អ្នកវិភាគខ្លះថា ការចូលរួមប្រជុំរបស់លោកនាយករដ្ឋមន្ត្រី ហ៊ុន សែន ជាមួយក្រុមអតីតមន្ត្រីបក្សប្រឆាំងនៅក្រៅប្រទេស គឺជាសញ្ញាវិជ្ជមានសម្រាប់ការចរចានយោបាយ ប៉ុន្តែអ្នកនាំពាក្យរដ្ឋាភិបាលបានបដិសេធពីលទ្ធភាពនៃការចរចា។
អ្នកវិភាគនយោបាយនិងសង្គម លោកបណ្ឌិត សេង សារី បានថ្លែងដោយកត់សម្គាល់ថា នេះគឺជារឿងដ៏កម្រដែលប្រមុខរដ្ឋាភិបាល លោក ហ៊ុន សែន បានជ្រៀតចូលក្នុងកិច្ចប្រជុំផ្ទៃក្នុងរបស់អតីតថ្នាក់ដឹកនាំគណបក្សសង្គ្រោះជាតិតាមបណ្តាញទំនាក់ទំនង Zoom។ បើតាមអ្នកវិភាគនយោបាយរូបនេះ លោកនាយករដ្ឋមន្ត្រី ហ៊ុន សែន ប្រាកដជាមានបំណងអ្វីមួយយ៉ាងពិតប្រាកដក្នុងការចូលរួមក្នុងកិច្ចប្រជុំនេះ។
លោក សេង សារី មានប្រសាសន៍នៅថ្ងៃអង្គារថា៖ «បើយើងមើលពីមុំចិត្តសាស្ត្រនយោបាយ យើងឃើញថា សម្តេចតេជោចង់បង្ហាញសញ្ញាណអ្វីម្យ៉ាងទៅគណបក្សសង្គ្រោះជាតិ ថាច្រកចេញនៃនយោបាយជាប់គាំងរបស់កម្ពុជាបច្ចុប្បន្ននេះអាចនឹងប្រើយន្តការវប្បធម៌សន្ទនាម្តងទៀត។ ហើយវប្បធម៌សន្ទនានេះ ជាវប្បធម៌មួយដែលមានស្ថាបនិក២រូប ស្ថាបនិកទី១នោះ គឺសម្តេចតេជោខ្លួនឯង និងឯកឧត្តម សម រង្ស៊ី។ ហើយខ្ញុំៗមើលឃើញទៅលើអ្វីដែលជាប្រសាសន៍របស់សម្តេចតេជោក្នុងការលួចចូលប្រជុំនេះ គឺជាសញ្ញាណមួយវិជ្ជមាន ដែលជាចេតនារបស់ឬបង្ហាញភ្លើងខៀវនៅក្នុងការឈានទៅដល់ការចរចាសម្រាប់ដោះស្រាយបញ្ហានយោបាយជាប់គាំងនៅកម្ពុជា»។
ប៉ុន្តែទោះបីជាយ៉ាងណានេះក្តី លោកបណ្ឌិត សេង សារី មានប្រសាសន៍ថា ដើម្បីឱ្យការចរចានេះប្រព្រឹត្តទៅបាន ទាំងអតីតគណបក្សសង្គ្រោះជាតិ ទាំងគណបក្សកាន់អំណាច ជាពិសេសឃោសនិកនៃគណបក្សទាំងពីរនេះគួរតែបន្ថយការរិះគន់គ្នាទៅវិញទៅមក។
យោងតាមឃ្លីបវីដេអូដែលគេចែករំលែកតគ្នានៅលើបណ្តាញសង្គមហ្វេសប៊ុក ចាប់តាំងពីថ្ងៃទី១៣ ខែកញ្ញាមក បានបង្ហាញប្រមាណជាង១០នាទី ដែលលោកនាយករដ្ឋមន្ត្រី ហ៊ុន សែន បានស្នើសុំចូលរួមប្រជុំផ្ទៃក្នុងក្រុមការងារអតីតគណបក្សសង្គ្រោះជាតិ ដែលដឹកនាំដោយលោក ឡុង រី នៅសហរដ្ឋអាមេរិក។ តាមរយៈកិច្ចប្រជុំនោះ លោកនាយករដ្ឋមន្ត្រី ហ៊ុន សែន បានរម្លឹកឡើងវិញពីអនុស្សាវរីយ៍នៃការបង្កើតវប្បធម៌សន្ទនាជាមួយលោក សម រង្ស៊ី កាលពីឆ្នាំ២០១៤។ ក៏ប៉ុន្តែក្រៅពីរម្លឹកអនុស្សាវរីយ៍នេះ ប្រមុខបក្សកាន់អំណាចក៏បានឆ្លៀតស្តីបន្ទោសលោក សម រង្ស៊ី ថាបានបំផ្លាញវប្បធម៌សន្ទនា និងនាំដល់ការរំលាយគណបក្សសង្គ្រោះជាតិថែមទៀត។
លោកនាយករដ្ឋមន្ត្រី បានមានប្រសាសន៍ក្នុងកិច្ចប្រជុំនោះថា៖ «អើឡុងរី! ឡុងរី! អើយ៉ាងម៉េចហើយវ៉ី? មើលខ្ញុំច្បាស់ទេ? ឡុងរីឯងនៅឯណាឥលូវនេះ? ហើយស្គាល់ខ្ញុំអត់ឥលូវនេះ? អើសម្តេចចូលប្រជុំជាមួយបានហ្អីអត់? អើកម្លាំងនៅភ្នំពេញយ៉ាងម៉េចទៅហើយ? ចង់ចូលសួរយោបល់បន្តិច យេស! ហើយគិតដល់ណាហើយហ្នឹង? ហើយអាអ្នកភូតថាខ្ញុំស្លាប់ហ្នឹងវាដល់ណាហើយឥលូវ?»
