លោកនាយករដ្ឋមន្ត្រី ហ៊ុន សែន បានឱ្យដឹងថា លោកបានអនុញ្ញាតជាគោលការណ៍ឱ្យក្រសួងអប់រំ យុវជន និងកីឡា បើកមហាវិទ្យាល័យរដ្ឋនិងឯកជនឡើងវិញហើយ កាលពីថ្ងៃម្សិលមិញនេះ។
បើតាមប្រសាសន៍របស់លោកនាយករដ្ឋមន្ត្រី ហ៊ុន សែន បានថ្លែងនៅថ្ងៃសៅរិ៍នេះដើម្បីពន្យល់អំពីមូលហេតុនៃការផ្អាកពិធីបុណ្យកាន់បិណ្ឌនិងភ្ជុំបិណ្ឌនេះថា អ្វីដែលជាការខិតខំរបស់កម្ពុជាពេលនេះ គឺការទប់ស្កាត់ការឆ្លងជំងឺកូវីដ-១៩ នៅតាមទីវត្តអារាមនានា ដែលមានការប្រមូលផ្តុំមនុស្សច្រើន និងដែលគេមិនដឹងពីប្រភពមកពីណាច្បាស់លាស់។ លោកបានបន្តថា ការណ៍នេះ នឹងបង្កឱ្យមានការឆ្លងជំងឺកូវីដ-១៩ ពេញសហគមន៍រហូតដល់បង្ខំចិត្តត្រូវបិទសាលារៀនតទៅទៀត ក្នុងពេលដែលកម្ពុជាបានបើកសាលារៀនជាបន្តបន្ទាប់។
លោកមានប្រសាសន៍ថា៖ «នៅពេលខាងមុខនេះ យើងនឹងឈានទៅបើកកាន់តែធំ ហើយម្សិលមិញនេះ ខ្ញុំព្រះករុណាខ្ញុំក៏បានអនុញ្ញាតឱ្យក្រសួងអប់រំ យុវជន និងកីឡា បើកមហាវិទ្យាល័យទាំងរដ្ឋនិងឯកជនឡើងវិញផងដែរ»។
កាលពីថ្ងៃទី៣១ ខែសីហា លោកនាយករដ្ឋមន្ត្រី ហ៊ុន សែន បានបញ្ជាឱ្យរដ្ឋមន្ត្រីក្រសួងអប់រំ យុវជន និងកីឡា ពិភាក្សាជាមួយអាជ្ញាធររាជធានី-ខេត្ត ដើម្បីសិក្សាពីការបើកសាលាឡើងវិញ នៅតំបន់គ្មានការឆ្លងជំងឺកូវីដ-១៩។ ហើយចាប់តាំងពីថ្ងៃទី១៥ ខែកញ្ញា មក សាលារៀនភាគច្រើនចាប់ពីកម្រិតអនុវិទ្យាល័យ និងវិទ្យាល័យ បានបើកទ្វារឡើងវិញ តែក៏មានថ្នាក់រៀនខ្លះបានបិទទ្វារទៅវិញដែរ ក្រោយមានឆ្លងជំងឺកូវីដ-១៩។ ប្រទេសកម្ពុជា បានបិទសាលារៀនគ្រប់កម្រិត ចាប់តាំងពីខែកុម្ភៈមក ពោលគឺក្រោយពីមានករណីជំងឺកូវីដ-១៩ ឆ្លងចូលសហគមន៍លើកទី៣មក៕