យុវជនមួយក្រុមបង្កើតមូលនិធិ១ដុល្លារដើម្បីការសិក្សារបស់កុមារក្រីក្រ ក្នុងរយៈពេលជិត២ឆ្នាំនេះប្រមូលបានជាង ៣ ពាន់ដុល្លារ ហើយពួកគេមានបំណងពង្រីកកម្មវិធីនេះឱ្យកាន់តែធំដើម្បីជួយវិស័យអប់រំ និងបង្ហាញពីសាមគ្គីភាពជួយគ្នាដែលធ្វើឡើងទៀងទាត់ជាប្រចាំ។
កញ្ញា ស៊ឹម សុភា អ្នកផ្តួចផ្តើមបង្កើតគម្រោងនេះឱ្យដឹងថា គម្រោងនេះកំពុងតែជួយសាលាដែលខ្វះខាតមានចំនួន២ គឺសាលា៤៨ ឃូល័រ នៅឃុំពាក់ស្នែង ស្រុកអង្គរធំ ខេត្តសៀមរាប និងសាលាអង្គការមេត្រីភាពដើម្បីកុមារនិងចាស់ជរានៅក្នុងរាជធានីភ្នំពេញ។
គម្រោងទាំង២នេះមានយុវជនជិត ៨០ នាក់ស្ម័គ្រចិត្តបរិច្ចាគម្នាក់ ៤ ០០០ រៀលឬ ១ដុល្លារក្នុងនោះអ្នកខ្លះបរិច្ចាគច្រើនជាងនេះ ប្រចាំខែ ហើយក្នុងរយៈពេលជិត២ឆ្នាំគម្រោងនេះ ទទួលបានថវិកាជាង ៣ ០០០ ដុល្លារ។ ថវិកាដែលទទួលបានពីអ្នកបរិច្ចាគគឺជួយឧត្ថម្ភទៅសាលាអង្គការទាំង២ប្រចាំខែ។
សុភា លើកទឹកចិត្តឱ្យពលរដ្ឋខ្មែរចាប់ផ្តើមធ្វើកិច្ចការដើម្បីសង្គមជាតិ ដោយចាប់ផ្តើមពីចំណុចដែលអាចធ្វើទៅបាន។
កញ្ញា ស៊ឹម សុភា៖«ចង់បង្ហាញពីការចូលរួមជួយក្នុងសង្គម មិនចាំបាច់ចាំរហូតយើងក្លាយជាអ្នកមានសិនទើបយើងអាចជួយសង្គមបាននោះទេ យើងអាចចូលរួមតាមលទ្ធភាព ហើយតាមរូបភាពផ្សេងៗ»។
កញ្ញា ស៊ឹម សុភា រំពឹងថា នៅថ្ងៃអនាគតពលរដ្ឋនឹងសហការគ្នាជួយដល់វិស័យអប់រំគ្រប់កន្លែង។
កញ្ញា ស៊ឹម សុភា៖«សង្ឃឹមថា ថ្ងៃខាងមុខ នឹងមានពលរដ្ឋយើងចូលរួមលើកស្ទួយការអប់រំ គ្រប់កន្លែងដែលខ្វះខាត មិនមែនជួយតាមតែបុគ្គលឬ ល្បីតាមគ្នាមួយឆាវៗនោះទេ»។
យុវជនម្នាក់ដែលបានបរិច្ចាគលុយប្រចាំខែលើគម្រោងនេះលោក លឹង ពៅ លើកឡើងថា សម្រាប់អ្នកមានជីវភាពមធ្យមបរិច្ចាគ ៤ ០០០ រៀលក្នុង១ខែមិនប៉ះពាល់ដល់ជីវភាពនោះទេ ហើយនៅពេលដែលមានការបរិច្ចាគកាន់តែច្រើនគឺកាន់តែជួយបានច្រើនដល់សិស្សក្រីក្រ។
លោកថា៖«យើង១ដុល្លារៗច្រើននាក់ទៅ យើងអាចជួយផ្គត់ផ្គង់សាលាដែលទីទាល់មែនទែន គឺពួកគាត់ត្រូវការចាំបាច់ណាស់ អញ្ចឹងមានតែចំណុចនឹងឯងដែលយើងអាចជួយសង្គមយើងបាន ពីព្រោះបើយើងជួយលុយច្រើនយើងអាចនឹងគ្មានលទ្ធភាព ប៉ុន្តែប្រសិនបើ១ដុល្លារ ហើយយើងជួយច្រើននាក់យើងអាចមានលទ្ធភាព»។
កញ្ញា ស៊ឹម សុភា អំពាវនាវកុំឱ្យពលរដ្ឋមើលរំលងសកម្មភាពសប្បុរសធម៌ដែលចាប់ផ្តើមចេញពីចំនួនតិចតួច។
