លោកនាយករដ្ឋមន្ត្រី ហ៊ុន សែន បានក្រើនរំឮកស្ថាប័នពាក់ព័ន្ធឱ្យបណ្តុះស្មារតីសិស្ស និស្សិត ឱ្យចេះគោរពមនុស្សចាស់ ដើម្បីរក្សានូវប្រពៃណីរបស់ជាតិ ដោយថា បើគុណធម៌ សីលធម៌ជាតិធ្លាក់ចុះ នឹងធ្វើឱ្យសង្គមទទួលរងនូវវិបត្តិនិងមហន្តរាយ។
ការក្រើនរំឮករបស់លោកនាយករដ្ឋមន្ត្រី ហ៊ុន សែន បានធ្វើឡើងតាមរយៈសារអបអរសាទរនៅក្នុង «ទិវាមនុស្សចាស់» នៅថ្ងៃទី១ ខែតុលា ឆ្នាំ២០២១ ក្រោមប្រធានបទ «ចូលរួមគាំទ្រថែទាំសុខុមាលភាពមនុស្សចាស់ គឺជាកត្តាដ៏សំខាន់ក្នុងការអនុវត្តប្រព័ន្ធគាំពារសុខុមាលភាពមនុស្សគ្រប់វ័យក្នុងសង្គមជាតិនៅកម្ពុជា»។
លោកនាយករដ្ឋមន្ត្រី ហ៊ុន សែន ក៏បានក្រើនរំឮកដល់ស្ថាប័នពាក់ព័ន្ធទាំងអស់ត្រូវបណ្តុះស្មារតីសិស្សនិស្សិត ឱ្យចេះគោរពមនុស្សចាស់ដើម្បីរក្សានូវប្រពៃណីរបស់ជាតិដែលបានបន្សល់ពីដូនតាមក។ លោកថា បើសង្គមជាតិមួយធ្លាក់ចុះនូវគុណធម៌ និងសីលធម៌ នឹងធ្វើឱ្យសង្គមជាតិត្រូវទទួលរងនូវវិបត្តិ និងមហន្តរាយ។
លោកនាយករដ្ឋមន្ត្រីថ្លែងថា៖ «ប្រវត្តិសាស្ត្រនិងបទពិសោធនៃសង្គមនីមួយៗបានបង្ហាញឱ្យឃើញថា ការអភិវឌ្ឍសេដ្ឋកិច្ច សង្គមកិច្ច និងវប្បធម៌ នៃប្រជាជាតិមួយអាចប្រព្រឹត្តទៅបានប្រកបដោយចីរភាពនិងសមធម៌ ទាមទារឱ្យមានការអភិវឌ្ឍផ្នែកអប់រំ សីលធម៌ គុណធម៌ និងវប្បធម៌អហិង្សា។ ផ្ទុយទៅវិញ ក្នុងសង្គមជាតិមួយដែលមានគុណធម៌និងសីលធម៌ធ្លាក់ចុះ សង្គមជាតិនោះនឹងត្រូវទទួលរងនូវវិបត្តិនិងមហន្តរាយ»។
តាមរយៈលិខិតដដែល លោកនាយករដ្ឋមន្ត្រី បានអំពាវនាវឱ្យគ្រប់ក្រសួង ស្ថាប័ន រដ្ឋបាលថ្នាក់ក្រោមជាតិ និងគ្រប់អង្គការនានា ជួយបង្កលក្ខណៈងាយស្រួល ដល់សមាគមមនុស្សចាស់កម្ពុជាដែលមានស្រាប់បន្តគាំទ្រ ពង្រឹង និងពង្រីកសមាគមមនុស្សចាស់នៅតាមសហគមន៍មូលដ្ឋាន ដើម្បីបង្កើនស្មារតីសាមគ្គីជួយគ្នាទៅវិញទៅមករវាងមនុស្សចាស់ក្នុងប្រទេស ជាពិសេសមនុស្សចាស់ជរាពិការ មនុស្សចាស់ជរា មានជំងឺ និងមនុស្សចាស់ជរាក្រីក្រគ្មានទីពឹងជាដើម។
ព្រះតេជគុណ ស៊ី សំណាង គ្រូបង្រៀននៅសាលាបញ្ញាសាស្ត្រអន្តរជាតិមានថេរដីកាថា ការអប់រំសិស្សឱ្យចេះដឹងពីគុណធម៌ សីលធម៌ គឺជាកាតព្វកិច្ចរបស់មនុស្សចាស់ ព្រោះក្មេងៗដូចជាក្រដាសស បើសិនជាមិនធ្វើការអប់រំឱ្យដើរលើផ្លូវល្អទេ អាចធ្វើឱ្យពួកគេដើរលើផ្លូវខុស ហើយឈានដល់ការប្រព្រឹត្តអំពើល្មើសច្បាប់ថែមទៀតផង។
