ម្ដាយរបស់ក្មេងប្រុស កាក់ សុវណ្ណច្ឆ័យ គឺលោកស្រី ព្រុំ ចាន់ថា បានលើកឡើងថា ជារឿងអយុត្តិធម៌ ដែលតុលាការបានចាត់ទុកគ្រួសារអ្នកស្រីជាអ្នកទោសនយោបាយរួចទៅហើយ ហើយកន្លងមកអ្វីដែលគ្រួសារអ្នកស្រីបានធ្វើមិនមែនជារឿងខុសច្បាប់នោះទេ។
ការលើកឡើងរបស់អ្នកស្រីនេះ គឺបន្ទាប់ពីអ្នកនាំពាក្យសាលាដំបូងរាជធានីភ្នំពេញបានចេញសេចក្តីប្រកាសព័ត៌មានមួយកាលពីថ្ងៃទី៥ ខែវិច្ឆិកាថា តុលាការបានកាត់ទោសក្មេងប្រុស កាក់ សុវណ្ណច្ឆ័យ ដាក់ពន្ធនាគារកំណត់ទណ្ឌកម្មត្រឹមពាក់កណ្តាលនៃទោសដែលច្បាប់បានកំណត់ចំពោះនីតិជននោះ ថាគឺជាការគិតគូលើផលប្រយោជន៍របស់អនីតិជន និងថា ជនជាប់ចោទ កាក់ សុវណ្ណច្ឆ័យ ធ្លាប់ជាប់ចោទម្តងក្នុងសំណុំរឿងដូចគ្នានេះ។
ប៉ុន្តែលោកស្រី ព្រុំ ចាន់ថា យល់ថា តុលាការគួរទម្លាក់រាល់ការចោទប្រកាន់ទាំងអស់ទៅលើកូនរបស់អ្នកស្រីដោយមិនត្រូវកាត់ឱ្យមានទោស ហើយព្យួរទោស ដោយមានការតាមដានទៀតនោះទេ។ លោកស្រីថា កូនអ្នកស្រីអត់មានកំហុសទេ ហើយការកាត់ទោសបែបនេះ ប្រៀបដូចជាការដាក់គុកឥតជញ្ជាំងដូច្នេះដែរ។
លោកស្រីលើកឡើងថា៖ «ទោះបីខ្ញុំស្រែកប៉ុណ្ណាក៏គាត់ [តុលាការ] មិនដែលខ្វល់ពួកខ្ញុំត្រូវតែអញ្ចឹង ធម្មតាតាំងពីដើមមកតុលាកាមិនដែលឱ្យពួកខ្ញុំត្រូវទេ ទាំងអស់ហ្នឹងជាប់គុកឥតកំហុសអ៊ីចឹងដែលអោយពួកខ្ញុំត្រូវតាំងពីកាលណា?»។
អ្នកនាំពាក្យសាលាដំបូងរាជធានីភ្នំពេញបានចេញសេចក្តីប្រកាសព័ត៌មានមួយកាលពីថ្ងៃទី៥ ខែវិច្ឆិកា ដោយបានពន្យល់ពីករណីរបស់ក្មេងប្រុស កាក់ សុវណ្ណច្ឆ័យ កូនប្រុសសកម្មជនអតីតគណបក្សសង្គ្រោះជាតិលោក កាក់ គុម្ភា ដែលកំពុងជាប់ពន្ធនាគារថា ដោយមានការគិតគូពិចារណាលើផលប្រយោជន៍របស់អនីតិជន តុលាការកាលពីថ្ងៃទី១ ខែវិច្ឆិកា ឆ្នាំ២០២១ បានសម្រេចផ្តន្ទាទោសជនជាប់ចោទដាក់ពន្ធនាគារកំណត់ទណ្ឌកម្មត្រឹមពាក់កណ្តាលនៃទោសដែលច្បាប់បានកំណត់ចំពោះនីតិជននោះ គឺជាការគិតគូលើផលប្រយោជន៍របស់អនីតិជន ហើយទោសនេះត្រូវបានអនុវត្តក្នុងពន្ធនាគារតែមួយផ្នែកប៉ុណ្ណោះ។ ទោសដែលនៅសល់ត្រូវព្យួរសាកល្បង។
