អ្នកឃ្លាំមើលបញ្ហាសង្គម លើកឡើងថា វិធានការផ្លាស់ប្ដូរថ្នាក់ដឹកនាំខេត្តទាំង៧រូបនាពេលថ្មីៗនេះ មានភាពវិជ្ជមានមួយដែរ ដើម្បីលុបបំបាត់អំពើពុករលួយនិងគ្រួសារនិយម បើសិនជាអភិបាលខេត្តទាំងអស់នោះនៅក្នុងខេត្តតែមួយយូរពេក។
កាលពីថ្ងៃទី៣០ ខែកញ្ញា ឆ្នាំ២០២១ ព្រះមហាក្សត្របានត្រាស់បង្គាប់ផ្លាស់ប្ដូរអភិបាលខេត្តចំនួន៧រូប ខណៈអភិបាលខេត្តស្ទឹងត្រែង លោក ម៉ុម សារឿន ត្រូវតែងតាំងជាអនុរដ្ឋលេខាធិការក្រសួងមហាផ្ទៃ។
បើតាមព្រះរាជក្រឹត្យចំនួន៧ដាច់ដោយឡែកពីគ្នា ដោយដោះដូរនិងតែងតាំងអភិបាលខេត្តមួយចំនួន ដូចជា លោក ងួន រតនៈ អភិបាលខេត្តបាត់ដំបង ត្រូវទៅធ្វើជាអភិបាលខេត្តកំពង់ធំ ជំនួសលោក សុខ លូ ដែលត្រូវមកដឹកនាំខេត្តបាត់ដំបងវិញ ខណៈអភិបាលខេត្តពោធិ៍សាត់ លោក ម៉ៅ ធនិន ត្រូវផ្លាស់មកដឹកនាំខេត្តកំពត ជំនួសលោក ជាវ តាយ ដែលត្រូវទៅធ្វើជាអភិបាលខេត្តពោធិ៍សាត់វិញ។
ចំណែកលោក ញ៉ែម សំអឿន អភិបាលរង ត្រូវបានតែងតាំងជាអភិបាលខេត្តរតនគិរី ជំនួសលោក ថង សាវុន ដែលត្រូវផ្លាស់ទៅធ្វើអភិបាលខេត្តមណ្ឌលគិរី ដោយអភិបាលខេត្តមណ្ឌលគិរី លោក ស្វាយ សំអ៊ាង ត្រូវបានផ្លាស់ឱ្យទៅគ្រប់គ្រងខេត្តស្ទឹងត្រែងវិញ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី ចាត់ទុកការដោះដូរអភិបាលខេត្តពីខេត្តមួយទៅខេត្តមួយផ្សេងទៀតនេះថា ជារឿងល្អ ដោយសារអភិបាលខេត្តទាំងនោះអាចនាំយកនូវបទពិសោធន៍របស់ខ្លួនកន្លងមក ពាក់ព័ន្ធនឹងភាពជោគជ័យនិងបរាជ័យទៅអភិវឌ្ឍខេត្តថ្មីដែលខ្លួនគ្រប់គ្រងបាន។
លោកយល់ថា ការផ្លាស់ប្ដូរនេះ ក្រសួងមហាផ្ទៃ និងថ្នាក់ដឹកនាំ ក៏អាចរៀបចំទៅជាការប្រកួតប្រជែងការដឹកនាំឆ្នើមរបស់ចៅហ្វាយខេត្ត ដើម្បីអាចជាសក្ខីកម្មបង្ហាញទៅជាសាធារណជន រួមទាំងថ្នាក់ដឹកនាំខេត្តមួយចំនួនទៀត ដោយធ្វើការវាយតម្លៃនិងវិនិច្ឆយជាក់លាក់។
លោក ប៉ិច ពិសី ថ្លែងថា៖ «គាត់អាចនាំយកបទពិសោធន៍អ្វីដែលគាត់ធ្លាប់ធ្វើនៅខេត្តដែលគាត់កំពុងកាន់ហ្នឹងទៅកន្លែងថ្មី នៅក្នុងការផ្លាស់ប្ដូរជាសមត្ថភាពរវាងពីតំបន់មួយទៅតំបន់មួយផង។ ហើយយើងឃើញថា ទោះបីជាអភិបាលខេត្តខ្លះ គាត់ពូកែដោះបញ្ហា ប៉ុន្តែក៏មានអភិបាលខេត្តមួយចំនួនដែលគាត់មិនសូវជាជំនាញក្នុងការដោះបញ្ហាខេត្តរបស់ខ្លួនដែរ។ អ៊ីចឹងបទពិសោធន៍ដែលចៅហ្វាយខេត្តនីមួយៗនាំមកទៅហើយនាំមកហ្នឹង