រដ្ឋាករទឹកស្វយ័តរាជធានីភ្នំពេញ ព្រមានចាត់វិធានការច្បាប់យ៉ាងតឹងរ៉ឹងចំពោះម្ចាស់ផ្ទះជួលណាដែលលក់ទឹកបន្តជូនដល់កម្មករនិងនិស្សិតលើសពី ៨០០រៀលក្នុងមួយម៉ែត្រគូប ដោយបំពានលើកិច្ចសន្យា។
ការព្រមាននេះធ្វើឡើងបន្ទាប់ពីសមាគមមណ្ឌលព័ត៌មានកម្មករ កាលពីពេលថ្មីៗនេះ រកឃើញថា មានម្ចាស់ទីតាំងបន្ទប់ជួលមួយចំនួននៅរាជធានីភ្នំពេញ បានលក់ទឹកក្នុងថ្លៃចន្លោះពី១ ០០០រៀល ទៅ៣ ០០០រៀលក្នុងមួយម៉ែត្រគូប ខណៈតម្លៃរដ្ឋាករទឹកលក់ឱ្យម្ចាស់ផ្ទះជួលត្រឹមតែ៧០០រៀលក្នុងមួយម៉ែត្រគូប និងតម្រូវឱ្យម្ចាស់ផ្ទះជួលលក់បន្តទៅឱ្យកម្មករ-កម្មការិនី និងសិស្ស-និស្សិត តម្លៃត្រឹមតែ៨០០រៀលក្នុងមួយម៉ែត្រគូបតែប៉ុណ្ណោះ។
ក្នុងសេចក្ដីប្រកាសព័ត៌មានរបស់រដ្ឋាករទឹកស្វយ័តក្រុងភ្នំពេញ បានឱ្យដឹងកាលពីថ្ងៃទី១៣ ខែតុលាថា ក្រុមការងារជំនាញបានចុះស្រាវជ្រាវរកឃើញថា ម្ចាស់ទីតាំងបន្ទប់ជួលមួយចំនួននៅរាជធានីភ្នំពេញ ពិតជាលក់ទឹកជូនកម្មករ-កម្មការិនី និងសិស្ស-និស្សិត ក្នុងតម្លៃចន្លោះពី១ ០០០រៀល ទៅ៣ ០០០រៀលក្នុងមួយម៉ែត្រគូប ផ្ទុយពីការព្រមព្រៀងក្នុងកិច្ចសន្យាជាមួយរដ្ឋាករទឹកប្រាកដមែន។
ករណីនេះ រដ្ឋាករទឹក ព្រមានចាត់វិធានការច្បាប់យ៉ាងតឹងរ៉ឹងលើម្ចាស់ផ្ទះជួលឬម្ចាស់បន្ទប់ជួល បើសិនជានៅតែបន្តលក់ទឹកជូនដល់កម្មករនិងនិស្សិតលើសពី៨០០រៀលក្នុងមួយម៉ែត្រគូប ដោយបំពានលើកិច្ចសន្យាទៀតនោះ ។
រដ្ឋាករទឹកស្វយ័តក្រុងភ្នំពេញ សរសេរថា៖ «រដ្ឋាករទឹកស្វយ័តក្រុងភ្នំពេញ នឹងមានវិធានការ [ទី១] ពង្រឹងបន្ថែមនូវការអនុវត្តកិច្ចសន្យាខាងលើ និងចាត់វិធានការយ៉ាងតឹងរ៉ឹងចំពោះម្ចាស់ផ្ទះដែលលក់ទឹកបន្ត ដោយប្រើប្រាស់កិច្ចសន្យាជាទឹក ដើម្បីគ្រប់គ្រងការលក់ទឹកជូនដល់កម្មករ-កម្មការិនី និងសិស្ស-និស្សិត។ [ទី២] ពិនិត្យនិងកែលម្អកិច្ចសន្យាលក់ទឹកបន្តឱ្យមានលក្ខណៈកាន់តែប្រសើរ ដើម្បីធានាបាននូវប្រសិទ្ធភាពអនុវត្ត ស្របតាមអនុសាសន៍ដ៏ខ្ពង់ខ្ពស់របស់ប្រមុខរាជរដ្ឋាភិបាល ក្នុងការជួយដល់កម្មករ-កម្មការិនី និងសិស្ស-និស្សិត»។
