រដ្ឋបាលជលផល បានប្រាប់ដល់ប្រជាពលរដ្ឋដែលមានបំណងចង់ធ្វើប្រហុក ផ្អក ត្រីប្រឡាក់ ឬត្រីឆ្អើរ សម្រាប់ទុកបរិភោគប្រចាំឆ្នាំ អាចរកទិញត្រីនៅតាមផ្សារត្រីនានា ក្នុងភូមិសាស្ត្រខេត្តកណ្ដាល និងរាជធានីភ្នំពេញ ដោយសារជារដូវត្រីត្រូវ ឬ អ្នកនេសាទនឹងរកត្រីបានច្រើន។
រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១២ ខែធ្នូ ឆ្នាំ២០២១នេះ បានបញ្ជាក់ថា នៅរដូវនេសាទឆ្នាំ២០២១-២០២២ កម្ពស់ទឹកដែលហូរចេញពីទន្លេសាបបង្ហាញថា គន្លងដាយនៅតាមដងទន្លេសាបក្នុងភូមិសាស្ត្រខេត្តកណ្ដាល និងរាជធានីភ្នំពេញ អាចនេសាទត្រីបានច្រើនចាប់ពីខែមិគសិរនេះពីថ្ងៃទី៨កើត រហូតដល់ថ្ងៃ១២កើត ដែលត្រូវនឹងថ្ងៃទី១២ ខែធ្នូ រហូតដល់ថ្ងៃទី១៦ ខែធ្នូ ឆ្នាំ២០២១ ប្រសិនបើមេឃស្រឡះល្អ គ្មានភ្លៀងកក់ខែ ឬទទួលរងឥទ្ធិពលព្យុះ។
ប្រភពដដែលបន្តថា ជាមួយគ្នានេះអាជ្ញាធរមូលដ្ឋាន និងសមត្ថកិច្ចពាក់ព័ន្ធមេត្តាជួយបង្កលក្ខណៈងាយស្រួលដល់ប្រជាពលរដ្ឋបានធ្វើដំណើរ ស្នាក់នៅ និងដឹកជញ្ជូនផលិតផលត្រីបានដោយរលូនតាមការគួរ។
កាលពីឆ្នាំមុនរដូវត្រីត្រូវ ឬ ការនេសាទត្រីបានច្រើន គឺមានរយៈពេល១សប្តាហ៍ ដោយគិតចាប់ពីថ្ងៃទី១៤ ដល់ទី២០ ខែធ្នូ។
យ៉ាងណា ពលរដ្ឋមួយចំនួនដែលសម្រុកទៅទិញត្រីធ្វើប្រហុក ផ្អក ត្រីឆ្អើរជាដើម សម្រាប់បរិភោគប្រចាំឆ្នាំមួយចំនួនបានប្រាប់វីអូឌីកាលពីខែធ្នូឆ្នាំ២០២០ថា ត្បិតតែជារដូវនេសាទត្រីបានច្រើនពិតមែន ប៉ុន្តែតម្លៃត្រីពេលនោះ បានឡើងថ្លៃខុសពីឆ្នាំមុនៗ៕