កញ្ញា ស៊ឹម សុភា៖«ពលរដ្ឋយើងចេះឱ្យតម្លៃលើរបស់បន្តិចបន្តួចកុំមើលរំលងវាឱ្យសោះ ត្រឹម១ដុល្លាររបស់ពួកយើងដែលបានចូលរួមគឺបានផ្តល់ស្នាមញញឹម ដល់អ្នកដែលកំពុងត្រូវការ ដើម្បីចំណេះដឹង និងបានរស់»។
លោក ឡូយ សុវណ្ណ ជាស្ថាបនិក និងជានាយក សាលា៤៨ ឃូល័រ ឱ្យដឹងថា លោកបង្កើតសាលាជាលក្ខណៈអង្កការនេះឡើងកាលពីឆ្នាំ២០១៣ ដើម្បីជួយបំពេញតម្រូវការអប់រំដល់កូនអ្នកភូមិ។ លោកថា ក្នុងដំណើរការសាលានេះជួបការលំបាកច្រើន។
លោក បន្តថា មូលនិធិ១ដុល្លាររបស់ក្រុមកញ្ញា ស៊ឹម សុភា បានជួយសម្រួលលំបាកបានមួយកម្រិតដល់ដំណើរការសាលាដែលលោកបង្កើតឡើងនេះ។
លោក ឡូយ សុវណ្ណ៖«គម្រោងនេះជួយខ្ញុំបានច្រើន សម្រាប់ដំណើរការសាលារៀន ព្រោះយើងមានឧត្ថម្ភរាល់ខែ ដល់ពេលចឹងជួយដល់ការចំណាយផ្សេងៗមួយចំណែក ទោះបីមិនច្រើន ប៉ុន្តែធ្វើឱ្យខ្ញុំដឹងថា ថវិកាដែលទទួលបានមានប៉ុណ្ណេះឬ ប៉ុណ្ណោះ ដើម្បីឱ្យខ្ញុំរៀបចំត្រៀមសម្រាប់ការចំណាយលើសាលារៀន»។
កញ្ញា ស៊ឹម សុភា រំឭកថា កាលពីឆ្នាំ២០១៧ គាត់បានចូលរួមកម្មវិធីសប្បុរសធម៌មួយនៅសាលា៤៨ឃូល័រ ហើយឃើញថា សិស្សក្រីក្រនៅតំបន់នោះមានតម្រូវការចាំបាច់ក្នុងការរៀនសូត្រក៏ចេះតែជួយថវិកាផ្ទាល់ខ្លួនតាមលទ្ធភាពម្តង ៣០ ០០០រៀល ម្តង ៤០ ០០០រៀល ដោយមិនទៀងទាត់តាមពេលនោះទេ។ ក្រោយមកកញ្ញាយល់ថា បើបបួលមិត្តភ័ក្រឱ្យពួកគេចែករំលែកម្នាក់ត្រឹមតែ ៤ ០០០រៀលក្នុង១ខែទៀងទាត់ ពិតជាអាចជួយសម្រាលការលំបាកច្រើនដល់សាលារៀនដែលកំពុងតែជួយសិស្សក្រីក្រ។
កញ្ញា ស៊ឹម សុភា បានចាប់ផ្តើមគម្រោងទី១នៅដើមឆ្នាំ២០២០ ជួយដល់សាលា ៤៨ឃូល័រ និងចាប់ផ្តើមគម្រោងទី២នៅដើមឆ្នាំ២០២១ ជួយដល់សាលាកុមារមេត្រីភាព។ កញ្ញាអំពាវនាវឱ្យមានការចូលរួមបន្ថែមទាំងជាមួយក្រុមរបស់កញ្ញា ឬ ក៏សាធារណជនអាចបង្កើតក្រុមរបៀបនេះដាច់ដោយឡែកផ្សេងៗទៀតដើម្បីជួយដល់វិស័យអប់រំ។
យោងតាម លោកហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា កាលពីឆ្នាំ២០១៩ បានគូសបញ្ជាក់ថា បច្ចុប្បន្នកម្ពុជាមានសាលាមត្តេយ្យសិក្សា និងសាលារៀនចំណេះទូទៅ ទាំងសាធារណៈ និងឯកជន ប្រមាណជិត ១៥ ០០០ កន្លែងនៅទូទាំងប្រទេស។
នៅតាមបណ្តាញទំនាក់ទំនងសង្គមក៏បានផ្សព្វផ្សាយបន្តបន្ទាប់ពីសាលារៀនឬ ក៏សិស្សនៅតាមសាលាមួយចំនួនជួបការលំបាក ហើយថ្មីៗនេះក៏មានការចាប់អារម្មណ៍ពីនាយករដ្ឋមន្ត្រីហ៊ុន សែន និងមហាជន លើកុមារជាសិស្សសាលាម្នាក់នៅក្នុងខេត្តសៀមរាបដែលមានជីវភាពក្រីក្រ៕
អត្ថបទដោយ៖ ប៉ា តុងចិន