ក្រុមមន្ត្រីគណបក្សហ្វ៊ុនស៊ិនប៉ិចមួយក្រុមដឹកនាំដោយអនុប្រធានគណបក្សចំនួន ៣ រូបគ្រោងនឹងដាក់ពាក្យប្តឹងទៅកាន់ក្រសួងមហាផ្ទៃនៅថ្ងៃចន្ទដើមសប្តាហ៍ក្រោយនេះ ដើម្បីទាមទារឱ្យព្រះអង្គម្ចាស់ក្សត្រីយ៍ នរោត្តម ម៉ារី រណឬទ្ធិ ប្រគល់ត្រាគណបក្សមកវិញ។
គម្រោងនៃការដាក់ពាក្យប្តឹងនេះ គឺបន្ទាប់ពីថ្នាក់ដឹកនាំគណបក្សហ្វ៊ុនស៊ិនប៉ិចទាំង៣រូប ដែលរួមមាន លោក សាយ ហាក់ លោក ចាប ញ៉ាលីវុធ និងលោក ហេង ចន្ថា បានសរសេរលិខិតមួយច្បាប់ស្នើសុំឱ្យព្រះអង្គម្ចាស់ក្សត្រីយ៍ នរោត្តម ម៉ារី រណឬទ្ធិ ប្រគល់ត្រាគណបក្សបានផុតកំណត់ត្រឹមថ្ងៃទី២៣ ខែកញ្ញា។ ពួកគេបានចោទប្រកាន់ថា ព្រះអង្គម្ចាស់ក្សត្រីយ៍ នរោត្តម ម៉ារី រណឬទ្ធិ បានប្រើប្រាស់ត្រាគណបក្សក្នុងការតែងតាំង និងអនុម័តឯកសារនានា ក្នុងរយៈពេលប៉ុន្មានខែចុងក្រោយនេះដោយមិនមានការឯកភាពពីព្រះប្រធានគណបក្ស និងអនុប្រធានទាំង៤នាក់ឡើយ។ ពួកគេជឿជាក់ថា ត្រាគណបក្សនេះ គឺស្ថិតនៅក្នុងដៃរបស់ព្រះអង្គម្ចាស់ក្សត្រីយ៍ នរោត្តម ម៉ារី រណឬទ្ធិ និងលោក ហេង ហាក់លីម ជាជំនួយការផ្ទាល់របស់ព្រះអង្គម្ចាស់ក្សត្រីយ៍ ម៉ារី ខណៈព្រះអង្គម្ចាស់នរោត្តម រណឬទ្ធិ កំពុងសម្រាកព្យាបាលព្រះរោគនៅឯប្រទេសបារាំង។
លោក ផាន់ សិទ្ធី អគ្គលេខាធិការរង និងជាអគ្គលេខាធិការប្រតិបត្តិស្តីទីគណបក្សបានថ្លែងថា ពាក្យបណ្តឹងនេះ លោកបានធ្វើរួចរាល់ហើយ នៅរង់ចាំតែយកទៅដាក់នៅឯក្រសួងមហាផ្ទៃតែប៉ុណ្ណោះ។
លោកមានប្រសាសន៍ថា៖ «យើងរៀបចំរួចហើយលិខិតស្នាមនោះ តែត្រង់ថា ការដាក់ជូនក្រសួង ទាល់តែថ្ងៃចន្ទ ថ្ងៃសៅរ៍គេឈប់ អាទិត្យគេឈប់ទៀត អញ្ចឹងថ្ងៃចន្ទយើងចាត់ការ»។
