គណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ថា ខ្លួនទទួលបានបណ្ដឹង២ករណីប្រឆាំងគណបក្សភ្លើងទៀន អំពីសមាសភាពមេឃុំចៅសង្កាត់ដែលមិនគ្រប់លក្ខន្តិកៈកំណត់ដោយច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំសង្កាត់ ហើយត្រូវបានប្រជាពលរដ្ឋប្ដឹងជំទាស់។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បញ្ជាក់ថា ចាប់តាំងពីថ្ងៃប្រកាសបញ្ជីបេក្ខភាពមេឃុំចៅសង្កាត់ កាលពីថ្ងៃទី១២ ខែមីនាមក គ.ជ.ប ទើបទទួលបានបណ្ដឹង២ករណីប៉ុណ្ណោះ ដែលប្រឆាំងគណបក្សភ្លើងទៀន។ លោកបន្តថា រាល់បណ្ដឹង គឺត្រូវដោះស្រាយក្នុងកម្រិតគណៈកម្មការឃុំសង្កាត់រៀបចំការបោះឆ្នោត (គឃ.សប) ប៉ុន្តែ២សំណុំរឿងនេះអាចលើសពីសមត្ថភាពដែល គឃ.សប ដោះស្រាយ ទើបត្រូវបញ្ជូនបន្តមក គ.ជ.ប ថ្នាក់ជាតិ។
ប្រភពដដែលបន្តថា ទាំង២សំណុំរឿងនេះសុទ្ធតែរងការចោទប្រកាន់ពីពលរដ្ឋថា បេក្ខភាពមេឃុំចៅសង្កាត់របស់គណបក្សភ្លើងទៀនអសមត្ថភាព និងមិនគ្រប់លក្ខន្តិកៈដែលកំណត់ដោយ គ.ជ.ប។
លោកបន្តថា៖ «ដើមបណ្ដឹងហ្នឹងមានសមាសភាព៥នាក់ដែលប្ដឹងចោទប្រកាន់ថា បេក្ខភាពមិនគ្រប់លក្ខខណ្ឌធ្វើជាបេក្ខជនក្រុមប្រឹក្សាឃុំសង្កាត់ ដោយសារគាត់អត់ចេះអក្សរ»។
បើតាមលោក ហង្ស ពុទ្ធា សំណុំរឿងទាំង២ដែលប្រជាពលរដ្ឋប្ដឹងនោះ គឺមួយករណីនៅឃុំឫស្សីជ្រុំ ស្ថិតនៅស្រុកថ្មបាំង ខេត្តកោះកុង ហើយមួយករណីទៀត ស្ថិតនៅសង្កាត់ផ្សារដេប៉ូ២ រាជធានីភ្នំពេញ។
វីអូឌី ពុំអាចសុំការបំភ្លឺបានទេពីអ្នកនាំពាក្យគណបក្សភ្លើងទៀន លោក ថាច់ សេដ្ឋា។
ប៉ុន្តែមន្រ្តីរបស់គណបក្សនេះដែលចុះទៅមូលដ្ឋាននៃស្រុកថ្មបាំង ខេត្តកោះកុង បានបង្ហោះសារនៅលើបណ្ដាញទំនាក់ទំនងសង្គមហ្វេសប៊ុកថា គណបក្សរបស់ខ្លួននឹងស្វែងរកបេក្ខជនថ្មីមកជំនួស ប៉ុន្តែក៏ព្រមានពីការរៀបចំបណ្ដឹងប្ដឹងប្រឆាំងភាគីម្ខាងទៀត ដែលតែងតែយាយីនិងធ្វើទុក្ខបុកម្នេញរាល់សកម្មភាពរបស់គណបក្សភ្លើងទៀនវិញដែរ។
យ៉ាងនេះក្ដី លោក កន សាវាង្ស មន្រ្តីសម្របសម្រួលផ្នែកអង្កេត និងតស៊ូមតិ នៃអង្គការខុមហ្រ្វែល យល់ឃើញថា បើផ្អែកលើច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំសង្កាត់ មានន័យថា បេក្ខភាពមេឃុំចៅសង្កាត់ដែលស្នើឡើងដោយគណបក្សភ្លើងទៀន ពិតជាមិនទាន់មានលក្ខណៈសម្បត្តិគ្រប់គ្រាន់អាចឈរជាមេឃុំចៅសង្កាត់បានមែន។
លោកបន្តថា៖ «នៅក្នុងលក្ខខណ្ឌ គឺកំណត់បែបហ្នឹង! ប្រសិនបើអត់បានបំពេញលក្ខខណ្ឌ គឺចាំបាច់ណាស់ គណៈកម្មាធិការជាតិរៀបចំការបោះឆ្នោតឃុំសង្កាត់ ត្រូវបដិសេធហើយ។ នៅក្នុងមាត្រានៃច្បាប់ មិនមានចំណុចណាថាលក្ខខណ្ឌមិនគ្រប់គ្រាន់ ត្រូវយកអីមកយោងឬក៏ដោះដូរ គឺអត់បានលើកឡើងអំពីបញ្ហាហ្នឹងទេ»។
មាត្រា៣៥ នៃច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំសង្កាត់ បានកំណត់ថា ប្រជាពលរដ្ឋទាំងពីរភេទដែលមានបំណងឈរឈ្មោះជាបេក្ខភាពមេឃុំចៅសង្កាត់ ត្រូវបំពេញលក្ខខណ្ឌ ដូចជា មានសញ្ជាតិខ្មែរពីកំណើត ចេះអាននិងសរសេរអក្សរខ្មែរពីកំណើតបាន ចុះឈ្មោះក្នុងបញ្ជីបោះឆ្នោតឃុំសង្កាត់ដែលខ្លួនមានបំណងឈរឈ្មោះ និងមានអាយុយ៉ាងតិច២៥ឆ្នាំ គិតមកដល់ថ្ងៃបោះឆ្នោតជ្រើសរើសក្រុមប្រឹក្សាសង្កាត់។
នៅថ្ងៃទី១៤ ខែមីនានេះ ស្ថាប័នជាតិរៀបចំការបោះឆ្នោត បានចេញសេចក្ដីជូនដំណឹងពីកិច្ចប្រជុំផ្សព្វផ្សាយជាមួយភាគីពាក់ព័ន្ធតាមអនឡាញ ដែលគ្រោងដំណើរការនៅថ្ងៃទី១៧ ខែមីនាខាងមុខនេះ។ តាមរយៈសេចក្ដីជូនដំណឹងរបស់ខ្លួន គ.ជ.ប បញ្ជាក់ថា កិច្ចប្រជុំនេះផ្ដោតសំខាន់ទៅលើការបិទផ្សាយទៅលើបញ្ជីបេក្ខជនដំបូង ការដាក់និងការទទួល និងដោះស្រាយពាក្យបណ្ដឹងជំទាស់លើបញ្ជីបេក្ខជនដំបូង៕