រដ្ឋាករទឹក បន្ថែមថា ក្រោយពីចុះស្រាវជ្រាវដល់ទីតាំងផ្ទាល់ គឺម្ចាស់ទីតាំងបន្ទប់ជួលមួយចំនួនបានលក់ទឹកបន្ត ផ្ទុយពីការព្រមព្រៀងក្នុងកិច្ចសន្យា ដោយហេតុថា សម្ពាធទឹកនៅទីតាំងរបស់ពួកគាត់ខ្សោយ ទាមទារបំពាក់ម៉ូទ័របូមជំនួយដែលត្រូវចំណាយខ្ពស់លើថាមពលអគ្គិសនី។
ករណីនេះធ្វើឱ្យម្ចាស់ផ្ទះជួលមួយចំនួនបានគិតតម្លៃបំពេញបន្ថែមទៅលើភាពលម្អៀងរវាងនាឡិកាមេ និងនាឡិកាចែកចាយតាមបន្ទប់ជួល រួមទាំងការបាត់បង់ទឹកឬលេចធ្លាយតាមបណ្ដាញ តំណភ្ជាប់ក្នុងបរិវេណផ្ទះជួលជាដើម ហើយថ្លៃលក់នេះក៏ទទួលបានការព្រមព្រៀងគ្នារវាងអ្នកជួលនិងម្ចាស់ផ្ទះផងដែរ។
រដ្ឋាករទឹកស្វយ័តក្រុងភ្នំពេញ ក៏បានសំណូមពរដល់សារព័ត៌មានទាំងឡាយ ក៏ដូចជាសមាគមមណ្ឌលព័ត៌មានកម្មករ ព្រមទាំងកម្មករ-កម្មការិនី និងសិស្ស-និស្សិតទាំងអស់ ផ្តល់ព័ត៌មានជាក់លាក់ដល់រដ្ឋាករទឹកស្វយ័តក្រុងភ្នំពេញ អំពីបាតុភាពមិនប្រក្រតីណាមួយដែលកើតឡើង ពាក់ព័ន្ធនឹងការអនុវត្តគោលការណ៍កំណត់ថ្លៃទឹកស្អាតនេះផងដែរ។
ប្រធាននាយកដ្ឋានអាជីវកម្មនៃរដ្ឋាករទឹកស្វយ័តក្រុងភ្នំពេញ លោក សោម សុវណ្ណ ប្រាប់ វីអូឌី នៅថ្ងៃទី១៤ ខែតុលានេះថា លោកពុំទាន់អាចពន្យល់ពីកម្រិតច្បាប់សម្រាប់អនុវត្តថាតឹងរ៉ឹងប៉ុណ្ណានៅឡើយទេ ដោយសាររដ្ឋាករទឹកកំពុងធ្វើការជាមួយរដ្ឋបាលរាជធានីភ្នំពេញ ដើម្បីយកច្បាប់មកអនុវត្ត។ យ៉ាងណា លោកថា សម្រាប់រដ្ឋាករទឹក មានសមត្ថកិច្ចអាចធ្វើបានដូចជា ផាកពិន័យ និងកាត់បណ្ដាញទឹក។
លោក សោម សុវណ្ណ បញ្ជាក់ថា៖ «អាហ្នឹងវាជាសមត្ថកិច្ចរបស់សាលារាជធានីភ្នំពេញ ពាក់ព័ន្ធការអនុវត្តច្បាប់កិច្ចសន្យា។ បើខាងខ្ញុំនេះ ជាគោលការណ៍មានតែកាត់បណ្ដាញឬការផាកពិន័យ នេះជាសមត្ថភាពនិងសមត្ថកិច្ចដែលខ្ញុំអាចធ្វើបាន។ បើលើសពីហ្នឹង លុះត្រាអាជ្ញាធរ [មន្ត្រីរដ្ឋាករទឹក និងសាលារាជធានីភ្នំពេញ] គាត់កំណត់សិន»។
កម្មការិនីធ្វើការនៅរោងចក្រមួយនៅតំបន់ព្រៃទា រាជធានីភ្នំពេញ កញ្ញា ច្រឹក ដាវី បានឱ្យដឹងនៅថ្ងៃព្រហស្បតិ៍នេះថា មានកម្មករជាច្រើនដែលប្រើតម្លៃទឹកថ្លៃជាងរដ្ឋកំណត់ ខណៈការដោះស្រាយរបស់អាជ្ញាធរនៅតែមានកម្រិត។ កញ្ញាថា អាជ្ញាធរគួរដឹងពីតួនាទីរបស់ខ្លួនក្នុងការដោះស្រាយ ជាជាងប្រាប់ឱ្យកម្មកររាយការណ៍ ពេលម្ចាស់ផ្ទះជួលលក់ទឹកថ្លៃជាងការកំណត់។
