ប្រធានក្រុមប្រឹក្សាជំនុំជម្រះនៃគណៈកម្មាធិការជាតិរៀបចំការបោះឆ្នោត (គ.ជ.ប) សម្រេចលុបចោលបញ្ជីបេក្ខជនទាំងអស់នៃគណបក្សភ្លើងទៀនក្នុងសង្កាត់ទួលស្វាយព្រៃទី១ ដោយសាររកឃើញថា មានភាពមិនប្រក្រតីនៃដំណើរការចុះឈ្មោះបេក្ខជនសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់។
ការសម្រេចនេះបានធ្វើឡើងបន្ទាប់ពី គ.ជ.ប បើកសវនាការជាសាធារណៈលើបណ្ដឹងសុំបដិសេធបញ្ជីបេក្ខជនគណបក្សនយោបាយរបស់គណបក្សភ្លើងទៀន នៃសង្កាត់ទួលស្វាយព្រៃទី១ នៅទីស្ដីការ គ.ជ.ប នៅថ្ងៃអង្គារនេះ។
ក្រោយពីសួរដេញដោល និងស្ដាប់ការធ្វើសេចក្ដីសន្និដ្ឋានរបស់មេធាវីដើមបណ្ដឹង និងមេធាវីការពារក្ដីឱ្យគណបក្សភ្លើងទៀនរួចមក ប្រធានក្រុមប្រឹក្សាជំនុំជម្រះ នៃគណៈកម្មាធិការជាតិរៀបចំការបោះឆ្នោត លោក ប្រាជ្ញ ចន្ទ បានសម្រេចលុបបញ្ជីឈរឈ្មោះរបស់បេក្ខជនទាំងអស់មកពីគណបក្សភ្លើងទៀន ក្នុងសង្កាត់ទួលស្វាយព្រៃទី១ ចេញពីបញ្ជីឈរឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់ ក្រោយពីរកឃើញមានភាពមិនប្រក្រតីក្នុងការចុះឈ្មោះនាពេលកន្លងមក។
លោកប្រកាសដូច្នេះថា៖ «សម្រេចមួយ ទទួលពាក្យបណ្ដឹងរបស់លោក ម៉ៅ មុន្នី ចុះថ្ងៃ១៩ ខែមីនា ឆ្នាំ២០២២ ដែលគណៈកម្មាធិការជាតិរៀបចំការបោះឆ្នោតបានទទួលនៅថ្ងៃទី១៩ ខែមីនា ឆ្នាំ២០២២ ទុកជាត្រឹមត្រូវតាមទម្រង់ និងគតិច្បាប់។ សេចក្ដីសម្រេចនេះ ជំនុំជម្រះ និងប្រកាសជាសាធារណៈនៅថ្ងៃទី២២ ខែមីនា ឆ្នាំ២០២២ នៅចំពោះមុខគូភាគី និងមេធាវីតំណាង ជាសេចក្ដីសម្រេចស្ថាពរ បិទផ្លូវតវ៉ា»។
ក្នុងបន្ទប់សវនាការ លោក ទៀង វុទ្ធា ជាមេធាវីការពារក្ដីឱ្យដើមបណ្ដឹង ឈ្មោះ ម៉ៅ មុន្នី ដែលជាបេក្ខជនឈរឈ្មោះមកពីបក្សកាន់អំណាច លើកឡើងថា ដើមចមដែលនាំឱ្យកូនក្ដីរបស់លោកប្ដឹងទៅ គ.ជ.ប ឱ្យលុបឈ្មោះបេក្ខជននៃគណបក្សភ្លើងទៀន ចេញពីបញ្ជីឈរឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់នេះ ដោយសារតែក្នុងចំណោមបេក្ខជនទាំង១៨នាក់នោះ គឺមានបេក្ខជន៤នាក់បានក្លែងបន្លំឯកសារ ដូចជា លួចបំពេញប្រវត្តិរូប លួចចុះហត្ថលេខា និងផ្ដិតស្នាមមេដៃជំនួសបេក្ខជនផ្សេង។
បេក្ខជនទាំង៤នាក់ដែលលោក ទៀង វុទ្ធា អះអាងថាបានប្រព្រឹត្តខុសពីនីតិវិធីរបស់ គ.ជ.ប នោះ មានឈ្មោះ ស សេរីវុទ្ធី, លឹម គឹមងួន, គាង ខេង និងអ្នកស្រី ជា ឡេង។
លោកមានប្រសាសន៍ថា៖ «កូនក្ដីខ្ញុំបានប្ដឹងបដិសេធបញ្ជីឈ្មោះបេក្ខជននៃគណបក្សភ្លើងទៀន បានស្នើសុំឱ្យមានការច្រានចោលបញ្ជីឈ្មោះគណបក្សភ្លើងទៀនតាមផ្លូវច្បាប់ ដែលមិនបានបំពេញតាមលក្ខខណ្ឌ និងមិនបានត្រឹមត្រូវ»។
