ក្រសួងយុត្តិធម៌បានប្រកាសពីការរកឃើញមន្ត្រីរាជការក្រោម ឱវាទចំនួន ៥នាក់ មានវិជ្ជមានកូវីដ-១៩ ក្រោយពីវិលត្រលប់មកពីឈប់សម្រាកបុណ្យភ្ជុំបិណ្ឌវិញ។
ក្រសួងយុត្តិធម៌នៅថ្ងៃ ១១ តុលា ម្សិលមិញនេះ បានធ្វើតេស្តរហ័សលើថ្នាក់ដឹកនាំ និងមន្ត្រីរាជការក្រសួងយុត្តិធម៌សរុបចំនួន ៤៦៤ រូប ហើយក្នុងនោះ ក្រសួងបានរកឃើញបុគ្គលិកមន្ត្រីរាជការចំនួន ៥រូប មានវិជ្ជមានកូវីដ-១៩ ក្នុងកម្រិតស្រាល និងពុំមានចេញរោគសញ្ញាណាមួយឡើយ។ ក្រសួងមិនបានបញ្ជាក់ពីអត្តសញ្ញាណរបស់មន្ត្រីរាជការទាំង ៥ រូបដែលវិជ្ជមានវីរុសកូវីដ-១៩ នេះទេ។
ទោះយ៉ាងនេះក្តី ក្រសួងយុត្តិធម៌បានអនុញ្ញាតឱ្យមន្ត្រីរាជការទាំង ៥រូប សម្រាកព្យាបាលជំងឺកូវីដ-១៩ នៅតាមផ្ទះរៀងៗខ្លួន ស្របតាម «នីតិវិធីប្រតិបត្តិស្តង់ដារ សម្រាប់គ្រប់គ្រង ថែទាំ និងព្យាបាលអ្នកជំងឺកូវីដ-១៩ នៅតាមផ្ទះ»។ ដោយឡែក ចំពោះអ្នកពាក់ព័ន្ធដោយផ្ទាល់វិញ ក្រសួងបានតម្រូវឱ្យពួកគេធ្វើចត្តាឡីស័ក ព្រមទាំងអនុវត្តយ៉ាងខ្ជាប់ខ្ជួននូវវិធានការសុវត្ថិភាពតាមគោលការណ៍ណែនាំរបស់ក្រសួងសុខាភិបាល។
រដ្ឋាភិបាលកម្ពុជាបានតម្រូវឱ្យបុគ្គលិក មន្ត្រីរាជការ និងកម្មករ កម្មការិនីរោងចក្រកាត់ដេរនៅភ្នំពេញធ្វើតេស្តរកជំងឺកូវីដ-១៩ ក្រោយពីវិលត្រលប់មកពីចូលរួមពិធីបុណ្យភ្ជុំបិណ្ឌវិញ៕