សហជីពឱ្យដឹងថា ភាគីនិយោជិកបានស្នើសុំបន្ថយប្រាក់ឈ្នួលគោលកម្មករ៨,៦ដុល្លារនៅឆ្នាំក្រោយ ក្រោមហេតុផលវិបត្តិកូវីដ-១៩ និងបញ្ហាផ្សេងទៀត ខណៈក្រុមសហជីពស្នើសុំដំឡើងជាង២២ដុល្លារ។
ប្រធានសហភាពការងារកម្ពុជា លោក អាត់ ធន់ ប្រាប់ វីអូឌី នៅថ្ងៃពុធនេះថា ក្នុងកិច្ចប្រជុំលើកទី២ អំពីការចរចាប្រាក់ឈ្នួលអប្បបរមារបស់កម្មករនិយោជិតផ្នែកវាយនភណ្ឌកាត់ដេរ និងស្បែកជើង សម្រាប់ឆ្នាំ២០២២ កាលពីថ្ងៃម្សិលមិញនេះ ភាគីនិយោជកបានស្នើសុំបន្ថយប្រាក់ឈ្នួលកម្មករពី ១៩២ដុល្លារ មកនៅត្រឹម ១៨៣,៤ដុល្លារ ពោលគឺសុំបន្ថយ ៨,៦ដុល្លារ សម្រាប់ឆ្នាំ២០២២។
លោកបន្តថា ការសុំបន្ថយប្រាក់ឈ្នួលគោលកម្មករនេះ ភាគីនិយោជកបានលើកហេតុផលថា បញ្ហាវិបត្តិជំងឺកូវីដ-១៩ បានធ្វើថៅកែចំណាយច្រើនជាមុន និងមានបញ្ហាជាមួយការបញ្ជាទិញជាដើម។
លោក អាត់ ធន់ បានលើកឡើងទៀតថា ប្រសិនបើគ្មានការដំឡើង និងមានការបន្ថយប្រាក់ឈ្នួលមែននោះ នឹងធ្វើឱ្យកម្មករជួបការលំបាកកាន់តែខ្លាំង ខណៈបច្ចុប្បន្ន កម្មករបាននិងកំពុងជួបការលំបាករួចទៅហើយ ដោយសារវិបត្តិជំងឺកូវីដ-១៩ និងការកាត់បន្ថយអត្ថប្រយោជន៍ជាច្រើនរបស់ពួកគេនាពេលកន្លងមក។
លោកបន្ថែមថា៖ «ក្នុងស្ថានភាពនេះ បើប្រាក់ឈ្នួលកម្មករបានឡើងក្នុងរង្វង់ជាង២០០ដុល្លារ វាជាប្រការមួយល្អ បើទោះនិយោជកគេថាមិនសមក៏ដោយ។ បើតិចជាងហ្នឹង មិនដឹងយកម៉េចកើតដែរ! ហើយមួយរយៈចុងក្រោយនេះ គឺថ្ងៃឈប់សម្រាកប្រចាំឆ្នាំ ថ្ងៃសម្រាកបុណ្យជាតិផ្សេងៗ បូកនឹងអត្ថប្រយោជន៍ជិត១០ថ្ងៃ ដែលកម្មករយើងត្រូវបានខាតដោយសារតែរដ្ឋាភិបាលបានកាត់ ដែលនេះហើយផលចំណេញបានទៅនិយោជក ហើយបើប្រាក់ឈ្នួលមិនបានឡើងទៀត កម្មករមានទុក្ខជាន់លើទុក្ខហើយ»។
លោកបន្ថែមថា បើយោងទៅតាមលក្ខណៈវិនិច្ឆយ៧យ៉ាង ដូចជា ស្ថានភាពចំណាយរបស់កម្មករមានការកើនឡើង ការកើនឡើងទំនិញទីផ្សារ បញ្ហាផលិតភាពមានការកើនឡើង ការនាំចេញមានភាពល្អប្រសើរជាងឆ្នាំមុន និងហេតុផលផ្សេងៗទៀត កម្មករគួរទទួលបានប្រាក់ឈ្នួលក្នុងរង្វង់ជាង២០០ដុល្លារនៅឆ្នាំ២០២២។
វីអូឌី មិនអាចសុំការឆ្លើយតបពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានទេ ពាក់ព័ន្ធករណីនេះ។
