សាលាដំបូងខេត្តកោះកុង បានផ្តន្ទាទោសអ្នកសារព័ត៌មានប្រចាំខេត្តនេះឱ្យជាប់ពន្ធនាគារ១ឆ្នាំ ពីបទ«ញុះញង់បង្កភាពវឹកវរដល់សន្តិសុខសង្គម» បន្ទាប់ពីអ្នកសារព័ត៌មានរូបនេះត្រូវបានមន្ត្រីនគរបាល កោះហៅទៅសាកសួរជុំវិញការផ្សព្វផ្សាយថា អភិបាលរងខេត្តកោះកុង «ឃោរឃៅបំផុតធ្វើបាបពលរដ្ឋ»។
អ្នកសារព័ត៌មានដែលត្រូវបានតុលាការផ្តន្ទាទោសរូបនោះមានឈ្មោះ យួន ឈីវ ជាម្ចាស់ផេកហ្វេសប៊ុកឈ្មោះ Koh Kong Hot News បានរាយការណ៍អំពីករណីដែលអាជ្ញាធរឈូសឆាយខ្ទម និងដើមស្វាយចន្ទីរបស់អ្នកភូមិនៅលើដីរដ្ឋ ក្នុងស្រុកគិរីសាគរ។
ទាក់ទិននឹងករណីនេះ រដ្ឋបាលខេត្តកោះកុង បានចាត់ទុកវីដេអូដែលផ្សាយដោយលោក យួន ឈីវ ដែលដាក់ចំណងជើងថា «លោក សុខ សុទ្ធី (អភិបាលរងខេត្តកោះកុង) ឃោរឃៅបំផុតធ្វើបាបពលរដ្ឋ» ថាជាចេតនាបង្កាច់បង្ខូចកេរ្តិ៍ឈ្មោះលោក សុខ សុទ្ធី ព្រមទាំងធ្វើឱ្យប៉ះពាល់ដល់កិត្តិយសរដ្ឋបាលខេត្ត។
ពាក់ព័ន្ធទៅនឹងករណីបំភ្លៃព័ត៌មានរបស់លោក យួន ឈីវ រឿងកាត់ឆ្វៀលដីជូនប្រជាពលរដ្ឋនៅក្នុងខេត្តកោះកុងនេះ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ លោក ទៀ បាញ់ ក៏បានបញ្ជាឱ្យមានចំណាត់ការលើរូបលោកផងដែរ។
អ្នកនាំពាក្យនៃតំណាងអយ្យការអមសាលាដំបូងខេត្តកោះកុង លោក វ៉ៃ ភីរម្យ បានឱ្យដឹងកាលពីថ្ងៃទី៣០ ខែកញ្ញា ឆ្នាំ២០២១ ថាក្រោយពីសមត្ថកិច្ចបានកោះហៅលោក យួន ឈីវ ទៅសាកសួរនៅអធិការស្រុក កាលពីថ្ងៃអង្គាររួចមក សមត្ថកិច្ចខេត្តបានបញ្ជូនសំណុំរឿងនេះទៅកាន់ព្រះរាជអាជ្ញា ដើម្បីពិនិត្យ និងបន្តបញ្ជូនទៅកាន់ចៅក្រម ហើយចៅក្រមក៏បានសម្រេចចោទប្រកាន់រូបលោកពីបទ «ញុះញង់បង្កភាពវឹកវរដល់សន្តិសុខសង្គម»។
អ្នកនាំពាក្យរូបនេះបន្តថា៖ «ការជំនុំជម្រះត្រូវបានធ្វើឡើងនៅព្រឹកនេះ [ថ្ងៃព្រហស្បតិ៍]។ តុលាការបានសម្រេចបើកសវនាការជំនុំជម្រះលើលោក យួន ឈីវ និងបានប្រកាសសាលក្រមនៅព្រឹកនេះដោយផ្តន្ទាទោសរូបលោកដាក់ពន្ធនាគារ១ឆ្នាំ និងពិន័យជាប្រាក់ចំនួន២លានរៀល»។
លោកបន្ថែមថា៖ «លោក យួន ឈីវ ត្រូវបានចាប់ខ្លួនភ្លាមៗ ហើយសំណុំរឿងនេះត្រូវបានស៊ើបអង្កេតយ៉ាងពេញលេញនិងល្អិតល្អន់»។
លោកថា ដោយហេតុថា លោក យួន ឈីវ មិនមែនជាអនីតិជន មានន័យថា «បុគ្គលនោះអាចត្រូវបានកាត់ទោសភ្លាមៗ»។
លោក វ៉ៃ ភីរម្យ បន្ថែមថា លោក យួន ឈីវ ក៏ត្រូវបានជូនដំណឹងទាក់ទងទៅនឹងសិទ្ធិក្នុងការទទួលបានមេធាវីផងដែរ ប៉ុន្តែរូបលោកមិនបានសម្រចជ្រើសរើសមេធាវីណាម្នាក់នោះទេ។
លោកថា៖ «ដូច្នេះហើយ មានន័យថា គាត់មិនត្រូវការមេធាវីនោះទេ»។
លោកបន្តថា លោក យួន ឈីវ បច្ចុប្បន្នត្រូវបានបញ្ជូនទៅកាន់ពន្ធនាគារខេត្តហើយ។
អ្នកសារព័ត៌មានមួយរូបនៅខេត្តកោះកុង លោក សុខ សុវណ្ណ បានឱ្យដឹងថា លោកមិនបាននិយាយជាមួយលោក យួន ឈីវ ឬសង្កេតមើលការជំនុំជម្រះនៅតុលាការទេ ខណៈដែលមានតែសមាជិកគ្រួសារប៉ុណ្ណោះដែលត្រូវបានអនុញ្ញាតឱ្យចូលក្នុងបន្ទប់សវនាការ។
លោកថា៖ «ករណីជំនុំជម្រះនេះត្រូវបានធ្វើឡើងដោយសម្ងាត់»។
តែយ៉ាងណា លោកថា អាជ្ញាធរគួរតែប្រើច្បាប់សារព័ត៌មានជាជាងក្រមព្រហ្មទណ្ឌ ឬក៏អនុញ្ញាតឱ្យលោក យួន ឈីវ សុំទោសជាសាធារណៈនិងលុបវីដេអូទាំងនោះចោល។
លោក សុខ សុវណ្ណ បន្ថែមថា៖ «ករណីនេះមិនសមស្របនោះទេ។ នៅក្នុងប្រទេសមួយដែលមានប្រជាធិបតេយ្យ នៅពេលដែលអ្នកសារព័ត៌មានចុះផ្សាយព័ត៌មាន ដើម្បីផលប្រយោជន៍សាធារណៈនិងសង្គមជាតិ ពួកគេមិនគួរត្រូវបានផ្តន្ទាទោសឬចាប់ដាក់គុកឡើយ»៕