អាចរួមចំណែកក្នុងការអភិវឌ្ឍខេត្តក្រុង»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា យល់ថា ការផ្លាស់នេះ បានធ្វើឱ្យប្រជាពលរដ្ឋនៅក្នុងខេត្តសប្បាយចិត្ត ដោយពួកគាត់សង្ឃឹមថា ថ្នាក់ដឹកនាំខេត្តថ្មីនឹងសកម្មក្នុងការជួយដោះស្រាយបញ្ហាដែលបានអូសបន្លាយយូរ ក្នុងករណីដែលថ្នាក់ដឹកនាំខេត្តចាស់មិនអាចដោះស្រាយឱ្យពួកគាត់។
លោកថា៖ «មួយទៀត ជាចំណុចវិជ្ជមានដែរ ពីព្រោះការទុករក្សាតួនាទីអភិបាលខេត្តនីមួយៗយូរពេក វាអាចកើតមានគ្រួសារនិយម បក្ខពួកនិយម អាហ្នឹងជាបញ្ហាដែរ។ បើសិនជាមានការផ្លាស់ប្ដូរចុះឡើង ទៅតាមអាណត្តិការងារ ខ្ញុំគិតថា មានភាពប្រសើរជាងទុកនៅក្នុងខេត្តនីមួយៗយូរអ៊ីចឹង»។
ប្រធានគណៈកម្មាធិការកម្ពុជាឯករាជ្យប្រឆាំងអំពើពុករលួយ លោកស្រី ម៉ម ស៊ីថា យល់ថា ការដោះដូរនិងផ្លាស់ប្ដូរថ្នាក់ដឹកនាំខេត្តទាំងនេះអាចបណ្តាលមកពីអភិបាលខេត្តចាស់មិនអាចទប់ស្កាត់បទល្មើសព្រៃឈើ បទល្មើសផ្សេងៗបានហើយ ថែមទាំងបង្កើតឱ្យមានគ្រួសារនិងបក្ខពួក។ ប៉ុន្តែលោកស្រីថា ការផ្លាស់ប្ដូរនេះមានភាពវិជ្ជមានឬអត់នោះ ត្រូវរង់ចាំមើលនាពេលខាងមុខ។
លោកស្រីថា៖ «នៅយូរទៅ ដូចខ្ញុំថាជាប្រព័ន្ធទៅ ទៅជារបរ ទៅរកស៊ីទៅ អញជួយឯង ឯងជួយអញ វាគ្មានអីជាហ្នឹងទេ វាបង្កើតឱ្យបក្ខពួក ពុករលួយតែប៉ុណ្ណឹងទេ វាអត់ប្រសើរទេ។ យើងឃើញកន្លងមក មានតែបញ្ហាហិង្សារំលោភដីធ្លី ការដោះស្រាយមិនទៅមុខ បក្ខពួកនិយម លម្អៀង មិនស្មើភាព ដោះស្រាយវិវាទអីទាំងឡាយហ្នឹង វាអត់មានអីប្រសើរ»។
លោកស្រីបន្ថែមថា៖ «យើងមើលទៅគ្រាន់តែបង្ហាញនូវសកម្មភាពធ្វើឱ្យមានការផ្លាស់ប្ដូរ ដើម្បីឱ្យគេមើលឃើញថា វាមិនឱ្យអាក្រក់ដូចកន្លែងចាស់! ដូចជាកន្លែងចាស់ វាមានឈ្មោះអាស្រូវ ផ្លាស់ទៅកន្លែងថ្មី ដោះដូរ ដូចអត់មានអីថាល្អ។ កន្លែងខ្លះល្អទៅ គេឱ្យប្ដូរកន្លែងណាអាក្រក់ ទៅជួយកន្លែងណាអាក្រក់ទៅ មានដែរ វាមិនអត់ទេណា ដូចជា អភិបាលខេត្តពោធិ៍សាត់គាត់មានស្នាដៃអ៊ីចឹង គេចង់ឱ្យគាត់ទៅជួយកន្លែងណាដែលមានបញ្ហាច្រើន»។
ទោះយ៉ាងណា វីអូឌី មិនអាចសុំការបញ្ជាក់ជុំវិញមូលហេតុនៃការដោះដូរនិងផ្លាស់ប្តូរអភិបាលខេត្តទាំង៧រូបនេះពីអ្នកនាំពាក្យក្រសួងមហាផ្ទៃ លោក ខៀវ សុភ័គ និងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានទេ នៅថ្ងៃនេះ៕