កញ្ញាថា៖ «មិនចាំបាច់ចាំកម្មកររាយការណ៍ទេ សំខាន់គាត់ [រដ្ឋាករទឹក] ត្រូវដឹងតួនាទីការងាររបស់ខ្លួន។ [ក្រសួងឧស្សាហកម្ម] គាត់បានចេញសេចក្ដីសម្រេចតម្លៃទឹកត្រឹម៨០០រៀលហ្នឹងតាំង២០១៧ម៉្លេះ ប៉ុន្តែមិនទាន់ឃើញមានការអនុវត្ត អ៊ីចឹងសួរថាចេញមកធ្វើអី? កម្មករខ្លះអត់ដឹងទេ អ៊ីចឹងគាត់នៅតែប្រើទឹកតម្លៃ២ ០០០រៀល រហូតដល់៤ ០០០រៀលរហូតអ៊ីចឹង? គាត់ [មន្ត្រី] មានតួនាទីក្នុងការដោះស្រាយ សហការជាមួយម្ចាស់ផ្ទះ ដើម្បីធានាតម្លៃតាមសេចក្ដីសម្រេច [៨០០រៀលក្នុងមួយម៉ែត្រគូប] មិនមែនទម្លាក់បន្ទុកឱ្យកម្មករពេលមានបញ្ហាតម្លៃថ្លៃហើយ ឱ្យគ្នាទៅប្តឹងទៀត ចុះតួនាទីរបស់គាត់នៅឯណា?»
បុគ្គលិកគាំទ្រកម្មវិធីសមាគមមណ្ឌលព័ត៌មានកម្មករ កញ្ញា សុត ផង បានលើកឡើងដែរថា អ្វីដែលរដ្ឋាករទឹកលើកឡើង គឺជារឿងដដែលៗ និងមិនមានហេតុផលថ្មីទេ។ កញ្ញាថា រដ្ឋាភិបាលគួរព្យាយាមបំពេញតួនាទីរបស់ខ្លួនជាជាងព្យាយាមរកហេតុផលមកទម្លាក់ឱ្យកម្មករជាអ្នកទទួលខុសត្រូវ។
កញ្ញាថា៖ «ទាក់ទងជាមួយហេតុផលដែលរដ្ឋាករទឹកលើកឡើងហ្នឹង វាមិនមែនជាហេតុផលថ្មីទេ មានន័យថា គាត់បានលើកអាហ្នឹងឡើងនៅពេលដែលគាត់ជួបពិភាក្សាជាមួយសមាគមមណ្ឌលព័ត៌មានកម្មករ ហើយយើងក៏បានលើកហេតុផលហ្នឹងដែរនៅពេលយើងធ្វើសិន្និសីទកាសែត ព្រោះដូចយើងជជែកអ៊ីចឹងថាអាហ្នឹងជាបញ្ហា វាជាហេតុផល។ ប៉ុន្តែតើតួនាទីរបស់រដ្ឋាភិបាលនៅឯណា? ហេតុអីបានព្យាយាមយកហេតុផល ១, ២, ៣ ហ្នឹង មកទម្លាក់ឱ្យកម្មករជាអ្នកទទួលខុសត្រូវ ខណៈដែលកម្មករជាអ្នកជួលផ្ទះ ហើយប្រាក់ឈ្នួលតិចតួច»។
មុនរដូវកាលបោះឆ្នោតជាតិអាណត្តិទី៦មកដល់ កាលពីចុងខែសីហា ឆ្នាំ២០១៧ លោកនាយករដ្ឋមន្រ្តី ហ៊ុន សែន បានប្រកាសថា ចាប់ពីថ្ងៃទី១ ខែកញ្ញា ឆ្នាំ២០១៧ តទៅ តម្លៃប្រើប្រាស់ទឹកសម្រាប់កម្មករនៅតាមបន្ទប់ជួល នឹងចំណាយត្រឹម៨០០រៀលប៉ុណ្ណោះក្នុងមួយម៉ែត្រគូប។
ក្រោយការលើកឡើងរបស់លោកនាយករដ្ឋមន្ត្រី ហ៊ុន សែន ក្រសួងឧស្សាហកម្មក៏បានចេញសេចក្តីសម្រេចមួយ ដោយកំណត់ឱ្យម្ចាស់ផ្ទះជួលទាំងអស់លក់ទឹកស្អាតតម្លៃ៨០០រៀលក្នុង១ម៉ែត្រគូប ដល់និស្សិតនិងកម្មករ ទៅតាមបទបញ្ជារបស់នាយករដ្ឋមន្ត្រី៕