លោក កឹម សុខា ប្រធានអតីតគណបក្សសង្គ្រោះជាតិ បានចេញមកបញ្ជាក់បន្ថែមថា អ្វីដែលលោកបានសរសេរនៅលើទំព័រហ្វេសប៊ុកកាលពីពេលថ្មីៗនេះ គឺជាឆន្ទៈពិតរបស់លោកដោយមិនមានការបង្ខិតបង្ខំ ឬរងការគំរាមកំហែងណាមួយនោះទេ។
លោក កឹម សុខា បានសរសេរនៅលើទំព័រហ្វេសប៊ុករបស់លោក នៅថ្ងៃទី០១ ខែធ្នូនេះថា ការបង្ហាញជំហររបស់លោក តាមរយៈទំព័រហ្វេសប៊ុកផ្លូវការរបស់លោក កាលពីថ្ងៃទី២៨ ខែវិច្ឆិកា គឺធ្វើឡើងដោយឆន្ទៈពិតប្រាកដរបស់លោក និងមិនមែនធ្វើតាមអ្នកណាគំរាម ឬបង្ខំលោកនោះទេ។
លោកបានគូសបញ្ជាក់យ៉ាងដូច្នេះថា៖ «ខ្ញុំធ្វើអ្វីដែលខ្ញុំអាចធ្វើបានទៅតាមលទ្ធភាព កាលៈទេសៈ និងដោយឆន្ទៈពិតរបស់ខ្ញុំ មិនធ្វើតាមអ្នកណាគំរាមបង្ខំខ្ញុំឡើយ ជាពិសេសអ្វីដែលខ្ញុំផ្សព្វផ្សាយក្នុងផេក[facebook page] ផ្លូវការរបស់ខ្ញុំ»។
ការចេញមកបញ្ជាក់របស់ លោក កឹម សុខា នៅពេលនេះ គឺបានឆ្លើយតបទៅកាន់លោក សម រង្ស៊ី ដែលធ្លាប់បានចាត់ទុកការបង្ហោះសារនយោបាយរបស់លោក កឹម សុខា កាលពីថ្ងៃទី២៨ ខែវិច្ឆិកា នោះថាធ្វើឡើងក្រោមការគំរាមកំហែងពីលោកនាយករដ្ឋមន្ត្រី ហ៊ុន សែន។
កាលពីថ្ងៃទី២៨ ខែវិច្ឆិកា លោក កឹម សុខា បានលើកឡើងនៅលើបណ្ដាញសង្គមហ្វេសប៊ុករបស់លោកថា សកម្មភាពរបស់ លោក សម រង្ស៊ី និងសហការីរបស់ខ្លួនកន្លងមក ជាពិសេសសកម្មភាពថ្មីៗនេះ បានបញ្ជាក់ឱ្យឃើញថា លោក សម រង្ស៊ី និងលោក កឹម សុខា មិនមែនជាមនុស្សតែមួយទេ ព្រោះសកម្មភាពទាំងអស់នោះមិនមានការគាំទ្រ ឬជាជំហររបស់លោកនោះឡើយ។
កាលពីថ្ងៃម្សិលមិញ កូនស្រីទាំងពីររបស់លោក កឹម សុខា ក៏បានបញ្ចេញប្រតិកម្មដូចគ្នានេះដែរ។ កញ្ញា កឹម មនោវិទ្យា ដែលជាកូនស្រីច្បងរបស់លោក កឹម សុខា បានសរសេរនៅលើបណ្ដាញសង្គម (Twitter) ថា ឪពុករបស់ខ្លួនមានសិទ្ធិក្នុងការបញ្ចេញមតិ ដើម្បីប្រាប់ដៃគូរបស់លោកឱ្យបញ្ឈប់ការកេងចំណេញនិងបោកប្រាស់សាធារណជនតទៅទៀត៕