ក្រសួងសុខាភិបាល អំពាវនាវនិងក្រើនរម្លឹកដល់ប្រជាពលរដ្ឋឱ្យមានការប្រុងប្រយ័ត្នបន្ថែម និងការពារខ្លួនពីការឆ្លងវីរុសកូវីដ-១៩ បន្ទាប់ពីប៉ុន្មានថ្ងៃនេះ ករណីឆ្លងបានហក់ឡើងបន្តិចនៅតាមបណ្ដាខេត្តមួយចំនួន ជាពិសេសនៅតាមទីផ្សារលក់ដូរ។
យោងតាមសេចក្ដីជូនដំណឹងរបស់ក្រសួងសុខាភិបាល ចុះថ្ងៃទី១៣ ខែកញ្ញា ឆ្នាំ២០២១ បានលើកឡើងថា ក្នុងរយៈពេលប៉ុន្មានថ្ងៃចុងក្រោយនេះ ក្រសួងសង្កេតឃើញចំនួនករណីឆ្លងជំងឺកូវីដ-១៩ មានការហក់ឡើងបន្តិចនៅតាមបណ្តាខេត្តមួយចំនួន ក្នុងនោះ ភាគច្រើនបានកើតឡើងនៅទីផ្សារលក់ដូរដែលមិនមែនជាផ្សារទំនើប គឺផ្សារលក់ដូរនៅតាមបណ្តាខេត្តក្រុង ភូមិ និងទីប្រជុំជន ជាដើម។
ករណីនេះ ក្រសួងបានអំពាវនាវឱ្យប្រជាពលរដ្ឋទាំងអស់កុំទាន់មានអារម្មណ៍ស្កប់ស្កល់ និងកុំមានការពឹងផ្អែកទាំងស្រុងទៅលើវ៉ាក់សាំង។
ក្រសួងក៏បានក្រើនរម្លឹកដល់ប្រជាពលរដ្ឋទាំងអស់ចូលរួមទប់ស្កាត់ការចម្លងវីរុសកូវីដ-១៩ ដោយបុគ្គល គ្រួសារ សហគមន៍ អាជ្ញាធរមូលដ្ឋាន ត្រូវបង្កើនការប្រុងប្រយ័ត្នខ្ពស់និងអនុវត្តឱ្យបានខ្ជាប់ខ្ជួននូវវិធានការ ៣ការពារ (ពាក់ម៉ាស់ លាងដៃឱ្យញឹកញាប់ និងរក្សាគម្លាតសុវត្ថិភាព) និង៣កុំ (កុំទៅកន្លែងមានមនុស្សច្រើន កុំទៅកន្លែងបិទជិតគ្មានខ្យល់ចេញចូល កុំប៉ះពាល់ កុំចាប់ដៃគ្នា កុំកៀកស្មាគ្នា) ព្រមទាំងយកចិត្តទុកដាក់តាមដានការអនុវត្តវិធានការសុខាភិបាលនៅតាមទីតាំងនានា ជាពិសេសទីតាំងមានហានិភ័យខ្ពស់ ជាដើម។
តាមរយៈអង្គការសុខភាពពិភពលោក បានចុះផ្សាយកន្លងមកថា៖ «វ៉ាក់សាំងមានប្រសិទ្ធភាពការពារយើងមិនឱ្យឈឺធ្ងន់ធ្ងរដែលតម្រូវឱ្យសម្រាកពេទ្យ និងកាត់បន្ថយហានិភ័យនៃការស្លាប់ដោយជំងឺកូវីដ-១៩ ដោយបង្ការបុគ្គលកើតជំងឺកូវីដ-១៩ធ្ងន់ធ្ងរ និងកាត់បន្ថយហានិភ័យនៃការស្លាប់ដោយជំងឺនេះ»។
បន្ថែមពីនេះ អង្គការសុខភាពពិភពលោកបានចុះផ្សាយទៀតថា៖ «ទោះបីជាបានចាក់វ៉ាក់សាំងការពារវីរុសកូវីដ-១៩ រួចហើយក៏ដោយ ក៏បុគ្គលគ្រប់រូបត្រូវអនុវត្តវិធានការសុខាភិបាលជាចាំបាច់ ដើម្បីបង្ការការឆ្លងវីរុសកូវីដ-១៩ ចូលក្នុងខ្លួន គ្រួសារ និងសហគមន៍»។
គិតចាប់តាំងពីដើមឆ្នាំ២០២០ មកដល់ថ្ងៃម្សិលមិញ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១០០ ១៣៣នាក់ ក្នុងនោះ អ្នកជំងឺព្យាបាលជាសះស្បើយចំនួន៩៤ ៣២៦នាក់ អ្នកស្លាប់កើនដល់ចំនួន២ ០៤៩នាក់ និងករណីនាំចូលពីក្រៅប្រទេសចំនួន១៧ ០៣៣នាក់។
ចំណែកឯករណីកូវីដ-១៩ នៅលើពិភពលោកវិញ កើនដល់ជាង២២០,៥លាននាក់ ក្នុងនោះ អ្នកស្លាប់ជាង៤,៥លាននាក់៕