សាលារៀនមួយចំនួននៅរាជធានីភ្នំពេញកំពុងរៀបចំជាបណ្តើរៗហើយ ដើម្បីត្រៀមទទួលសិស្សចូលរៀនឡើងវិញនៅថ្ងៃទី១៥ ខែកញ្ញាខាងមុខ។
ការរៀបចំនេះបានធ្វើឡើងបន្ទាប់ពីរដ្ឋបាលរាជធានីភ្នំពេញ កាលពីថ្ងៃម្សិលមិញ បានប្រកាសឱ្យគ្រឹះស្ថានសិក្សាចំនួនជាង២០០បើកដំណើការបង្រៀនឡើងវិញ ចាប់ពីកម្រិតអនុវិទ្យាល័យដល់វិទ្យាល័យ (ថ្នាក់ទី៧ ដល់ទី១២) ដែលមានសិស្សប្រមាណជាង១៣ម៉ឺននាក់។
នាយកវិទ្យាល័យជាស៊ីមបឹងកេងកង លោក នុត ងួនលី ប្រាប់ វីអូឌី នៅថ្ងៃសុក្រនេះថា វិទ្យាល័យនេះបានត្រៀមរួចរាល់អស់ហើយសម្រាប់ការបើកដំណើរការសាលារៀនឡើងវិញ ក្នុងនោះ សាលាបានបាញ់ថ្នាំសម្លាប់មេរោគ សម្អាតបរិស្ថាន និងរៀបចំថ្នាក់រៀន ជាដើម។
លោកថា៖ «[ត្រៀមបើកសាលា] ទាន់តើក្មួយ! ទាន់! យើងរៀបរួចអស់ហើយ ព្រោះយើងបានបាញ់ថ្នាំសម្លាប់មេរោគ យើងបានសម្អាតបរិស្ថានអស់ហើយ បន្ទប់រៀនក៏យើងរៀបអស់ហើយ»។
លោក នុត ងួនលី បន្ថែមថា សម្រាប់ការរៀបចំឱ្យសិស្សចូលរៀននៅវិទ្យាល័យនេះ ក្រុមការងារបានចាត់ចែងមួយបន្ទប់មានសិស្ស១៥នាក់ ខណៈសាលានេះមានសិស្សសរុបពីថ្នាក់ពី៧ដល់ទី១២ ចំនួន៧៦៦នាក់។ លោកថា ពីមុន សិស្សទាំងអស់ត្រូវបានបែងចែកជា២៤ថ្នាក់ តែបច្ចុប្បន្នបំបែកទៅជា៤៨ថ្នាក់។
លោកស្រី ឡុង បូណារ៉េត អភិបាលរងខេត្តកំពង់ស្ពឺ មានប្រសាសន៍ថា រដ្ឋបាលខេត្តត្រៀមជាស្រេចហើយក្នុងការបើកដំណើរការសាលារៀនឡើងវិញនេះ ដោយរង់ចាំតែថ្ងៃប្រកាសបើកបវេសនកាលពីក្រសួងអប់រំតែប៉ុណ្ណោះ។
លោកស្រីថា៖ «សម្រាប់ការបើកដំណើរការសាលារៀនឡើងវិញ យើងបានត្រៀមផែនការរួចជាស្រេចពីចម្ងាយហើយ ដោយសារតែគណៈកម្មាធិការខេត្តប្រយុទ្ធប្រឆាំងជំងឺកូវីដ-១៩ បានរៀបចំកិច្ចប្រជុំមួយកាលថ្ងៃទី១ ខែកញ្ញានេះ។ យើងបានសិក្សាទៅលើលទ្ធភាពការបើក ថាតើត្រូវបើកយ៉ាងម៉េចដើម្បីធានាសុវត្ថិភាព ពីព្រោះសាលាទាំងអស់នោះផ្ទុកអ្នកជំងឺ [កូវីដ-១៩] ដូច្នេះ វាអាចមានមេរោគ»។
លោកស្រីបញ្ជាក់ថា មន្ត្រីពាក់ព័ន្ធត្រូវសម្អាតបរិស្ថាន ដោយមានអ្នកជំនាញចុះបាញ់ថ្នាំសម្លាប់មេរោគ ដើម្បីធានាសុវត្ថិភាពសិស្ស ព្រមទាំងលោកគ្រូ-អ្នកគ្រូផងដែរ។ លោកស្រីបន្តថា ក្នុងខេត្តនេះ សាលារៀននៅសេសសល់មិនទាន់អាចដំណើរការឡើងវិញបាន មានតិចតួចប៉ុណ្ណោះ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា នៅមិនទាន់អាចបូកសរុបបាននៅឡើយទេពីចំនួនសាលារៀននៅតាមបណ្តារាជធានី-ខេត្តដែលត្រូវបើកដំណើរការឡើងវិញនេះ។
លោកថា៖ «សម្រាប់ពេលនេះ ខ្ញុំសូមស្នើយោងខ្លឹមសារលិខិតលេខ៤៦ ចុះថ្ងៃ៣១ សីហា ២០២១។ សូមជម្រាបសួរផ្ទាល់ទៅគ្រឹះស្ថានសិក្សា មន្ទីរអប់រំ យុវជន និងកីឡា និងគណៈអភិបាលរាជធានីខេត្តពាក់ព័ន្ធ»។
លោក រស់ សុវាចា បន្ថែមថា ដើម្បីអាចបើកសាលារៀនបាន មន្ទីរអប់រំ យុវជន និងកីឡា រាជធានី-ខេត្ត ត្រូវពិភាក្សាជាមួយគណៈអភិបាលរាជធានី-ខេត្ត ដើម្បីជ្រើសរើសសាលាមត្តេយ្យសិក្សា សាលាបឋមសិក្សា អនុវិទ្យាល័យ និងវិទ្យាល័យ ដែលមានលទ្ធភាពបើកដំណើរការឡើងវិញ។ ក្នុងនោះ ត្រូវមានការវាយតម្លៃ និងជ្រើសរើសគ្រឹះស្ថានសិក្សាដែលត្រូវបើកដំណើរការឡើងវិញ ដោយត្រូវរៀបចំការរៀននិងបង្រៀន ត្រូវរៀបចំជាផែនការឱ្យបានច្បាស់លាស់ ដោយមានការអនុម័តពីអាជ្ញាធររាជធានី-ខេត្ត រួចផ្ញើមកក្រសួង ដើម្បីបូកសរុប។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានសរសេរនៅលើទំព័រហ្វេសប៊ុករបស់លោកកាលពីថ្ងៃម្សិលមិញថា គ្រឹះស្ថានសិក្សាទូទាំងរាជធានីភ្នំពេញចំនួនជាង២០០ ចាប់ពីកម្រិតអនុវិទ្យាល័យដល់វិទ្យាល័យ (ថ្នាក់ទី៧ ដល់ទី១២) នឹងបើកទ្វារឡើងវិញទទួលសិស្សានុសិស្សជាង១៣ម៉ឺននាក់ចូលរៀន នៅថ្ងៃទី១៥ ខែកញ្ញា ខាងមុខនេះ ខណៈសាលារៀននៅតាមបណ្តាខេត្តមួយចំនួននៅមិនទាន់ប្រកាសពីកាលបរិច្ឆេទជាក់លាក់នៅឡើយទេ៕
