នាយកសាលាបឋមសិក្សាក្រពុំឈូក នៅក្នុងខេត្តត្បូងឃ្មុំ អំពាវនាវឱ្យស្ថាប័នពាក់ព័ន្ធ និងសប្បុរសជនជួយសាងសង់ និងជួសជុលសាលារៀន ដោយសារនៅក្នុងរដូវវស្សានេះ កុមារតូចជួបការលំបាក ពេលរៀន ដោយសារលិចទឹកភ្លៀងតាមដំបូល និងសាចតាមជញ្ជាំង។
លោក គីម សុភ័ក្រ នាយកសាលារៀនបឋមសិក្សាក្រពុំឈូក បានឱ្យដឹងថា សាលារៀនរបស់លោកស្ថិតក្នុងភូមិឈូក ឃុំកំពាន់ ស្រុកមេមត់ ខេត្តត្បូងឃ្មុំ ដោយបច្ចុប្បន្នមានសិស្សសរុបចំនួន ២២២នាក់ ក្នុងនោះចែកចេញជា ៧កម្រិតឬថ្នាក់ ចាប់ពីថ្នាក់មតេ្តយ្យរហូតដល់ថ្នាក់ទី៦។
លោកបន្តថា សាលារៀននេះ មានបន្ទប់រៀន២ ដែលសង់ពីឈើ និងរោងសង់ពីឫស្សីប្រក់ស័ង្គសី ដែលមានជញ្ជាំងឫស្សីចំនួន២ដែរ។ ដោយឡែកចំពោះបុគ្គលិកអប់រំវិញ លោកថា មានគ្រូបង្រៀនដែលចេញពីក្របខណ្ឌម្នាក់ និងបុគ្គលិកជាប់កិច្ចសន្យាមានចំនួន៥នាក់។
ករណីនេះ លោកស្នើដល់អង្គការ និងក្រសួងអប់រំ ក៏ដូចជាសប្បុរសជនទាំងអស់ ចូលរួមជួយដើម្បីឱ្យសិស្សានុសិស្សមានថ្នាក់រៀនសមរម្យ។
លោកគីម សុភ័ក្រ ថ្លែងថា៖ «សំណូមពរឱ្យក្រសួង និងមន្ទីរ(មន្ទីរអប់រំ យុវជន និងកីឡា) ពាក់ព័ន្ធ ឬក៏អង្គការដែលគាត់ចង់ជួយហ្នឹង សូមឱ្យគាត់ចូលរួមទាំងអស់គ្នា ដើម្បីឱ្យក្មេងនឹងបានរៀនមានកន្លែងល្អ»។
លោកបន្តថា ប្រសិនបើមានសាលារៀនសមរម្យ នោះសិស្សានុសិស្សនឹងមានទឹកចិត្តរៀនសូត្រកាន់តែខ្លាំងបន្ថែមទៀតមិនខាន។
លោកថា៖ «ប្រសិនបើមានសាលាល្អ ជឿថាក្មេងៗនឹង ឬក៏ឪពុកម្តាយនឹងគេមានទឹកចិត្ត ឬក៏មានចិត្តស្មោះស្ម័គ្រជាមួយការសិក្សានឹងបានច្រើនកុះករ។ ប្រសិនបើបានជួសជុលថ្មីដូចសាលាគេ ខ្ញុំជឿថាក្មេងៗនឹងមករៀនច្រើនកុះករ សំខាន់ឱ្យតែមានសាលាល្អក្មេងនឹងមានទឹកចិត្តរៀន»។
ស្រដៀងគ្នានេះដែរ លោក សឿន ពិសិដ្ឋ ប្រធានក្រុម និងជាអ្នកមើលការខុសត្រូវសាលាបឋមសិក្សាក្រពុំឈូក ក៏បានរៀបរាប់ពីផលលំបាកមួយចំនួនដែរ ដោយថ្នាក់រៀនមានដំបូលចាស់ និងធ្លុះធ្លាយ ដែលធ្វើឱ្យមានទឹកស្រក់ និងសំឡេងរំខានពេលមានភ្លៀងធ្លាក់ម្តងៗ។ ទោះជាបែបនេះក្តី លោកថា សិស្សានុសិស្សនៅតែបន្តខិតខំរៀនសូត្រជានិច្ច។
លោកថា៖ «ពេលភ្លៀងមកវាតែងមានលិចស្រក់ដោយសារតែដំបូលយើង រាងចាស់ដែរ ពុកអស់ហើយ ហើយណាមួយ ពេលភ្លៀងម្តងៗស្តាប់អីអត់បានទេ។ ពេលខ្លះរដូវភ្លៀងធ្លាក់ ភ្លៀងធ្លាក់ស្រិចៗអី គាត់តស៊ូដើរមករៀន គាត់បានការតាំងចិត្តបានល្អ»។
