តំណាងអយ្យការអមតុលាការក្រុងភ្នំពេញបានសម្រេចបើកការស៊ើបសួរលើមន្ត្រីនគរបាលអន្តរាគមន៍ខណ្ឌ៧មករាម្នាក់ពីបទហិង្សាដោយចេតនាមានស្ថានទម្ងន់ទោសលើស្ត្រីម្នាក់កាលពីយប់ថ្ងៃទី៨ ខែកញ្ញា ខណៈស្ត្រីរងគ្រោះក៏រងការចោទប្រកាន់ពីបទល្មើសច្បាប់ចរាចរណ៍ផងដែរ។
អ្នកនាំពាក្យអយ្យការអមសាលាដំបូងរាជធានីភ្នំពេញលោក ប្លង់ សុផល បានប្រាប់វីអូឌីតាមប្រព័ន្ធតេឡេហ្គ្រាមនៅយប់ថ្ងៃទី១០ ខែកញ្ញាថា ករណីមន្ត្រីនគរបាលបង្កហិង្សានេះ ត្រូវបានតំណាងអយ្យការបើកការស៊ើបសួរពីបទហិង្សាដោយចេតនាមានស្ថានទម្ងន់ទោស។
ចំណែកស្ត្រីរងគ្រោះដែលជិះម៉ូតូល្មើសច្បាប់ចរាចរណ៍វិញ លោកថា ត្រូវបានតំណាងអយ្យការបើកការស៊ើបសួរពីបទបើកបរយានយន្តមិនព្រមបញ្ឈប់តាមបញ្ជារបស់មន្រ្តីនគរបាលចរាចរណ៍ តាមបញ្ញត្តិមាត្រា ២២១ នៃក្រមព្រហ្មទណ្ឌ និងមាត្រា ៧៦ នៃច្បាប់ស្តីពីចរាចរណ៍ផ្លូវគោក។
អាជ្ញាធររាជធានីភ្នំពេញកាលពីថ្ងៃម្សិលមិញ បានបញ្ជូនខ្លួនមន្ត្រីនគរបាលផ្នែកកងអន្តរាគមន៍ខណ្ឌ៧មករាម្នាក់ឈ្មោះ ម៉ាត់ ពិសី ទៅកាន់សាលាដំបូងរាជធានីភ្នំពេញ ក្រោយពីសម្របសម្រួលជាមួយនារីរងគ្រោះមិនត្រូវគ្នា។
កញ្ញា ងន ស្រីនិច្ច ដែលត្រូវជាជនរងគ្រោះនៅតែទាមទារឱ្យមានយុត្តិធម៌សមរម្យសម្រាប់នាង។ យុត្តិធម៌ដែលកញ្ញា ងន ស្រីនិច្ច ប្រាថ្នាចង់បាននោះ គឺចង់ឱ្យមានការផ្តល់សំណងខ្លះសម្រាប់ព្យាបាលក្បាលដែលរងរបួសធ្ងន់ ព្រោះមិនដឹងថា មានផលប៉ះពាល់អ្វីខ្លះទៅថ្ងៃអនាគត ព្រមទាំងសំណងផ្សេងទៀត ដើម្បីឱ្យសមនឹងកិត្តិយសស្ត្រីម្នាក់ ដែលត្រូវបានមន្ត្រីនគរបាលវាយនៅទីសាធារណៈ។
លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការលីកាដូ មានប្រសាសន៍កាលពីថ្ងៃសុក្រម្សិលមិញថា ជាធម្មតាសាម៉ីខ្លួនតែងតែមានការដោះសាររៀងៗខ្លួន។ បែបនេះក្តី លោកថា តាមផ្លូវច្បាប់ស្ថាប័នមានសមត្ថកិច្ចជាពិសេសទាក់ទងនឹងបទល្មើសហិង្សាដោយចេតនា មន្ត្រីនគរបាលជំនាញមានសិទ្ធិក្នុងការស៊ើបអង្កេត ខណៈនៅកន្លែងកើតហេតុមានសាក្សី និងកាម៉េរាសុវត្ថិភាពច្រើនណាស់ដែលអាចជាភស្តុតាង។
លោកបន្តថា៖ «ចឹងបើសិនជានិយាយពីបញ្ហាផ្លូវច្បាប់ បើគាត់ [មន្ត្រីនគរបាល] បង្ករបួសស្នាមដោយគេហៅថាបទហិង្សាដោយចេតនា ឬហិង្សាដោយចេតនាមានស្ថានទម្ងន់ទោស អាហ្នឹងគាត់ជាប់ទោសពី ២ទៅ ៥ឆ្នាំអីចឹងទៅ។ អាហ្នឹង គឺជារឿងតាមផ្លូវច្បាប់ អាស្រ័យទៅលើការស៊ើបអង្កេតឃើញ»។
លោកថា រឿងនេះមានមហាជនច្រើនណាស់កំពុងតាមដានពីលទ្ធផលនៃការអនុវត្តច្បាប់ពីសំណាក់អាជ្ញាធរ និងបង្ហាញសុទិដ្ឋិនិយមថា ស្ថាប័នពាក់ព័ន្ធនឹងមិនអាចឱ្យបុគ្គលមួយរូប ធ្វើឱ្យខូចដល់បុគ្គល ឬសមត្ថកិច្ចដែលធ្វើបានត្រឹមត្រូវនោះទេ។ គួរបញ្ជាក់ជូនថា ការបញ្ជូនខ្លួនមន្ត្រីនគរបាលផ្នែកអន្តរាគមន៍នៃអធិការដ្ឋាននគរបាលខណ្ឌ៧មករាឈ្មោះ ម៉ាត់ ពិសី ទៅតុលាការនេះ គឺបន្ទាប់ពីមានបទបញ្ជាពីលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ ក្រោយពីមានការរិះគន់ពីសកម្មភាពមិនល្អរបស់មន្ត្រី នគរបាលរូបនេះ យកអាយឌី វាយក្បាលស្ត្រីម្នាក់កំពុងជិះម៉ូតូគេចពីគោលដៅត្រួតពិនិត្យច្បាប់ចរាចរណ៍ កាលពីយប់ថ្ងៃទី៨ កញ្ញា៕