ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា បានឡើងថ្លែងព្រះរាជសុន្ទរកថា ក្នុងមហាសន្និបាតអង្គការយូណេស្កូ កាលពីយប់មិញនេះ នាទីក្រុងប៉ារីស ប្រទេសបារាំង ដោយមានការចូលរួមពីបណ្តាប្រមុខរដ្ឋចំនួនជាង២០ប្រទេស។
ព្រះរាជសុន្ទរកថា នៅក្នុងពិធីបើកសម័យប្រជុំជាផ្លូវការនៃមហាសន្និបាតលើកទី៤១ របស់អង្គការយូណេស្កូនេះ បានផ្ដោតជាសំខាន់លើសមិទ្ធផលសំខាន់ៗនៃអង្គការយូណេស្កូនៅក្នុងប្រទេសកម្ពុជា។
គួរជម្រាបជូនថា ព្រះមហាក្សត្រកម្ពុជាព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី បានយាងទៅកាន់ទីក្រុងប៉ារីស ប្រទេសបារាំង កាលពីព្រឹកថ្ងៃទី១០ ខែវិច្ឆិកា ឆ្នាំ២០២១ ដើម្បីចូលរួមមហាសន្និបាតលើកទី៤១ របស់អង្គការយូណេស្កូ ដែលនឹងប្រព្រឹត្តទៅចាប់ពីថ្ងៃទី១០ ដល់ថ្ងៃទី១៤ ខែវិច្ឆិកា ឆ្នាំ២០២១។
សេចក្ដីប្រកាសព័ត៌មានរបស់ក្រសួងការបរទេសកម្ពុជា ចុះថ្ងៃទី៨ ខែវិច្ឆិកានេះ បានលើកឡើងថា ការយាងចូលរួមមហាសន្និបាតរបស់អង្គការយូណេស្កូនេះ ធ្វើឡើងតបតាមការយាងរបស់លោកស្រី អូដ្រេយ អាហ្សូឡេយ (Audrey Azoulay) អគ្គនាយិកានៃអង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (UNESCO)។
ប្រភពដដែលបន្តថា នៅថ្ងៃទី១២ ខែវិច្ឆិកា ឆ្នាំ២០២១ ជាមួយនឹងវត្តមានរបស់ប្រមុខរដ្ឋនិងរដ្ឋាភិបាលជាច្រើនរូប ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី នឹងថ្លែងព្រះរាជសុន្ទរកថានៅក្នុងពិធីបើកសម័យប្រជុំជាផ្លូវការនៃមហាសន្និបាតនេះ ដោយផ្ដោតលើសមិទ្ធផលសំខាន់ៗនៃអង្គការយូណេស្កូនៅក្នុងប្រទេសកម្ពុជា។ បើតាមក្រសួងការបរទេសកម្ពុជា ចាប់តាំងពីអង្គការយូណេស្កូបង្កើតឡើងនៅឆ្នាំ១៩៤៥ អង្គការនេះ បានរួមចំណែកយ៉ាងសំខាន់ដល់ការលើកតម្កើងវិស័យអប់រំ វិទ្យាសាស្រ្ត វប្បធម៌ និងការប្រាស្រ័យទាក់ទងគ្នានៅក្នុងពិភពលោក តាមរយៈកម្មវិធីកិច្ចសហប្រតិបត្តិការពហុភាគី៕