កាលពីថ្ងៃទី១ ខែវិច្ឆិកា តុលាការបានកាត់ទោសក្មេងប្រុស កាក់ សុវណ្ណច្ឆ័យ ដាក់ពន្ធនាគារ៨ខែ ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទប្រមាថ ដែលប្រព្រឹត្តនៅក្នុងប្រទេសកម្ពុជាឆ្នាំ២០២១ និងកាលពីថ្ងៃទី២៥ ខែមិថុនា ឆ្នាំ២០២១។ ជាបទល្មើសព្រហ្មទណ្ឌដែលមានចែងឱ្យផ្តន្ទាទោសតាមបញ្ញត្តិមាត្រា ៤៩៤ មាត្រា ៤៩៥ និងមាត្រា ៥០២ នៃក្រមព្រហ្មទណ្ឌកម្ពុជា។
បន្ថែមលើនេះ អ្នកនាំពាក្យសាលាដំបូងរាជធានីភ្នំពេញបានអះអាងថា រយៈពេលកន្លងមក ជនជាប់ចោទធ្លាប់បានប្រព្រឹត្តសកម្មភាពប្រហាក់ប្រហែលនេះម្តងរួចមកហើយ។ ប្រភពដដែលបន្តថា សមត្ថកិច្ចបានដោះលែងជនជាប់ចោទ ដោយមិនបានចោទប្រកាន់តាមនីតិវិធីតុលាការនោះទេ ព្រោះយល់ថា ជាអនីតិជនដែលបានប្រព្រឹត្តអំពោះនេះជាលើកដំបូង។ ប៉ុន្តែថា ជនជាប់ចោទនៅតែមិនកែប្រែខ្លួន ទើបមានវិធានការតាមផ្លូវច្បាប់ចំពោះករណីទី២នេះ។
ប្រភពដដែលក៏បានបញ្ជាក់ដែរថា ចំពោះការលើកឡើងថា ជនជាប់ចោទមានជំងឺ អូទីហ៊្សឹម ជាការអះអាងផ្ទាល់ខ្លួន ដោយពុំមានបង្ហាញភស្តុតាងបញ្ជាក់ គ្មានសំបុត្រពេទ្យ ឯកសារដែលធ្លាប់ព្យាបាល និងគ្មានលិខិតកោសល្យវិច័យនោះទេ។
ប៉ុន្តែទោះជាបែបនេះក្តី នាយករងទទួលបន្ទុកកម្មវិធីឃ្លាំមើលនៃអង្គការលីកាដូលោក អំ សំអាត នៅមានមន្ទិលសង្ស័យលើការប្រកាសសាលក្រមរបស់សាលាដំបូងរាជធានីភ្នំពេញ កាលពីថ្ងៃទី១ ខែវិច្ឆិកា ថា ធ្វើឡើងជាអសាធារណៈ ដោយលើកហេតុផលថា ដើម្បីរក្សាកិត្តិយសរបស់កុមារ កាក់ សុវណ្ណច្ឆ័យ កុំឱ្យប៉ះពាល់ទៅដល់សិទ្ធិជនជាប់ចោទ។
លោក អំ សំអាត បន្តថា ក្មេងប្រុស កាក់ សុវណ្ណច្ឆ័យ ធ្លាប់រងគ្រោះដែលជនល្មើសធ្លាប់ធ្វើការវាយដំ ហើយមានរបួសស្នាមធ្ងន់ធ្ងរ ប៉ុន្តែបែរជាមិនអាចរកឃើញជនដែលប្រព្រឹត្តបទល្មើសមកផ្ដន្ទាទោសបានទៅវិញ។ ចំណែកឯក្នុងករណីបទល្មើសមជ្ឈិមកម្រិតស្រាលវិញ លោកថា សម្រាប់ប្រទេសប្រជាធិបតេយ្យ គឺមិនមែនជាករណីធ្ងន់ធ្ងរណាស់ណាទេ។
