ក្រសួងធម្មការ និងសាសនា បានឱ្យដឹថា យ៉ាងហោចណាស់ក្រសួងរកឃើញអ្នកឆ្លងជំងឺកូវីដ-១៩ នៅតាមវត្តអារាមក្នុងរាជធានីភ្នំពេញ មានចំនួន១៤១អង្គនិងនាក់ នាអំឡុងពេលបុណ្យកាន់បិណ្ឌចំនួន៤ថ្ងៃកន្លងមកនេះ។
រដ្ឋលេខាធិការក្រសួងធម្មការ និងសាសនា លោក សេង សុមុនី ប្រាប់វីអូឌីនៅថ្ងៃអាទិត្យទី២៦ ខែកញ្ញានេះថា គិតត្រឹមថ្ងៃទី២២ ខែកញ្ញា ឆ្នាំ២០២១ ដល់ថ្ងៃ២៥ ខែឆ្នាំដដែលនេះ ក្រុមគ្រូពេទ្យក្រសួងសុខាភិបាល បានយកសំណាកលើព្រះសង្ឃ គណៈកម្មការអាចារ្យ និងសិស្ស និស្សិត ចំនួន៨ ៩៧៥អង្គនិងនាក់ ដែលស្នាក់នៅក្នុងវត្តចំនួន ១៥០ ក្នុងរាជធានីភ្នំពេញ។ លោកបន្តថា ក្នុងនោះ ក្រសួងបានរកឃើញអ្នកឆ្លងជំងឺកូវីដ-១៩ មានចំនួន១៤១អង្គនិងនាក់ ហើយព្រះសង្ឃមានចំនួន៩៧អង្គ តាអាចារ្យចំនួន៩នាក់ ដូនជីតាជី ចំនួន១៥នាក់ និងសិស្ស និស្សិតចំនួន ២០នាក់។
លោក សេង សុមុនី បញ្ជាក់ថា នៅរាជធានីភ្នំពេញ មានចំនួន១៥៤វត្ត និងមានព្រះសង្ឃគង់នៅសរុបប្រហែល៨០០០អង្គ។
កាលពីថ្ងៃទី២៣ ខែកញ្ញា ឆ្នាំ២០២១ រដ្ឋាភិបាលបានចេញសេចក្តីសម្រេចបន្ទាន់មួយ ដោយសម្រេចផ្អាកការរៀបចំពិធីបុណ្យកាន់បិណ្ឌនិងភ្ជុំបិណ្ឌ ចាប់ពីបិណ្ឌទី៤ ដែលត្រូវនឹងថ្ងៃទី២៥ ខែកញ្ញា ឆ្នាំ២០២១នេះ។
ការផ្អាកនេះ ធ្វើឡើងដើម្បីទប់ស្កាត់ការឆ្លងជំងឺកូវីដ-១៩ ខណៈលោកនាយករដ្ឋមន្ត្រី ហ៊ុន សែន សង្កេតឃើញថា ក្នុងរយៈពេលពីរថ្ងៃដំបូងនៃការរៀបចំពិធីបុណ្យកាន់បិណ្ឌនេះ មានការជួបជុំនិងប្រមូលផ្តុំមនុស្សជាច្រើននៅតាមបណ្តាវត្តអារាម ដោយមិនបានអនុវត្តត្រឹមត្រូវតាមវិធានការសុវត្ថិភាពផ្នែកសុខាភិបាល ដែលនាំឱ្យកម្ពុជាប្រឈមហានិភ័យខ្ពស់នៃការឆ្លងរាលដាលជំងឺកូវីដ-១៩ ជាទ្រង់ទ្រាយធំនៅទូទាំងប្រទេស ជាពិសេសមេរោគបំប្លែងខ្លួនថ្មីប្រភេទ ដែលតា (Delta) ដែលមានកម្រិតនៃការឆ្លងរាលដាលឆាប់រហ័សផងដែរ។
បើតាមក្រសួងសុខាភិបាល គិតត្រឹមព្រឹកថ្ងៃអាទិត្យនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១០ ៩ ០៨៧នាក់ ក្នុងនោះអ្នកជំងឺព្យាបាលជាសះស្បើយសរុបមានចំនួន ១០០ ៦៥៥នាក់ និងអ្នកស្លាប់សរុប ២ ២៤៣នាក់ និងករណីនាំចូលពីក្រៅប្រទេសសរុប ១៨ ៦៤៥នាក់៕