ទោះជាយ៉ាងនេះក្តី ប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានថ្លែងថា ការថ្លែងរបស់លោកនាយករដ្ឋមន្ត្រី ហ៊ុន សែន នេះមិនមានអ្វីជាសញ្ញាឈានទៅរកការចរចាណាមួយនោះទេ។ ប៉ុន្តែផ្ទុយទៅវិញ ការជ្រៀតចូលរួមប្រជុំរបស់លោកនាយករដ្ឋមន្ត្រីនៅក្នុងក្រុម Zoom នេះ ចង់បង្ហាញថា ទោះបីជាអ្នកទៅដល់ទីណាឬចង់ធ្វើអ្វី ក៏លោកនាយករដ្ឋមន្ត្រីដឹងទាំងអស់។
លោក ផៃ ស៊ីផាន មានប្រសាសន៍យ៉ាងដូច្នេះថា៖ «ខ្ញុំមើលមិនឃើញអ៊ីចឹងទេ! វាគ្មានរឿងអីទៅចរចាទេ! រឿងចរចាទាល់តែយើងជួបឧបសគ្គ! ក៏ប៉ុន្តែការវិវត្តជាប្រចាំរបស់កម្ពុជា ដូចជាគ្មានតម្រូវការជាមួយគណបក្សដែលត្រូវបានរំលាយចោលទៅហើយនោះទេ»។
លោក ផៃ ស៊ីផាន បន្តថា៖ «បំណងដែលលោកចូលហ្នឹង ដូចខ្ញុំបាននិយាយអ៊ីចឹង ថាអ្នកធ្វើអ្វីក៏លោកដឹង! គ្រាន់តែលោកមិននិយាយ! អ្នកនៅកន្លែងណា សម្តេចមានលទ្ធភាពចូលទៅដល់កន្លែងហ្នឹង! ដូច្នេះបង្ហាញពីភាពក្លាហាន បង្ហាញពួកទាំងអស់ហ្នឹងថា គ្មានអ្វីអាថ៌កំបាំងជាមួយសម្តេចនោះទេ»។
ចំណែកអ្នកវិភាគនយោយនិងសង្គមម្នាក់ទៀត លោកបណ្ឌិត មាស នី ក៏មើលឃើញដូចលោក ផៃ ស៊ីផាន ផងដែរ។ លោកថា វាជាការបង្ហាញសាច់ដុំរបស់លោកនាយករដ្ឋមន្ត្រី ហ៊ុន សែន ទៅវិញទេ ថាទោះបីជាអតីតគណបក្សប្រឆាំងធ្វើអ្វី ក៏លោកនាយករដ្ឋមន្ត្រីដឹងទាំងអស់។
លោកមានប្រសាសន៍យ៉ាងដូច្នេះថា៖ «ខ្ញុំមើលទៅករណីនៃការជ្រៀតចូលទៅស្តាប់នេះ ខ្ញុំមើលទៅវាមិនមានអីពាក់ព័ន្ធការព្យាយាមដើម្បីឱ្យមានការសម្របសម្រួលណាមួយទេក្នុងពេលនេះ។ ខ្ញុំគិតថា នេះគឺជារបៀបនៃការបង្ហាញពីចារកម្ម ឧបមាថា ទោះបីជាយើងប្រជុំសម្ងាត់យ៉ាងម៉េច ក៏នៅតែមានគូបដិបក្ខម្ខាងទៀតដឹងអ៊ីចឹង! អានេះបើមែនទែនទៅ គឺចង់បង្ហាញសាច់ដុំអំពីប្រព័ន្ធចារកម្ម ហើយវានឹងអាចឱ្យគណបក្សនេះ នៅពេលជួបប្រជុំគ្នាថ្ងៃក្រោយមានភាពខ្លាចរអា មិនហ៊ានជួបគ្នាទៀតអ៊ីចឹងណា! អានេះខ្ញុំមើលទៅ វាមិនពាក់ព័ន្ធការចរចាអីយ៉ាងម៉េចទេ»។
សារសំឡេងរបស់លោកនាយករដ្ឋមន្ត្រី ហ៊ុន សែន ដែលត្រូវបានគេយកមកផ្សព្វផ្សាយតាមបណ្ដាញសង្គមនេះ បន្ទាប់ពីលោក សម រង្ស៊ី បានថ្លែងប្រាប់អ្នកគាំទ្ររបស់លោកនៅសហរដ្ឋអាមេរិកថា លោក ហ៊ុន សែន បានជ្រៀតចូលក្នុងកិច្ចប្រជុំ ដែលដឹកនាំដោយលោក ឡុង រី តំណាងរាស្រ្តរបស់អតីតគណបក្សសង្រ្គោះជាតិ ដែលកំពុងតែភៀសខ្លួននៅសហរដ្ឋអាមេរិក។
ក្រោយជាប់គាំងនយោបាយអស់រយៈពេល១ឆ្នាំ ក្រោយពីការបោះឆ្នោតនៅឆ្នាំ២០១៣នោះ គណបក្សជាប់ឆ្នោតទាំងពីរ គឺគណបក្សសង្រ្គោះជាតិ និងគណបក្សប្រជាជនកម្ពុជា បានដោះស្រាយវិបត្តិនយោបាយនៅឆ្នាំ២០១៤ តាមរយៈការបង្កើតវប្បធម៌សន្ទនា។ តាមរយៈវប្បធម៌សន្ទនានេះ លោក សម រង្ស៊ី ត្រូវបានតែងតាំងជាប្រធានក្រុមភាគតិចនៅក្នុងរដ្ឋសភា មានឋានៈស្មើនាយករដ្ឋមន្រ្តី៕