គណៈរដ្ឋមន្ត្រីបានសម្រេចកែសម្រួលរបៀបវារៈនៃកិច្ចប្រជុំរបស់ខ្លួននៅថ្ងៃសុក្រ ទី៨ ខែតុលា ដោយដាក់បញ្ចូលរបៀបវារៈ ស្តីពី វិសោធនកម្មច្បាប់រដ្ឋធម្មនុញ្ញ សំដៅការកំណត់លក្ខខណ្ឌថ្នាក់ដឹកនាំជាតិមានសញ្ជាតិខ្មែរតែមួយ។
អ្នកនាំពាក្យរដ្ឋាភិបាលលោក ផៃ ស៊ីផាន បានសរសេរនៅលើទំព័រហ្វេសប៊ុករបស់លោកនៅល្ងាចថ្ងៃទី៧ ខែតុលា នេះថា របៀបវារៈនៃកិច្ចប្រជុំពេញអង្គគណៈរដ្ឋមន្រ្តី នាថ្ងៃទី៨ ខែតុលា ឆ្នាំ២០២១ នៅវិមានសន្តិភាព ត្រូវបានកែសម្រួលឡើងវិញ ដោយយោងតាមប្រសាសន៍ណែនាំរបស់លោកនាយករដ្ឋមន្ត្រី ហ៊ុន សែន នាថ្ងៃទី៦ ខែតុលា ឆ្នាំ២០២១។ ក្នុងនោះ កិច្ចប្រជុំនឹងពិភាក្សាទៅលើសេចក្តីព្រាងច្បាប់ធម្មនុញ្ញ ស្តីពី វិសោធនកម្មមាត្រា១៩ថ្មី មាត្រា៨២ថ្មី មាត្រា១០៦ថ្មី (មួយ) មាត្រា១១៩ថ្មី និងមាត្រា១៣៧ថ្មី នៃរដ្ឋធម្មនុញ្ញ និងមាត្រា៣ នៃច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិ។
លោក ផៃ ស៊ីផាន បានប្រាប់វីអូឌីបន្ថែមថា វិសោធនកម្មរដ្ឋធម្មនុញ្ញមាត្រាខាងលើនេះ គឺអាចទាក់ទងការកំណត់ «លក្ខខណ្ឌនៃបេក្ខភាពរបស់ថ្នាក់ដឹកនាំស្ថាប័នជាតិទាំងបីមានសញ្ជាតិខ្មែរតែមួយ»។ លោកបន្តថា មាត្រាខាងលើនេះ គឺមិនបានចែងអំពីការកំណត់លក្ខខណ្ឌនេះទេ។ ដូច្នេះវិសោធនកម្មមាត្រាទាំងប៉ុន្មានខាងលើនេះ ទំនងជាមានការសរសេរបន្ថែម ស្តីពី ការកំណត់លក្ខខណ្ឌនេះ។
លោកនាយករដ្ឋមន្ត្រី ហ៊ុន សែន កាលពីថ្ងៃទី៦ តុលា បានបញ្ជាឱ្យរដ្ឋមន្ត្រីក្រសួងយុត្តិធម៌លោក កើត រិទ្ធ សិក្សារៀបចំធ្វើសេចក្តីព្រាងច្បាប់ វិសោធនកម្មរដ្ឋធម្មនុញ្ញ ឬសេចក្តីព្រាងច្បាប់អង្គការដែលចេញពីរដ្ឋាភិបាល ឬជាសេចក្តីស្នើច្បាប់ដែលចេញពីព្រឹទ្ធសភា និងរដ្ឋសភា ដោយកំណត់ថា ថ្នាក់ដឹកនាំជាតិដែលកាន់តួនាទីជាប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញត្រូវមានសញ្ជាតិខ្មែរតែមួយ។ ភ្លាមៗ ក្រោយពីការប្រកាសនេះ ស្ថាប័នរដ្ឋ និងឯកជន បានចេញសេចក្តីប្រកាសព័ត៌មាននិងញត្តិគាំទ្រយ៉ាងព្រោងព្រាត។
នៅក្នុងសេចក្តីប្រកាសគាំទ្រមួយរបស់ក្រសួងយុត្តិធម៌បានលើកឡើងថា ការកំណត់បែបនេះ គឺជាការធានាទាំងខាងផ្លូវច្បាប់ ទាំងខាងនយោបាយ ដែលឱ្យឥស្សរជនជាន់ខ្ពស់ដែលកាន់មុខតំណែងជាមេដឹកនាំនៃស្ថាប័នកំពូលទាំង ៤ របស់ជាតិ ដែលមានចែងក្នុងរដ្ឋធម្មនុញ្ញ ត្រូវប្រកាន់ខ្ជាប់នូវភាពស្មោះត្រង់ចំពោះជាតិ និងមាតុភូមិកម្ពុជា ធ្វើការដឹកនាំប្រទេសដោយតម្កល់ឧត្តមប្រយោជន៍ជាតិជាធំ ក៏ដូចជាការប្រឆាំងនឹងការជ្រៀតជ្រែកពីខាងក្រៅចូលមកក្នុងកិច្ចការផ្ទៃក្នុងនៃការដឹកនាំជាតិរបស់កម្ពុជា។
បទបញ្ជារបស់លោកនាយករដ្ឋមន្ត្រី ហ៊ុន សែន នេះ ទំនងជាបានឆ្លើយតបទៅនឹងអតីតប្រធានគណបក្សសង្គ្រោះជាតិលោក សម រង្ស៊ី ដែលបានបង្ហោះសារនៅលើទំព័រហ្វេសប៊ុកតាមការចុះផ្សាយរបស់កាសែត The Gardian របស់អង់គ្លេសថា លោកនាយករដ្ឋមន្ត្រី ហ៊ុន សែន បានទិញសញ្ជាតិនិងលិខិតឆ្លងដែនពីប្រទេស Cyprus។ ប៉ុន្តែផ្អែកតាមព័ត៌មានចុងក្រោយពីមន្ត្រីរដ្ឋាភិបាលថា កាសែត The Gardian របស់អង់គ្លេសបានសម្រេចកែតម្រូវខ្លឹមសារព័ត៌មានរបស់ខ្លួនហើយ ក្រោយពីមេធាវីរបស់រដ្ឋាភិបាលកម្ពុជាបានព្រមានប្តឹងនិងប្រតិកម្មពីមន្ត្រីជាន់ខ្ពស់កម្ពុជារួចមក៕
