អង្គការតម្លាភាពកម្ពុជា (TI) និងអង្គការសម្ព័ន្ធសង្គមស៊ីវិល (UNCAC) បានចេញផ្សាយរបាយការណ៍មួយ កាលពីថ្ងៃទី២៤ ខែវិច្ឆិកាថា ការអនុវត្តច្បាប់ប្រឆាំងអំពើពុករលួយនៅកម្ពុជា នៅតែទន់ខ្សោយ។
របាយការណ៍ដែលមានកម្រាស់៧៦ទំព័រនេះ បានលើកឡើងថា ប្រទេសកម្ពុជាបានអនុម័តច្បាប់ប្រឆាំងអំពើពុករលួយដ៏ទូលំទូលាយ (ច្បាប់ប្រឆាំងអំពើពុករលួយ) និងបានបង្កើតផែនការយុទ្ធសាស្រ្តជាតិប្រឆាំងអំពើពុករលួយចំនួនបី រួមជាមួយនឹងគោលនយោបាយប្រឆាំងអំពើពុករលួយផ្សេងទៀត។ ប៉ុន្តែទោះជាយ៉ាងនេះក្តី ការអនុវត្តច្បាប់ប្រឆាំងអំពើពុករលួយនេះនៅតែទន់ខ្សោយ ខណៈអ្នកសង្កេតការណ៍មួយចំនួនបានសម្តែងការព្រួយបារម្ភថា ច្បាប់នេះត្រូវបានអនុវត្តដោយរើសអើង។ មិនមានភ័ស្តុតាងណាមួយដែលបង្ហាញថាដំណើរការពិគ្រោះយោបល់ផ្លូវការប្រកបដោយតម្លាភាព និងមានអត្ថន័យក្នុងការអភិវឌ្ឍគោលនយោបាយ និងការអនុវត្តការប្រឆាំងអំពើពុករលួយបានកើតឡើងនោះទេ។ រីឯឯកសារប្រឆាំងអំពើពុករលួយសំខាន់ៗ ក៏មិនអាចចូលយកបានជាសាធារណៈនោះទេ។
របាយការណ៍បន្តថា ច្បាប់ប្រឆាំងអំពើពុករលួយបានបង្កើតស្ថាប័នប្រឆាំងអំពើពុករលួយ (ACI) ដែលមានអង្គភាពប្រឆាំងអំពើពុករលួយ (ACU) ដែលមានភារកិច្ចអនុវត្តវិធានការច្បាប់ និងក្រុមប្រឹក្សាជាតិប្រឆាំងអំពើពុករលួយ (NCAC) ដែលជាស្ថាប័នប្រឹក្សា។
របាយការណ៍បន្តថា នៅក្នុងការអនុវត្ត ពេលដែលអង្គភាពប្រឆាំងអំពើពុករលួយ (ACU) បានដោះស្រាយបញ្ហា រួមទាំងបុគ្គលិកខ្មោច ដែលជាបុគ្គលិករដ្ឋាភិបាលដែលគ្មានប្រាក់បៀវត្សរ៍កន្លងមក ប៉ុន្តែវាកម្រនឹងស៊ើបអង្កេតសមាជិកជាន់ខ្ពស់នៃគណបក្សកាន់អំណាច បើទោះបីជាមានការចោទប្រកាន់យ៉ាងទូលំទូលាយអំពីអំពើពុករលួយនៅថ្នាក់ខ្ពស់របស់រដ្ឋាភិបាលក៏ដោយ។ របាយការណ៍បានផ្តល់អនុសាសន៍ជាច្រើនដើម្បីធ្វើការកែលំអរ ជាពិសេសការពង្រឹងស្ថាប័នអង្គភាពប្រឆាំងអំពើពុករលួយ (ACU) តាមមាត្រា ១៣ នៃច្បាប់ស្តីពីការប្រឆាំងអំពើពុករលួយ។
នៅមិនទាន់មានប្រតិកម្មតបពីមន្ត្រីរដ្ឋាភិបាលកម្ពុជានៅឡើយទេ ទាក់ទងនឹងរបាយការណ៍នេះ៕