អគ្គលេខាធិការសមាគមរោងចក្រកាត់ដេរនៅកម្ពុជា លោក ខេន លូ មានប្រសាសន៍ថា វិបត្តិជំងឺកូវីដ-១៩បានធ្វើឱ្យថៅកែខាតបង់ប្រាក់យ៉ាងច្រើន ដែលពិបាកក្នុងការដំឡើងប្រាក់ឈ្នួលជូនកម្មករនៅឆ្នាំក្រោយ។
លោកបន្តថា ការចំណាយរបស់ថៅកែមានការកើនឡើង ដោយសាររោងចក្រនីមួយៗត្រូវការទិញអាល់កុល ម៉ាស់ និងចំណាយផ្សេងៗទៀត ខណៈចំណូលបានពីការបញ្ជាទិញពុំមានការកើនឡើងនោះឡើយ។
លោកបន្ថែមថា៖ «បើមើលតាមរូបមន្តទាំង៧រូបមន្ត ហើយយោងតាមស្ថិតិផ្លូវការ យើងឃើញរបាយការណ៍ត្រូវដក ១,៥ភាគរយ ទោះបីថាប្រាក់ចំណេញក្នុងវិស័យយើង គាត់យល់ឃើញថាប្រាក់ចំណេញកើនឡើងឆ្នាំហ្នឹង ប៉ុន្តែប្រាក់ចំណូលដែលបានបញ្ជាទិញ អត់មានការកើនឡើងទេ។ ហើយចំណាយពួកយើង អ្នកណាក៏ដឹងថា ចំណាយរបស់ពួកយើងត្រូវកើនឡើងដែរ មកពីត្រូវទិញអាល់កុល ត្រូវទិញម៉ាស់ ត្រូវទិញទាំងកេស។ សួរថានៅពេលចំណាយកើនឡើង ហើយចំណូលមិនកើនឡើង តើយើងមានលទ្ធភាពណាដំឡើងប្រាក់ឈ្នួលជូនកម្មករ»។
លោក ស៊ឹម បុរី ជាកម្មករផ្នែកត្រួតពិនិត្យ បម្រើការងារនៅរោងចក្រមួយក្នុងរាជធានីភ្នំពេញ មានប្រសាសន៍ថា ប្រសិនបើនៅឆ្នាំក្រោយ ប្រាក់ឈ្នួលកម្មករមិនត្រូវបានដំឡើងឬត្រូវកាត់បន្ថយនោះ រូបលោកនិងកម្មករក្នុងចំនួនច្រើនទៀតនឹងជួបការលំបាកលើការចំណាយ ខណៈពួកគាត់ត្រូវការថវិកាច្រើនសម្រាប់បង់ថ្លៃទឹកភ្លើង បន្ទប់ជួល ផ្ញើជូនឪពុកម្តាយនៅស្រុក ការចំណាយខ្លួនឯងប្រចាំថ្ងៃ និងបង់សងធនាគារប្រចាំខែ ជាដើម។
កម្មកររូបនេះបានអំពាវនាវដល់រដ្ឋាភិបាលនិងភាគីពាក់ព័ន្ធធ្វើយ៉ាងណាជួយដំឡើងប្រាក់ឈ្នួលជូនកម្មករឱ្យបានសមរម្យនៅឆ្នាំ២០២២ ដើម្បីឱ្យពួកគេមានថវិកាសម្រាប់ដោះស្រាយជីវភាពបានស្រួល។
លោកបន្ថែមថា៖ «១៩២ដុល្លារ ចាយសឹងថាមិនគ្រប់ផង ចុះទម្រាំដកជាង៨ដុល្លារទៀត អាហ្នឹងកម្មកររឹតតែវ័ណ្ឌកឡើងហើយ។ ដោយសារបញ្ហាកូវីដនេះ កម្មករជួបការលំបាកមែនទែន ដូចជា ផ្ទះជួលមិនចុះថ្លៃ ទឹកភ្លើង ថ្នាំពេទ្យ និងម្ហូបអាហារឡើងថ្លៃ អ៊ីចឹងកម្មករជួបបញ្ហាច្រើន។ ហើយបច្ចុប្បន្ន កម្មករចូល៨០ទៅ៩០ភាគរយហើយដែលជំពាក់ធនាគារ»។
