ប្អូនរបស់កញ្ញា អេង ម៉ាឡៃ ហៅ សូ មេត្តា ជាសកម្មជនសិទ្ធិមនុស្សនៅក្នុងក្រុមយុវជនខ្មែរថាវរៈ បានបង្ហាញការព្រួយបារម្ភពីជីវិតបងស្រីនៅក្នុងពន្ធនាគារក្រោយពេលមើលឃើញស្ថានភាពស្គមខ្លាំង និង ញ័រដៃញ័រជើង។
កញ្ញា អេង វ៉ាន់ឌី ជាប្អូនស្រីរបស់កញ្ញា សូ មេត្តា បានឱ្យដឹងថា កញ្ញាបានទៅសួរសុខទុក្ខបងស្រីនៅមណ្ឌលអប់រំកែប្រែ ម២ នៅថ្ងៃទី៥ ខែតុលា កន្លងទៅនេះ ក្រោយពេលអាជ្ញាធរហាមមិនឱ្យទៅសួរសុខទុក្ខជិត៥ខែក្រោមហេតុផលបង្ការមេរោគកូវីដ-១៩។ កញ្ញា ព្រួយបារម្ភពីអាយុជីវិតក្រោយពេលឃើញបងស្រីប្រែប្រួលខ្លាំង។
កញ្ញា អេង វ៉ាន់ឌី៖ «ប្រែប្រួលខ្លាំងមែនទែនស្គមខ្មៅ ហើយរញីរញ័រដូចមនុស្សចាស់ចឹង។ និយាយជាមួយខ្ញុំអីដូចអត់មានភាពរឹងមាំនៅក្នុងខ្លួន»។
កញ្ញា សូ មេត្តា ជាយុវនារីម្នាក់នៅក្នុងក្រុមខ្មែរថាវរៈដែលតែងតែចូលរួមក្នុងសកម្មភាពតវ៉ា ឬ យុទ្ធនាការនានាដោយអះអាងថា ដើម្បីលើកកម្ពស់សិទ្ធិមនុស្ស លទ្ធិប្រជាធិបតេយ្យ បរិស្ថាន និងការគោរពច្បាប់ជាដើម។
កញ្ញា សូ មេត្តា ត្រូវសមត្ថកិច្ចចាប់ខ្លួននៅថ្ងៃទី៧ ខែកញ្ញា ឆ្នាំ២០២០ ខណៈក្រុមយុវជន៦នាក់ផ្សេងទៀត ក៏ត្រូវចាប់ខ្លួនបន្តបន្ទាប់ដែរ នៅពេលដែលពួកគេតវ៉ាទាមទារឱ្យដោះលែងលោក រ៉ុង ឈុន។
កញ្ញា អេង វ៉ាន់ឌី ឱ្យដឹងទៀតថា កញ្ញា សូ មេត្តា កំពុងមានជំងឺរមាស់ ជំងឺដែលដួលបាក់ជើងក្នុងពន្ធនាគាររើឡើងវិញ និងមានបញ្ហាផ្លូវចិត្តស្មុគស្មាញច្រើនទៀតផង។
កញ្ញា អេង វ៉ាន់ឌី៖ «ជំងឺគាត់ស្ត្រេស អាឡាក់ស៊ីសើស្បែក និងជើងគាត់ឥឡូវឈឺទៀតហើយ។ ជំងឺគាត់ហ្នឹងរមាស់ពេញខ្លួន កន្ទួលៗពេញខ្លួន និងជំងឺបេះដូងរបៀបខ្សោយ»។
មន្ត្រីជាន់ខ្ពស់សមាគមការពារសិទ្ធិមនុស្សអាដហុក លោក សឹង សែនករុណា លើកឡើងថា ពន្ធនាគារជាកន្លែងអប់រំកែប្រែមិនមែនកន្លែងធ្វើទុក្ខដល់អ្នកជាប់ឃុំទេ។ លោកជំរុញ ដល់មន្ត្រីពាក់ព័ន្ធយកចិត្តទុកដាក់ដោះស្រាយបញ្ហានេះ។
លោក សឹង សែនករុណា៖ «បើសិនជាមានការលើកឡើង ហើយករណីបែបហ្នឹងកើតឡើង ចំពោះបងស្រីរបស់ប្អូនស្រីម្នាក់ដែលបានលើកឡើង កញ្ញា សូ មេត្តាហ្នឹង គម្បីមានការពិនិត្យមើល ហើយយកគាត់ទៅព្យាបាលនៅមន្ទីរពេទ្យជំនាញដែលត្រូវជាមួយជំងឺរបស់គាត់ ដើម្បីឱ្យមានសុខភាពល្អប្រសើរឡើងវិញ»។
អ្នកនាំពាក្យអគ្គនាយកដ្ឋានពន្ធនាគារ លោក នុត សវនា អះអាងថា តាមរបាយការណ៍របស់មន្ត្រីពន្ធនាគាររាយការណ៍ប្រាប់លោកថា កញ្ញា សូ មេត្តា មានសុខភាពផ្លូវកាយនិងផ្លូវចិត្តមិនមានបញ្ហាអ្វីធ្ងន់ធ្ងរទេ។ លោកបន្តថា ចំពោះបញ្ហាផ្លូវចិត្តអ្នកជាប់ឃុំមានខ្លះៗជៀសមិនផុតនោះទេ។
លោក នុត សវនា៖ «ធម្មតាដូចខ្ញុំបានជម្រាបហើយ អ្នកទោសដទៃក៏មានបញ្ហាផ្លូវចិត្តដូចតែគ្នាហ្នឹង! ហើយក៏មិនកើតមានតែនៅស្រុកខ្មែរយើងដែរ។ តែបាត់សេរីភាពហើយ ឥឡូវគ្រាន់តែគេបិទតំបន់ក្រហម តំបន់លឿងហ្នឹងយើងក៏មានបញ្ហាតប់ប្រមល់នៅក្នុងផ្ទះ បញ្ហាហ្នឹងជារឿងទូទៅទេ កុំសង្កត់ធ្ងន់ថា ជារឿងធំដុំ»។
ទោះយ៉ាងលោកបន្តថា នឹងយកចិត្តទុកដាក់លើករណីនេះ៖ «មិនមែនថា ខ្ញុំមិនយកចិត្តទុកដាក់រៀងហ្នឹងទេ ខ្ញុំបានឱ្យមន្ត្រីយើងគាត់តាមដានហើយថា អាចទៅជាវិបត្តិផ្លូវចិត្តអីឬយ៉ាងណា? ចាំយើងត្រួតពិនិត្យតាមហ្នឹង!»។
កញ្ញា សូ មេត្តា ជាយុវជនម្នាក់ក្នុងចំណោមយុវជនផ្សេងទៀត ដែលមជ្ឈមណ្ឌលសិទ្ធិមនុស្សកម្ពុជាដាក់ឈ្មោះ និងរូបថតធ្វើយុទ្ធនាការក្នុងឱកាសបុណ្យភ្ជុំបិណ្ឌ១៥ថ្ងៃនេះ ដើម្បីទាមទារឱ្យមានការការដោះលែង។ យុទ្ធនាការបានបញ្ជាក់ថា យុវជនទាំងនេះធ្វើសកម្មភាពដើម្បីឱ្យមានការគោរពសិទ្ធិមនុស្ស លទ្ធិប្រជាធិបតេយ្យ យុត្តិធម៌សង្គម និង បរិស្ថាន ជាដើម ដែលគួរតែមានការលើកទឹកចិត្ត៕
អត្ថបទដោយ ប៉ា តុងចិន