ដោយឡែក អនុប្រធានមន្ទីរអបរំ យុវជន និងកីឡាខេត្តត្បូងឃ្មុំ លោក នួន ស៊ីរ៉ាញឿន បានឱ្យវីអូឌីដឹងថា ពាក់ព័ន្ធនឹងសាលាបឋមសិក្សាដែលជួបបញ្ហានេះ មន្ទីរអប់រំខេត្ត ពុំទាន់បានដឹងនៅឡើយទេ ដោយសារតែមិនទាន់មានរបាយការណ៍ណាមួយពីភាគីសាលារៀននៅឡើយ។
លោកថា៖ «ទាមទារឱ្យនាយកសាលាហ្នឹង គាត់ធ្វើរបាយការណ៍មួយឡើងមកស្រុកឡើងមកសុំមន្ទីរ ដើម្បីមន្ទីរលើកផែនការជួសជុល។ បើកាលណាមានរបាយការណ៍មកខាងខ្ញុំ មានខាងបឋមខាងគណនេយ្យចុះទៅមើលដើម្បីវាយតម្លៃ»។
ទោះជាយ៉ាងណា អនុប្រធានមន្ទីរអប់រំរូបនេះ អះអាងថា នឹងវាយតម្លៃពីការខូចខាតទាំងនោះ ហើយឈានដល់ការជួសជុលតាមលទ្ធភាពជាក់ស្តែង។
លោកថា៖ «ចាំខ្ញុំឱ្យខាងជំនាញខ្ញុំចុះទៅមើល ថាខាងគាត់ខូចធ្ងន់ធ្ងរកម្រិតណា បើសិនវាធ្ងន់ធ្ងរធំខ្ញុំរាយការណ៍ទៅខាងសំណង់ខាងផ្នែកជួសជុលនឹងឱ្យគាត់រៀបចំ»។
បើតាម លោកនួន ស៊ីរ៉ាញឿន បានបញ្ជាក់ថា សម្រាប់សាលាបឋមសិក្សានៅក្នុងខេត្តត្បូងឃ្មុំមានចំនួន ៤០៦ទីតាំង ក្នុងនោះការជួសជុលនីមួយៗត្រូវធ្វើតាមសាលារៀន ដែលមានការខ្វះខាតជាងគេមុនសិន ទៅតាមលទ្ធភាពនៃថវិកា។
ជាមួយគ្នានោះ កញ្ញា ញែម ស្រីឌី ដែលបានផ្សព្វផ្សាយប្រកាសរកជំនួយជួយដល់សាលារៀនមួយនេះ បានលើកឡើងថា ការប្រកាសនេះ បន្ទាប់ពីមើលឃើញពីផលលំបាករបស់សាលារៀន ជាពិសេសគឺសិស្សតូចៗដែលរៀននៅទីនោះ ត្រូវជួបបញ្ហាជាច្រើនពេលភ្លៀងធ្លាក់ម្តងៗ ។
កញ្ញាបន្តថា មកទល់បច្ចុប្បន្ននេះ ថវិកាពីសប្បុរសជនទទួលបានជាង ៣០០ដុល្លារអាមេរិក ហើយថវិកានេះ គ្រោងផ្តល់ជូនទៅសាលារៀននៅក្នុងឱកាសថ្ងៃឈប់សម្រាកបុណ្យអុំទូក។ កញ្ញាបន្ថែមថា ហេតុផលដែលសម្រេចចិត្តប្រកាសរកជំនួយជួយដល់សាលារៀននេះ គឺដោយសារចង់ចូលរួមជួយឱ្យកុមារទាំងនោះបានរៀនសូត្រចេះដឹង និងមានអនាគតល្អផងដែរ។
កញ្ញាថា៖ «មូលហេតុដែលខ្ញុំសម្រេចចិត្តប្រកាសរកជំនួយ ដោយសារមើលឃើញផលលំបាករបស់គាត់ និងការតស៊ូរបស់ឪពុកម្ដាយសិស្ស ដែលមិនឱ្យកូនគាត់បោះបង់ការសិក្សា។ ការចូលរួមជួយឱ្យគាត់មានសៀវភៅមានសាលាគឺជាការជួយដ៏ត្រឹមត្រូវ ជួយដល់ការអភិវឌ្ឍធនធានមនុស្សដល់សង្គមជាតិ។ ខ្ញុំចង់ឱ្យពួកគាត់ក្លាយជាមនុស្សដែលមានចំណេះដឹងជាធនធានល្អ»។
បើតាមនាយកសាលាបឋមសិក្សាក្រពុំឈូក លោកគីម សុភ័ក្រ អះអាងថាសិស្សានុសិស្សនៅសាលារៀនរបស់លោកមួយចំនួន បង្ខំចិត្តបោះបង់ការសិក្សាត្រឹមថ្នាក់ទី៥ ដើម្បីទៅជួយកិច្ចការងារឪពុកម្តាយនៅឯចំការកៅស៊ូ ដោយសារតែមានជីវភាពខ្វះខាត៕
អត្ថបទដោយ៖ ប៉ា តុងចិន