ព្រះតេជគុណមានថេរដីកាថា៖ «ស្ថាប័ន៣ ដែលយើងគិតថា ជាស្ថាប័នដែលសំខាន់នៅកម្ពុជាយើងហ្នឹង មានស្ថាប័នរដ្ឋខាងផ្នែកអប់រំ ស្ថាប័នខាងផ្នែកសាសនាមានវត្តអារាម និងស្ថាប័នគ្រួសារ។ អញ្ចឹងស្ថាប័នទាំង៣ ត្រូវសហការគ្នាដើម្បីឱ្យក្មេងៗ បានយល់ជ្រួតជ្រាបអំពីរឿងសីលធម៌ កត្តញ្ញូ ដឹងគុណ។ ក្នុងនាមយើងជាឪពុកម្តាយ ជាអាណាព្យាបាល ជាគ្រូ ជាព្រះសង្ឃ ហើយនិងខាងស្ថាប័នរដ្ឋ មាននាយករដ្ឋមន្ត្រី យើងលើកតម្កើង ផ្តល់តម្លៃ ណែនាំឱ្យកូនសិស្ស ឬកូនៗចេះគោរពដល់ចាស់ព្រឹទ្ធាចារ្យ គោរពដល់លោកគ្រូអ្នកគ្រូ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង សាទរចំពោះការលើកទឹកចិត្តឱ្យមានការបណ្តុះបណ្តាលសិស្ស និស្សិត ឱ្យចេះគោរពចាស់ទុំ។
លោកបន្ថែមថា ដើម្បីរក្សានូវប្រពៃណីរបស់ជាតិដែលបានបន្សល់ពីដូនតាមកឱ្យបានគង់វង្ស លុះត្រាតែរដ្ឋាភិបាលជំរុញទៅស្ថាប័នពាក់ព័ន្ធទាំងអស់ ត្រូវធ្វើការផ្សព្វផ្សាយឱ្យបានទូលំទូលាយ និងអប់រំដល់ប្រជាពលរដ្ឋ ជាពិសេសយុវជន សិស្ស និស្សិត យល់ដឹងពីគុណធម៌ សីលធម៌ ក្នុងការគោរពមនុស្សចាស់ ព្រឹទ្ធាចារ្យ ទើបទប់ស្កាត់បញ្ហាប្រឈមទាំងនោះបានប្រសិទ្ធភាពខ្ពស់។
ដើម្បីឱ្យសង្គមមានភាពវិជ្ជមានសម្រាប់សិស្ស និស្សិត លោកផ្តល់ជាអនុសាសន៍ដូចនេះថា៖ «ទី១ គឺត្រូវតែប្រឆាំងរឿងគ្រឿងញៀនឱ្យបានជាដាច់ខាត។ ទី២ ឱ្យមានដាក់កម្រិតការប្រើប្រាស់គ្រឿងស្រវឹង គឺមិនមែនគ្រប់វ័យអាចផឹកស្រាបាន ខណៈការផ្សាយពាណិជ្ជកម្មស្រាមានពេញទឺកពេញដី ហាក់ដូចយើងនាំយុវជនឱ្យស្គាល់ថា ស្រាវាអស្ចារ្យអញ្ចឹង។ វាជាកំហុសឆ្គងដ៏ធំ!»។
លោក យង់ គឹមអេង បន្តថា៖ «ទី៣ យើងគួរតែកែប្រែទម្លាប់អវិជ្ជមានមួយចំនួនដែលធ្វើឱ្យយុវជនអាចយកតម្រាប់តាម ដូចជាការប្រើហិង្សានៅទីសាធារណៈជាដើម។ កុំឱ្យយុវជនមើលឃើញថា អ្នកមានអំណាចឱ្យតែអ្នកណាប៉ះគឺអត់បាន ប្រើហិង្សា សម្លុត គម្រាមកំហែងអី ដូចជាសូម្បីគ្រោះថ្នាក់ចរាចរណ៍ មានដកកាំភ្លើង។ អាហ្នឹងហើយជារឿងមួយដែលយើងត្រូវពង្រឹងការអនុវត្តច្បាប់ឈានទៅរកការកែប្រែឥរិយាបថសង្គម។ ជាពិសេសមន្ត្រី ត្រូវអនុវត្តនូវក្រមសីលធម៌ឱ្យបានល្អ ជាគម្រូដល់ប្រជាពលរដ្ឋ»។
របាយការណ៍របស់ក្រសួងសង្គមកិច្ច អតីតយុទ្ធជន និងយុវនីតិសម្បទា កាលពីក្នុងឆ្នាំ២០១៣ បង្ហាញថា មនុស្សវ័យចាស់អាយុពី៦០ឆ្នាំឡើង មានចំនួនជាង ១លាននាក់ ឬស្មើប្រមាណជាង៨%នៃចំនួនប្រជាជនសរុប។ ចំនួនមនុស្សចាស់នៅកម្ពុជា ត្រូវបានគេព្យាករណ៍ថា នឹងកើនឡើងដល់ប្រមាណ២លាននាក់នៅឆ្នាំ២០៣០ ស្មើនឹង១១% នៃប្រជាជនសរុប៕
