ក្រសួងអប់រំ យុវជន និងកីឡា បានសម្រេចរំកិលកាលបរិច្ឆេទនៃការប្រឡងសញ្ញាប័ត្រមធ្យមសិក្សាទុតិយភូមិ ឬ ប្រឡងបាក់ឌុប ពីថ្ងៃទី៦ទៅធ្វើនៅថ្ងៃទី២៧ ខែធ្នូ ឆ្នាំ២០២១ វិញ។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានប្រាប់វីអូឌី តាមរយៈសារតេឡេហ្គ្រាម នៅយប់ថ្ងៃទី៥ ខែវិច្ឆិកានេះថា ក្រសួងអប់រំបានកំណត់យកថ្ងៃទី២៧ ខែធ្នូ ឆ្នាំ២០២១ ជាកាលបរិច្ឆេទថ្មីនៃការប្រឡងសញ្ញាប័ត្រមធ្យមសិក្សាទុតិយភូមិ ឬ បាក់ឌុប។
លោកថា៖ «ការប្រឡងបាក់ឌុបឆ្នាំ២០២១នេះ នឹងត្រូវរៀបចំតាមទម្រង់ដូចឆ្នាំមុនៗ និងត្រូវបន្តអនុវត្តន៍តាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងវិធានការសុវត្ថិភាពសុខភាព»។
ការកំណត់កាលបរិច្ឆេទប្រឡងបាក់ឌុបថ្មីនេះ ធ្វើឡើងបន្ទាប់ពីថ្នាក់ដឹកនាំក្រសួងអប់រំ យុវជន និងកីឡា បានប្រជុំវាយតម្លៃលើស្ថានការណ៏នានា ដើម្បីបន្តរៀបចំការប្រឡងបាក់ឌុប នៅរសៀលថ្ងៃ៥ ខែវិច្ឆិកា ឆ្នាំ២០២១នេះ។
កាលពីថ្ងៃទី៣ ខែវិច្ឆិកា រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានប្រាប់អ្នកកាសែតថា ក្រសួងនឹងពិចារណាពន្យាពេលការប្រឡងសញ្ញាប័ត្របាក់ឌុបឆ្នាំនេះ ដែលគ្រោងធ្វើនៅថ្ងៃទី៦ ខែធ្នូ ឆ្នាំ២០២១ ដើម្បីទុកឱកាសឱ្យសិស្សានុសិស្សមានពេលវេលាថែមទៀតដើម្បីរៀនសូត្រត្រៀមប្រឡង។
បើតាមលោក រស់ សុវាចា ដដែល ក្រសួងក៏បានសម្រេចកំណត់ការប្រឡងសញ្ញាប័ត្រមធ្យមសិក្សាបឋមភូមិ (ថ្នាក់ទី៩) នៅរក្សាកាលបរិច្ឆេទដដែល គឺនៅថ្ងៃទី១៥ ខែវិច្ឆិកា ឆ្នាំ២០២១ ខណៈការបើកបវេសនកាលឆ្នាំសិក្សាថ្មី២០២១-២០២២ នឹងចាប់ផ្តើមនៅថ្ងៃទី១០ ខែមករា ឆ្នាំ២០២២៕
