អាជ្ញាធរបានកោះហៅម្ចាស់គណនី Facebook ឈ្មោះ Vea Sna ដែលខំមិន (comment) ថា «ឡានទឹកតថ្លៃទម្រាំត្រូវ ខ្ទេចអស់ហើយ» ក្នុងហេតុការណ៍គ្រោះអគ្គិភ័យមួយនៅខណ្ឌដង្កោ ចូលបំភ្លឺ និងថតវីដេអូសុំទោសជាសាធារណៈ ចំពោះការសរសេរដែលអាជ្ញាធរថាផ្ទុយពីការពិត។
កាលពីថ្ងៃទី៨ ខែវិច្ឆិកា ឆ្នាំ២០២១ ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានលើកឡើងក្នុងទំព័រហ្វេសប៊ុករបស់ខ្លួន ដោយប្រាប់ឱ្យម្ចាស់គណនីហ្វេសប៊ុក ឈ្មោះ Vea Sna ចូលខ្លួនទៅបំភ្លឺនៅអង្គភាពរបស់ខ្លួនជាបន្ទាន់ ជុំវិញករណីដែលបុគ្គលរូបនោះបានសរសេរថា «ឡានទឹកតថ្លៃទម្រាំត្រូវ ខ្ទេចអស់ហើយ» ក្នុងការផ្សាយផ្ទាល់ (Live) ករណីអគ្គិភ័យមួយកើតឡើងនៅក្នុងបុរីពិភពថ្មីចំការដូង ក្នុងសង្កាត់ព្រៃស ខណ្ឌដង្កោ រាជធានីភ្នំពេញ កាលពីថ្ងៃទី០៦ ខែវិច្ឆិកា ឆ្នាំ២០២១។
អង្គភាពដដែល បានច្រាលចោលទាំងស្រុងចំពោះការលើកឡើងបែបនេះ និងថា ការសរសេរបែបនេះបានធ្វើឱ្យប្រជាពលរដ្ឋមានការភ័ន្តច្រឡំលើកងកម្លាំងសមត្ថកិច្ចដែលបានចុះប្រតិបត្តិការអន្តរាគមន៍ជួយសង្គ្រោះគ្រោះអគ្គិភ័យ និងជាចេតនាអាក្រក់បំពុលបរិយាកាសដល់សង្គមជាតិ។
អង្គភាពនេះសរសេរថា៖ «សូមម្ចាស់ហ្វេសប៊ុកឈ្មោះ Vea Sna ចូលខ្លួនមកបំភ្លឺនៅការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ ជាបន្ទាន់ បើពុំដូច្នោះទេ កងកម្លាំងសមត្ថកិច្ចនគរបាលយើងនឹងចាត់វិធានការតាមផ្លូវច្បាប់»។
ក្រោយការផ្សព្វផ្សាយនេះ ម្ចាស់គណនី Facebook ឈ្មោះ Vea Sna ដែលមានឈ្មោះដើម ម៉េន វាសនា បានប្រាប់ វីអូឌី នៅថ្ងៃអង្គារនេះថា ខ្លួនបានចូលទៅបំភ្លឺតាមការអញ្ជើញរបស់អាជ្ញាធរហើយ ហើយខ្លួនក៏បានបកស្រាយ ធ្វើកិច្ចសន្យា និងបានថតវីដេអូសុំទោសជាសាធារណៈចំពោះកំហុសឆ្គងរបស់ខ្លួនរួចហើយ។
លោកថា៖ «អាជ្ញាធរឱ្យសរសេរកិច្ចសន្យា ថតវីដេអូនិយាយសុំទោសខាងស្ថាប័ន និងប្រជាពលរដ្ឋទូទាំងប្រទេស បង! [កាលខ្ញុំ comment គឺតាម] ការ Live របស់សារពត៌មាន»។
យុវជនរូបនេះបន្តថា ដំបូងឡើយ លោកពុំបានដឹងទេថា ការបញ្ចេញមតិបែបនេះបានធ្វើឱ្យមានផលប៉ះពាល់ដល់ថ្នាក់ត្រូវមន្ត្រីហៅឱ្យទៅបំភ្លឺបែបនេះទេ តែយ៉ាងណា លោកបានបំភ្លឺជូនអាជ្ញាធររួចហើយ ជុំវិញការសរសេររបស់ខ្លួននេះ។
ជាមួយគ្នានេះដែរ ទំព័រហ្វេសប៊ុករបស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានបញ្ជាក់នៅថ្ងៃទី៩ ខែវិច្ឆិកានេះដែរថា សមត្ថកិច្ចជំនាញបានកោះហៅឈ្មោះ ម៉េន វាសនា ចូលខ្លួនមកបំភ្លឺ ហើយបុគ្គលរូបនេះបានទទួលស្គាល់កំហុស និងធ្វើការថតវីដេអូសុំទោសជាសាធារណៈចំពោះប្រជាពលរដ្ឋ ជាពិសេស សមត្ថកិច្ចជាមន្ត្រីអនុវត្តច្បាប់ ដើម្បីសុំការលើកលែងទោសរួចរាល់ហើយ៕
