ប្រជាពលរដ្ឋ អាជីវករ និងបុគ្គលិកប្រមូលសំរាមនៅរាជធានីភ្នំពេញ ស្នើឱ្យភាគីពាក់ព័ន្ធ ពិសេសអាជ្ញាធរសាលារាជធានីភ្នំពេញផ្សព្វផ្សាយបន្ថែមទៀត ពីរបៀបនៃការបែងចែកសំរាម ខណៈដែលថ្ងៃអនុវត្តន៍ការផាកពិន័យនឹងធ្វើឡើងចាប់ពីខែវិច្ឆិកាខាងមុខនេះ។
ព្រះតេជគុណ ហ៊ីន ចាន់មករា ជាសមណសិស្សវិទ្យល័យព្រះសុរាម្រឹតបានលើកឡើងថា បច្ចុប្បន្ននេះប្រជាពរដ្ឋនៅរាជធានីភ្នំពេញ នៅមិនទាន់បានទុកដាក់សំរាមឱ្យបានត្រឹមត្រូវនៅឡើយទេ។ លើសពីនេះប្រជាពលរដ្ឋមួយចំនួនពួកគេបានដឹងអំពីសេចក្ដីណែនាំ ក៏ដូចជាច្បាប់ជាដើម ក៏ប៉ុន្តែពួកគេនៅតែបន្តមិនអនុវត្តន៍ការទុកដាក់សំរាមឱ្យបានត្រឹមត្រូវនៅឡើយ។
ព្រះអង្គសង្ឃឹមថា ភាគីពាក់ព័ន្ធពិសេសអាជ្ញាធរ គួតែផ្សព្វផ្សាយបន្ថែមទៀត ដល់ប្រជាពលរដ្ឋ។ ចំណែកឯប្រជាពលរដ្ឋទាំងអស់ពិសេសនៅរាជធានីភ្នំពេញ គួរមានការបែងចែកសំរាមឱ្យបានត្រឹមត្រូវ មានការទទួលខុសត្រូវ និងចូលរួមកាត់បន្ថយការប្រើប្រាស់សំរាមក៏ដូចជា ចេះកែច្នៃសំរាមសម្រាប់ប្រើប្រាស់ឡើងវិញផងដែរ។
ព្រះអង្គលើកឡើងថា៖ «ការណែនាំ គឺវានៅតែខ្វះខាតអ៊ីចឹង ត្បិតថា ប្រជាពលរដ្ឋបានឃើញមែន ប៉ុន្តែការបានឃើញនឹងទៀតសោតពួកគាត់មិនទាន់បានអនុវត្តតាមបាននោះទេជាចុងក្រោយអាត្មាសង្ឃឹមថា មិនថាតែរាជធានីភ្នំពេញ ឬតាមបណ្ដាខេត្តផ្សេងៗឱ្យមានការបែងចែកសំរាមឱ្យបានច្បាស់លាស់ ហើយមានភាពទទួលខុសត្រូវលើសំរាមទាំងអស់ហ្នឹង ឬក៏ទិញរបស់ហ្នឹងយកទៅកែច្នៃឡើងវិញដើម្បីអាចប្រើប្រាស់ម្ដងទៀត»។
ម្ចាស់ហាងកាហ្វេ ដើមកាហ្វេ លោក កែន សំបូរ បានលើកឡើងថា ការបែកចែកសំរាមនេះគួរតែធ្វើយូរហើយ ហើយចំពោះការទុកដាក់នេះមិនមែនជារឿងពិបាកនោះទេ ប្រសិនបើប្រជាពលរដ្ឋមានការសហការគ្នារវាងរដ្ឋ និងប្រជាពលរដ្ឋ ពិសេសរដ្ឋបង្កើនការផ្សព្វផ្សាយជូនប្រជាពលរដ្ឋ។
