គិតត្រឹមរយៈពេល ១០ ខែដើមឆ្នាំនេះ កម្ពុជាបាននាំចេញទៅចិនប្រមាណ ១,២ ពាន់លានដុល្លារ ខណៈប្រទេសចិននាំទំនិញចូលមកកម្ពុជាដែលគិតជាទឹកប្រាក់ប្រមាណ ៧,៧ ពាន់លានដុល្លារអាមេរិក។
ស្ថានទូតចិនប្រចាំនៅកម្ពុជា កាលពីថ្ងៃទី២ ខែធ្នូ ឆ្នាំ២០២១ បានឱ្យដឹងថា ទំហំពាណិជ្ជកម្មទ្វេភាគីរវាងចិននិងកម្ពុជា បានកើនទឹកប្រាក់រហូតដល់ ៨ ៩៣១ លានដុល្លារអាមេរិក ពោលគឺមានកំណើន ៣៨.៥៦% បើធៀបនឹងរយៈពេលដូចគ្នាកាលពីឆ្នាំ២០២០។
ប្រភពដដែលបានលើកឡើងថា ទំហំនៃការនាំចេញរបស់កម្ពុជាទៅកាន់ប្រទេសចិន មានចំនួនប្រមាណ ១ ២២២ លានដុល្លារអាមេរិក មានកំណើន ៤៩% ខណៈទំហំនៃការនាំចូលពីប្រទេសចិនមកកាន់កម្ពុជាវិញមានចំនួនប្រហែល ៧ ៧០៩ លានដុល្លារអាមេរិក មានកំណើន ៣៧% បើធៀបនឹងរយៈពេលដូចគ្នាកាលពីឆ្នាំ២០២០។
អ្នកនាំពាក្យក្រសួងពាណិជ្ជកម្មកម្ពុជា លោក ស៊ាង ថៃ មានប្រសាសន៍ថា ទោះបីជាបច្ចុប្បន្ន ជញ្ជីងពាណិជ្ជកម្មរបស់កម្ពុជាទាបជាងប្រទេសចិនក៏ដោយ តែលោកសង្ឃឹមថានៅថ្ងៃអនាគតតួលេខនាំចេញពីកម្ពុជានឹងកើនឡើងជាងនេះ។
លោកលើកឡើងថា៖ «ដើម្បីឲ្យតួលេខនាំចេញពីកម្ពុជាកើនឡើង យើងត្រូវបំពេញការងារជាច្រើន ដូចជាពង្រីកផលិតកម្ម លើកកំពស់គុណភាពទំនិញ អនាម័យ ភូតគាមអនាម័យ កែសម្រួលប្រព័ន្ធឡូជីស្ទិក និងជំរុញការនាំចេញជាដើម»។
ការកើនឡើងនៃទំហំពាណិជ្ជកម្មកម្ពុជាចិននេះ បានកើតឡើងស្របពេលដែលកម្ពុជាចិន បានចុះកិច្ចព្រមព្រៀងពាណិជ្ជកម្មសេរី (ATF) ជាផ្លូវការកាលពីថ្ងៃទី១២ ខែតុលា ឆ្នាំ២០២០ ហើយកិច្ចព្រមព្រៀងនេះនឹងត្រូវចូលជាធរមាននៅខែមករា ឆ្នាំ២០២២ ខាងមុខនេះ៕