លោកលើកឡើងថា៖ «ប្រសិនបើបទល្មើសហ្នឹងវាជាបទមជ្ឈិមកម្រិតស្រាល មិនធ្ងន់ធ្ងរណាស់ណាទេ ប្រសិនបើនៅប្រទេសគេដែលប្រកាន់លទ្ធិប្រជាធិបតេយ្យ ហើយគេគោរពសិទ្ធិដល់កុមារពេញលេញនោះ គឺគេគិតអំពីអនាគតកុមារ ទីមួយកុមារអាចនឹងត្រូវបន្តការសិក្សា លើកលែងតែបទឧក្រិដ្ឋ និងបទមជ្ឈិមធ្ងន់ធ្ងរដែលតម្រូវឱ្យមានការអប់រំតាមផ្លូវច្បាប់គឺត្រូវការផ្តន្ទាទោសដាក់ពន្ធនាគារអប់រំកែប្រែអត្តចរិកអីជាដើម»។
លោកបន្តថា មតិជាតិនិងអន្តរជាតិ និងអ្នកជំនាញរបស់អង្គការសហប្រជាជាតិផ្នែកសិទ្ធិមនុស្សបានលើកឡើងថា ករណីនេះបានប៉ះពាល់ទៅលើសិទ្ធិកុមារធ្ងន់ធ្ងរ ដោយសារតែទីមួយកុមារទើបតែ១៦ឆ្នាំដែលស្ថិតនៅក្នុងវ័យសិក្សា និងទី២គាត់ធ្លាប់មានបញ្ហាផ្លូវចិត្ត (អូធីស្សឹម)។ លោកថា បើទោះបីថា តាមផ្លុវច្បាប់ទាល់តែថា មានលិខិតបញ្ជាក់ពីពេទ្យក៏ដោយ តែប្រសិនបើក្រុមគ្រួសាររបស់គាត់ដឹងពីទុក្ខលំបាករបស់កូនគាត់តាំងពីតូច ក៏ចាត់ទុកថា គាត់អាចនឹងមានជំងឺទាំងអស់ហ្នឹងដែរ។ លោកថា ករណីនេះជាករណីពាក់ព័ន្ធនយោបាយច្រើនជាង។
បើតាមសេចក្តីប្រកាសរបស់អ្នកនាំពាក្យសាលាដំបូងរាជធានីភ្នំពេញក្មេងប្រុសកាក់ សុវណ្ណច្ឆ័យ នឹងត្រូវដោះលែងនៅថ្ងៃទី៨ ខែវិច្ឆិកា ខាងមុខនេះ បន្ទាប់ពីបានជាប់ឃុំក្នុងពន្ធនាគាររយៈពេល ៤ខែ ១៥ថ្ងៃក្នុងចំណោមទោស៨ខែ។ ប៉ុន្តែត្រូវស្ថិតក្រោមការព្យួរទោសសាកល្បងរយៈពេល២ឆ្នាំ។
អ្នកជំនាញសិទ្ធិមនុស្សអង្គការសហប្រជាជាតិ៣រូបបានចេញសេចក្តីថ្លែងការណ៍ដោយបានចាត់ទុកថា ការផ្តន្ទាទោសលើអនីតិជនដែលមានបញ្ហាស្មារតីមិនប្រក្រតីដោយជំងឺអូទីហ្ស៊ឹមនេះ គឺជារូបភាពដ៏អាក្រក់នៃយុទ្ធនាការជាបន្តបន្ទាប់របស់អាជ្ញាធរក្នុងការបំភិតបំភ័យ និងការប្រើប្រាស់ហិង្សាប្រឆាំងនឹងសង្គមស៊ីវិល និងសកម្មជនបក្សជំទាស់ ព្រមទាំងសមាជិករបស់ក្រុមទាំងនេះ។ អ្នកជំនាញផ្នែកសិទ្ធិមនុស្ស បានអំពាវនាវឱ្យរដ្ឋាភិបាលកម្ពុជាបញ្ឈប់ជាបន្ទាន់នូវការប្រើប្រាស់ប្រព័ន្ធតុលាការកាត់ទោសលើអ្នកហ៊ានក្រោកឈរ ដើម្បីសិទ្ធិមនុស្ស និងសេរីភាពបញ្ចេញមតិនៅកម្ពុជា៕