លោកលើកឡើកថា៖ «ជាចុងក្រោយសូមឱ្យសាលារាជធានីក្រុងនៅពេលចេញច្បាប់ជួយផ្សព្វផ្សាយឱ្យទូលំទូលាយឱ្យដូចព័ត៌មានស្រាបៀរផង និងសំណូមពរដល់ប្រជាជនមានចំណេះដឹង និងស្វែងយល់ពីផលប៉ះពាល់នៃការចោលសំរាម ព្រោះឃើញជាក់ស្តែងប្រជាជនបើនិយាយអំពីចំណេះដឹងនៃការអនុវត្តច្បាប់ និងការយល់ដឹងពីផលប៉ះពាល់រឿងសំរាមហ្នឹង គឺមិនមានទេ»។
ប្រធានរដ្ឋបាលទូទៅនិងជាជំនួយការតំណាងការិយាល័យក្រុមហ៊ុនប្រមូលសំរាម Mizuda លោក សៀង សាមុទ្ទមាស បានលើកឡើងថា បច្ចុប្បន្នមិនទាន់មានការបែងចែកប្រភេទសំរាមទេ គឺការប្រមូលសំរាមធ្វើឡើងក្នុងស្ថានភាពធម្មតា ព្រោះប្រជាពលរដ្ឋក៏មិនទាន់បែងចែកសំរាមនៅឡើយ។ លោកបានសំណូមពរឱ្យប្រជាពលរដ្ឋទុកដាក់សំរាមឱ្យបានត្រឹមត្រូវ និងតាមកាលកំណត់។
លោកលើកឡើងថា៖«សូមសំណូមពរដល់ប្រជាពលរដ្ឋជួយគោរពស្រលាញ់បរិស្ថានទាំងអស់គ្នា ជាពិសេសគោរពតាមសេចក្តីប្រកាសរបស់សាលារាជធានីភ្នំពេញ និងជួយបញ្ចេញសំរាមឱ្យទាន់ពេល ទាន់ម៉ោង ពេលកម្មករទៅយកសំរាម ដើម្បីកុំឲ្យរំខានដល់ការធ្វើការរបស់ក្រុមហ៊ុន»។
គួរបញ្ជាក់ថា រដ្ឋបាលរាជធានីភ្នំពេញ បានចេញសេចក្ដីណែនាំមួយ កាលពីថ្ងៃទី១៦ ខែកញ្ញា ឱ្យប្រជាពលរដ្ឋមានការញែក ការវេចខ្ចប់ ការទុកដាក់ និងការបញ្ចេញសំរាម និងសំណល់រឹង ដូចជា ទីមួយ សំរាម និងសំណល់រឹង។ ទី១.មុននឹងបញ្ចេញ ត្រូវសម្រិតទឹកដាក់ក្នុងប្រព័ន្ធលូឱ្យបានត្រឹមត្រូវ ទី២. ត្រូវញែកសំរាម សំណល់រឹង ជា២ប្រភេទ គឺសំរាមសើម និងសំរាមស្ងួត ដោយដាក់នៅក្នុងថង់ដាច់ដោយឡែកពីគ្នាជាដើម។ ការអនុវត្តនឹងចាប់ផ្តើមពីថ្ងៃទី១ ខែវិច្ឆិកា ឆ្នាំ២០២១តទៅ។ ការអនុវត្តនេះ គឺបន្ទាប់ពីរដ្ឋបាលរាជធានីភ្នំពេញបានទទួលការដេញថ្លៃជ្រើសរើសក្រុមហ៊ុនប្រមូលសំរាមចំនួន ៣ ដែលបានអនុវត្តន៍ការប្រមូលសំរាមនៅក្នុងតំបន់រៀងៗខ្លួន ចាប់តាំងពីថ្ងៃទី១ ខែកក្កដា ឆ្នាំ២០២១មក។