អ្នកគ្រប់គ្រងកម្មវិធីការងារនៅមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក ឃុន ថារ៉ូ មានប្រសាសន៍ថា យន្តការដំឡើងប្រាក់ឈ្នួលជូនកម្មករនៅកម្ពុជានៅពុំទាន់មានតម្លាភាពនិងប្រសិទ្ធភាពនៅឡើយទេ ដោយសារសមាជិកនៅក្នុងក្រុមប្រឹក្សាជាតិប្រាក់ឈ្នួលអប្បបរមាភាគច្រើនជាសហជីពគាំទ្ររដ្ឋាភិបាល។
លោក ឃុន ថារ៉ូ បន្តថា ការដំឡើងប្រាក់ឈ្នួលកម្មករនៅកម្ពុជា ធ្វើឡើងតាមយន្តការនយោបាយ គឺមិនបានកើតចេញពីការសិក្សាស្រាវជ្រាវទៅលើកត្តាសង្គមនិងសេដ្ឋកិច្ចនាពេលបច្ចុប្បន្នឡើយ។ លោកថា បើពិនិត្យមើលលើកត្តាទាំង២នេះ ប្រាក់ឈ្នួលជាង២០០ដុល្លារ មិនទាន់ធានាដល់ជីវភាពរស់នៅសមរម្យសម្រាប់កម្មករនៅឡើយទេ។
លោកបន្ថែមថា៖ «បើយើងនិយាយពីប្រាក់ឈ្នួលអប្បបរមា គឺជាប្រាក់ឈ្នួលដែលធានាឱ្យមានការរស់នៅសមរម្យនិងសេចក្តីថ្លៃថ្នូរក្នុងនាមជាកម្មករនិយោជិត។ អ៊ីចឹងបើពិនិត្យទៅលើសង្គមសេដ្ឋកិច្ចនាពេលបច្ចុប្បន្ននេះ ប្រាក់ឈ្នួលនេះ [ប្រាក់ជាង២០០ដុល្លារ] គឺមិនទាន់ទៅដល់ប្រាក់ឈ្នួលដែលធានាបានការរស់នៅសមរម្យសម្រាប់កម្មករនៅឡើយទេ។ ខ្ញុំគិតថា ចរន្តនៃវិស័យវាយនភណ្ឌកាត់ដេរនិងផលិតស្បែកជើងនាពេលបច្ចុប្បន្ននេះ វានៅតែមានលទ្ធភាពក្នុងការដំឡើងប្រាក់ឈ្នួលជូនកម្មករនៅឆ្នាំ២០២២»។
ក្នុងដំណើរការចរចាប្រាក់ឈ្នួលអប្បបរមារបស់កម្មករនិយោជិតផ្នែកវាយនភណ្ឌកាត់ដេរ និងផលិតស្បែកជើង សម្រាប់ឆ្នាំ២០២២ គឺក្រុមសហជីពបានស្នើសុំដំឡើងជូនកម្មករពី ១៩២ដុល្លារ ដល់ ២១៤,២ដុល្លារ។ យ៉ាងណា ការចរចាប្រាក់ឈ្នួលនេះមិនទាន់សម្រេចថាបានប៉ុន្មាននៅឡើយទេ ដោយភាគទីទាំង៣ មានតំណាងរដ្ឋាភិបាល តំណាងនិយោជក និងសហជីពដែលជាតំណាងកម្មករ ត្រូវជួបពិភាក្សាគ្នា២ដងទៀតនៅក្នុងខែកញ្ញា ឆ្នាំ២០២១នេះ មុននឹងឈានទៅធ្វើការសម្រេចរួមគ្នាចុងក្រោយ។
របាយការណ៍សិក្សាមួយរបស់សហជីពកម្ពុជា និងយុទ្ធនាការសម្លៀកបំពាក់ស្អាតស្អំ ចេញផ្សាយនៅខែកក្កដា ឆ្នាំ២០២១នេះ បានឱ្យដឹងថា កម្មករចំនួន៧៨៤ ០០០នាក់ដែលធ្វើការក្នុងវិស័យកាត់ដេរសម្លៀកបំពាក់ ស្បែកជើង និងឧស្សាហកម្មស្បែក បានបាត់បង់ប្រាក់ឈ្នួលនិងប្រាក់អត្ថប្រយោជន៍ប្រមាណ១០៩លានដុល្លារ ក្នុងអំឡុងពេលនៃការផ្ទុះឡើងនៃជំងឺកូវីដ-១៩ និងការអនុវត្តវិធានការបិទខ្ទប់រាជធានីភ្នំពេញ កាលពីខែមេសា និងខែឧសភា កន្លងទៅ៕