ្វើឱ្យករណីស្លាប់សរុបកើនឡើង២ ០១៩នាក់៕