ព្រះមហាក្សត្របានបញ្ចប់មុខតំណែងលោក ហេង ចាន់ថា ពីសមាសភាពឧត្តមក្រុមប្រឹក្សាពិគ្រោះនិងផ្តល់យោបល់កូតាគណបក្សហ្វ៊ុនស៊ិនប៉ិច ដែលមានឋានៈស្មើទេសរដ្ឋមន្ត្រី។
យោងតាមព្រះរាជក្រឹត្យរបស់ព្រះមហាក្សត្រកម្ពុជា ចុះថ្ងៃទី២ ខែតុលា ឆ្នាំ២០២១នេះ បានបានត្រាស់បង្គាប់បញ្ចប់មុខតំណែងរបស់លោក ហេង ចាន់ថា និងជំនួសមកវិញដោយលោក ឆឹង ចំរើន កូតាគណបក្សហ្វ៊ុនស៊ិនប៉ិច ជាសមាសភាពឧត្តមក្រុមប្រឹក្សាពិគ្រោះ និងផ្តល់យោបល់ ដែលមានឋានៈស្មើទេសរដ្ឋមន្ត្រី។
ការឈានទៅបញ្ចប់មុខតំណែងលោក ហេង ចាន់ថា ពីសមាសភាពឧត្តមក្រុមប្រឹក្សាពិគ្រោះ និងផ្តល់យោបល់កូតាគណបក្សហ្វ៊ុនស៊ិនប៉ិចនេះ គឺបន្ទាប់ពីគណបក្សបានបញ្ឈប់លោកពីសមាជិកគណបក្សកាលពីថ្ងៃទី២៤ ខែកញ្ញា ឆ្នាំ២០២១។
អ្នកនាំពាក្យគណបក្សហ្វ៊ុនស៊ិនប៉ិច លោក ញឿន រ៉ាដែន បានប្រាប់វីអូឌីនៅថ្ងៃសៅរ៍នេះថា គណបក្សបានផ្ញើលិខិតទៅកាន់លោកនាយករដ្ឋមន្ត្រី ហ៊ុន សែន ដើម្បីទូលថ្វាយព្រះមហាក្សត្រឱ្យបញ្ចប់មុខតំណែងរបស់លោក ហេង ចាន់ថា ពីប្រធានប្រតិភូគណបក្សហ្វ៊ុនស៊ិនប៉ិចនៅឧត្តមក្រុមប្រឹក្សាពិគ្រោះ និងផ្តល់យោបល់ ដែលមានឋានៈស្មើទេសរដ្ឋមន្ត្រីនេះ។
លោក ហេង ចាន់ថា និងមន្ត្រីជាន់ខ្ពស់គណបក្សហ្វ៊ុនស៊ិនប៉ិចពីរនាក់ទៀត គឺលោក សាយ ហាក់ និងលោក ផាន់ សុទ្ធី ត្រូវបានសម្តេចក្រុមព្រះ នរោត្តម រណឬទ្ធិ បញ្ចប់សមាជិកភាពពីគណបក្សហ្វ៊ុនស៊ិនប៉ិច កាលពីថ្ងៃទី២៤ ខែកញ្ញា ឆ្នាំ២០២១ ក្រោមការចោទប្រកាន់ថា បានបំបែកបំបាក់ផ្ទៃក្នុងគណបក្សតាមរយៈការទាមទារយកត្រាគណបក្សទៅគ្រប់គ្រងកាលពីពេលថ្មីៗនេះ៕