លោកបន្តថា «យើងយកត្រា ព្រោះដើម្បីត្រូវការរៀបចំគណបក្ស ជាពិសេសរៀបចំការបោះឆ្នោត ឃុំ-សង្កាត់ ហើយកាលណាយើងអត់មានត្រា ហីខាងណោះគេយកត្រាទៅ ប្រើតាមអំពើចិត្ត អត់មានការសម្រេចពីថ្នាក់ដឹកនាំ អញ្ចឹងពិបាក ហើយជាពិសេសមើលទៅដូចជាគណបក្សហ្វុនស៊ីនប៉ិច កំពុងប្រេះឆាជា២ ជា ៣អីអញ្ចឹង ការពិតអត់មានជា២ ជា៣ទេ បាទ! គ្រាន់ថា មានមេដឹកនាំប៉ុន្មាននាក់ទេ នៅតាមដង្ហែព្រះអង្គម្ចាស់ម៉ារី ២ ឬ៣នាក់នោះទេ ហីផុតពីនឹងពួកយើងនៅខាងណេះភាគច្រើន អញ្ជឹងកុំឱ្យថា មហាជនមានការភាន់ច្រឡំ យើងសម្រួលការងារហ្នឹង ហីយើងអត់ចង់ឱ្យមានអីក្តុងក្តាំង ជាមួយម្ចាស់ម៉ារីដែរ គ្រាន់តែថា បើលោកមិនប្រគល់ យើងមិនដឹងធ្វើយ៉ាងមិចដែរ គ្មានជំរើសទេ គ្រាន់តែសុំឱ្យលោកប្រគល់ត្រាមក»។
ប៉ុន្តែលោក ហេង ហាក់លីម ជំនួយការផ្ទាល់របស់ព្រះអង្គម្ចាស់ក្សត្រីម៉ារី រណឬទ្ធិ បានឆ្លើយបដិសេធថា ត្រាមិនមាននៅព្រះអង្គម្ចាស់ក្សត្រីម៉ារី រណឬទ្ធិ នោះទេ។ លោកបានស្នើឱ្យក្រុមថ្នាក់ដឹកនាំគណបក្សហ្វ៊ុនស៊ិនប៉ិចសរសេរលិខិតស្នើសុំពីព្រះអង្គម្ចាស់ នរោត្តម រណឬទ្ធិ ក្នុងនាមព្រះអង្គជាព្រះប្រធានគណបក្សដែលទ្រង់នៅមានព្រះជន្មនៅឡើយនៅឯប្រទេសបារាំង។
លោកបានឆ្លើយតបចំពោះការចោទប្រកាន់នេះថា៖ «ទាក់ទងនឹងរឿងហ្នឹងពួកខ្ញុំ ជាពិសេសបងស្រីព្រះអង្គម្ចាស់ម៉ារី និង ខ្ញុំហ្នឹងវាអត់ដឹងខ្លួនទេ ព្រោះវាមិនជាប់អីនឹងគណបក្សហ្វ៊ុនស៊ីនប៉ិចហ្នឹងទេ នេះទី១ជំរាបជូនអញ្ចឹង ទី២ ទាក់ទងនឹងត្រា ដែលគាត់ប្តឹងទាមទារហ្នឹង ក៏ជារឿងមិនត្រឹមត្រូវដែរ គាត់គួរតែទាមទារ ទៅប្រធានគណបក្សគេទៅ ព្រោះខ្ញុំផ្ទាល់ជាមួយបងស្រីព្រះអង្គម្ចាស់ម៉ារី មិនជាប់ពាក់ព័ន្ធ នឹងគណបក្សនឹង និងត្រាគណបក្សនឹងទេ គឺគាត់គួរតែសរសេរសំបុត្រស្នើសុំទៅប្រធានស្ថាប័ន ឬគណបក្សគេទៅ»។
កាលពីថ្ងៃទី២២ ខែកញ្ញា ថ្នាក់ដឹកនាំគណបក្សហ្វ៊ុនស៊ិនប៉ិចបានធ្វើសន្និសីទកាសែតមួយឯទីស្នាក់ការគណបក្សស្ថិតនៅសង្កាត់ជ្រោយចង្វារ ដោយបានចោទប្រកាន់ព្រះអង្គម្ចាស់ក្សត្រីយ៍ នរោត្តម ម៉ារី រណឬទ្ធិ ប្រើប្រាស់ត្រាគណបក្សនេះ ដោយបានធ្វើសេចក្តីសម្រេច និងតែងតាំងអ្វីៗ ដោយមិនមានការពិភាក្សាជាមួយអនុប្រធានគណបក្សទាំង៤នាក់ និងការសម្រេចយល់ព្រមពីសម្តេចក្រុមព្រះ នរោត្តម រណឫទ្ធិ នោះទេ។ ការទាមទារត្រាយកទៅគ្រប់គ្រងនេះ ក៏ដើម្បីដឹកនាំគណបក្សនេះទៅរួបរួមជាមួយគណបក្សខ្មែររួបរួមជាតិរបស់លោក ញឹក ប៊ុនឆៃ តាមព្រះរាជបំណងរបស់សម្តេចក្រុមព្រះកន្លងមក និងដើម្បីត្រៀមចូលរួមការបោះឆ្នោតឃុំសង្កាត់ខាងមុខនេះ។
យ៉ាងណាក្តី ញឿន រ៉ាដែន អ្នកនាំពាក្យថ្មីរបស់គណបក្សហ្វ៊ុនស៊ិនប៉ិចបានចាត់ទុកថា ការស្នើសុំត្រាទៅគ្រប់គ្រងនេះ គឺខុសពីលក្ខិន្តិកៈគណបក្ស។ លោកបានស្នើឱ្យថ្នាក់ដឹកនាំគណបក្សទាំង៣រូប សរសេរលិខិតថ្វាយទៅសម្តេចក្រុមព្រះ នរោត្តម រណឬទ្ធិ ដោយផ្ទាល់ ដែលព្រះអង្គកំពុងស្ថិតនៅក្នុងប្រទេសបារាំង។
លោកមានប្រសាសន៍យ៉ាងដូច្នេះថា៖ «ទាក់ទងនឹងបញ្ហានេះដែរ ក្នុងនាមខ្ញុំជាអ្នកនាំពាក្យ ខ្ញុំស្រាយបំភ្លឺថា ការស្នើសុំរបស់ឯកឧត្តមទាំង៣ វាខុសទៅនឹងលក្ខន្តិកៈ បទបញ្ជាផ្ទៃក្នុងរបស់បក្ស ពីព្រោះការគ្រប់គ្រងត្រាស្ថាប័នមួយក៏ដូចជាគណបក្ស គឺជាបុព្វសិទ្ធរបស់សម្តេចប្រធានតែម្នាក់គត់ ប្រសិនបើឯកឧត្តមទាំង៣ហ្នឹង គាត់ចង់បានត្រាចង់អីហ្នឹង គួរតែលោកស្នើសុំទៅសម្តេចប្រធាន សួរទៅសម្តេចប្រធាន ហើយការគ្រប់គ្រងត្រានោះ គឺជាព្រះទ័យរបស់ប្រធាន គាត់ប្រគល់ឱ្យអ្នកណាគ្រប់គ្រង គឺជារឿងរបស់លោក»។
សម្តេចក្រុមព្រះ នរោត្តម រណឬទ្ធិ ព្រះប្រធានគណបក្សហ្វ៊ុនស៊ិនប៉ិច ត្រូវបានគេដឹងថាញាត្តិវង្សព្រះអង្គយាងទៅព្យាបាលព្រះរាជសុខភាពនៅឯប្រទេសបារាំង។ ប៉ុន្តែទោះជាយ៉ាងនេះក្តី លោក ញឿន រ៉ាដែន បានគូសបញ្ជាក់ថា ព្រះអង្គម្ចាស់ នរោត្តម រណឬទ្ធិ នឹងយាងមកកាន់ប្រទេសកម្ពុជាវិញនៅពេលឆាប់ៗខាងមុខ ដើម្បីដោះស្រាយបញ្ហាជម្លោះផ្ទៃក្នុងគណបក្សនៅពេលនេះ។
គួររំលឹកជូនថា គណបក្សហ្វ៊ុនស៊ិនប៉ិច គឺជាគណបក្សដែលធ្លាប់ឈ្នះការបោះឆ្នោតនៅឆ្នាំ១៩៩៣។ ក៏ប៉ុន្តែគណបក្សនេះ បានធ្លាក់ចុះប្រជាប្រិយភាពជាបន្តបន្ទាប់ និងបែកបាក់ផ្ទៃក្នុងជាច្រើនជម្រៀកចាប់តាំងពីឆ្នាំ១៩៩៨ រហូតមកដល់បច្ចុប្បន្ននេះ៕