ទោះជាយ៉ាងនេះក្តី អ្នកបើករថយន្តដឹកសំរាមរបស់ក្រុមហ៊ុនប្រមូលសំរាមមួយ បានលើកឡើងដោយសុំមិនបញ្ចេញឈ្មោះថា មកដល់ឥឡូវនេះមិនទាន់មានការប្រែប្រួលជាវិជ្ជមាននោះទេ ព្រោះប្រជាពលរដ្ឋសឹងតែទាំងអស់គ្នាទៅហើយ ដែលមិនមានការបែងចែកសំរាម។ បន្ថែមលើនេះ លោកនៅមានក្ដីបារម្ភថា នៅពេលសាលាក្រុងឱ្យមានការបែងចែកសំរាម ប្រហែលជាក្រុមហ៊ុនមិនអាចមានរថយន្តគ្រប់គ្រាន់សម្រាប់ដឹកសំរាមនោះទេ។
លោកលើកឡើងថា៖ «នៅពេលដែលប្រជាពលរដ្ឋគាត់បែងចែកសំរាម អ៊ីចឹងបានន័យថាឡានប្រភេទអីត្រូវយកប្រភេទហ្នឹង តើក្រុមហ៊ុនមានឡានគ្រប់គ្រាន់សម្រាប់យកសំរាមបែងចែកហ្នឹងទាន់ឬអត់?»។
យ៉ាងណាក្តី អភិបាលរាជធានីភ្នំពេញលោក ឃួង ស្រេង បានគូសបញ្ជាក់ថា រដ្ឋបាលរាជធានីភ្នំពេញកំពុងតែរៀបចំនិងអនុវត្តតាមផែនការនៃការបែងចែកសំរាមរបស់ខ្លួន ឱ្យទាន់ថ្ងៃកំណត់ គឺនៅថ្ងៃទី១ ខែវិច្ឆិកា ខាងមុខនេះ។
លោកថា៖ «យើងមិនទាន់ទេ នេះគ្រាន់តែជាផែនការ យើងនឹងរៀបចំជាជំហាន ទីមួយគឺរាជរដ្ឋាភិបាលក្រោមការដឹកនាំរបស់សម្ដេច បានចង្អុលបង្ហាញប្រគល់ភារកិច្ចជូនឧបនាយករដ្ឋមន្ត្រី រដ្ឋមន្ត្រីសេដ្ឋកិច្ចហិញ្ញវត្ថុកំណែទម្រង់សំរាមនេះ យើងធ្វើកំណែទម្រង់បានជោគជ័យហើយ ៣ក្រុមហ៊ុនមកយក [ប្រមូលសំរាម] នៅទីក្រុងភ្នំពេញ»។
គួជម្រាបជូនថា បើតាមសេចក្តីជូនដំណឹងរបស់រដ្ឋបាលរាជធានីភ្នំពេញកាលពីថ្ងៃទី១៦ ខែកញ្ញា ការបែងចែកសំរាមជាពីរប្រភេទ គឺសំរាមសើម រួមមាន សំណល់ម្ហូបអាហារ សំណល់សរីរាង្គ ផ្លែឈើ ផ្កា ត្រូវដាក់នៅក្នុងថង់ពណ៌ខ្មៅ ចំណែកសំរាមស្ងួត រួមមាន ក្រដាស ក្រដាសកាតុង ឡាំង គ្រឿងប្លាស្ទីក ហ្វូម ជ័រ ដែក កំប៉ុង ឬដប ជាដើម ត្រូវដាក់នៅក្នុងថង់ពណ៌ស។ សេចក្តីជូនដំណឹងបានហាមការវេចខ្ចប់សំណល់ដែលបង្កគ្រោះថ្នាក់ ដូចជា បំបែងកញ្ចក់ និងសំណល់មុតស្រួចនានា លាយឡំជាមួយនឹងសំរាមសើម និងសំរាមស្ងួត។ ចំណែកកាកសំណល់ពិសេសផ្សេងៗទៀត ដូចជា មែកឈើ ឬ គ្រឿងសង្ហារឹម គ្រឿងសំណល់ពីការដ្ឋានសំណង់ផ្សេងៗ ត្រូវទាក់ទងទៅអាជ្ញាធររាជធានីភ្នំពេញដើម្បីចាត់ចែង៕