លោក យ៉ែម សារ៉ាក់ តំណាងឱ្យគណបក្សភ្លើងទៀន ប្រចាំនៅខណ្ឌបឹងកេងកង រៀបរាប់ថា ដោយសារតែមានការទុកចិត្តគ្នារវាងអ្នកជិតខាង និងអ្នកគាំទ្របក្សជាមួយគ្នា ទើបពួកគេបានប្រគល់រូបថត និងអត្តសញ្ញាណបណ្ណ ឱ្យក្រុមការងារបក្សជួយបំពេញឈ្មោះពួកគេចំនួន៤នាក់ ដើម្បីត្រៀមចុះក្នុងបញ្ជីឈរឈ្មោះបោះឆ្នោតក្នុងសង្កាត់ទួលស្វាយព្រៃទី១ ប៉ុន្តែក្រោយពីចុះឈ្មោះរួច ស្រាប់តែសាម៉ីខ្លួនដាក់ពាក្យបណ្ដឹងទៅ គ.ជ.ប សុំដកឈ្មោះបេក្ខជនសរុប១៨នាក់ចេញពីបញ្ជីឈរឈ្មោះបោះឆ្នោតវិញ។
មេធាវីការពារក្ដីឱ្យបេក្ខជនគណបក្សភ្លើងទៀន លោក កើត ឃី មានប្រសាសន៍ថា បេក្ខជនដែលធ្វើខុសនីតិវិធីមានតែ៤នាក់តែប៉ុណ្ណោះ ខណៈ១៤នាក់ទៀតបានបំពេញតាមទម្រង់លក្ខខណ្ឌរបស់ គ.ជ.ប ដែលបានកំណត់។ ប៉ុន្តែក្រុមប្រឹក្សាជំនុំជម្រះនៃ គ.ជ.ប បែរជាសម្រេចលុបចោលបញ្ជីបេក្ខជនគណបក្សភ្លើងទៀនក្នុងសង្កាត់ទួលស្វាយព្រៃទី១ទាំងអស់ទៅវិញ។ លោកចាត់ទុកការសម្រេចនោះថា ជារឿងអយុត្តិធម៌ដល់អ្នកដែលមិនបានធ្វើខុសច្បាប់។
លោក កើត ឃី ថ្លែងថា៖ «បើយើងគិតពីផ្លូវច្បាប់ គ្រួសារមួយមិនអាចបុគ្គលណាមួយក្នុងគ្រួសារធ្វើខុស ត្រូវមានទោសមួយគ្រួសារ គឺអត់អីចឹងទេ! គឺគេត្រូវយកតែបុគ្គលដែលធ្វើខុសហ្នឹងចេញទេ។ ដោយឡែកនេះ ការសម្រេចលុបបញ្ជីរបស់គណបក្សភ្លើងទៀនចោល គឺធ្វើឱ្យអ្នកត្រឹមត្រូវទាំង១៤នាក់ទៀតខកខានមិនបានឈរជាបេក្ខជនមួយអាណត្តិទៀតហើយ ៥ឆ្នាំ គឺយើងមានការសោកស្ដាយ»។
នៅថ្ងៃនេះ គណបក្សភ្លើងទៀន ក៏បានចេញសេចក្ដីថ្លែងការណ៍មួយ ដោយបង្ហាញការសោកស្ដាយចំពោះការសម្រេចរបស់ គ.ជ.ប ។ គណបក្សនេះ បានអំពាវនាវទៅ គ.ជ.ប ពិចារណាឡើងវិញ និងរក្សាជំហអព្យាក្រឹត មិនលម្អៀង ដើម្បីធានាដល់ការបោះឆ្នោតក្រុមប្រឹក្សាឃុំ-សង្កាត់ ខាងមុខ ប្រព្រឹត្តទៅដោយសេរី ត្រឹមត្រូវ និងយុត្តិធម៌។
នាយកប្រតិបត្តិអង្គការនិកហ្វិច លោក សំ គន្ធាមី មានប្រសាសន៍ថា ការលុបឈ្មោះបេក្ខជនពីបញ្ជី គួរតែលុបតែឈ្មោះបេក្ខជនណាដែលធ្វើខុសពីនីតិវិធី ដោយមិនត្រូវលុបបេក្ខជនដែលមិនមានកំហុសនោះទេ ព្រោះការធ្វើបែបនេះនឹងប៉ះពាល់មួយផ្នែកដល់ដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់។
លោកមានប្រសាសន៍ថា៖ «គ.ជ.ប កំហុសប៉ុណ្ណឹង មិនគួរសម្រេចធ្ងន់ធ្ងររហូតដល់លុបឈ្មោះបេក្ខជនចេញពីសង្កាត់ទាំងមូលទេ ព្រោះកំហុសតែ៣ទៅ៤នាក់អ៊ីចឹង បើលុបទាំងអស់ វាប៉ះពាល់ដល់សិទ្ធិបោះឆ្នោតទៀត ពីព្រោះគណបក្សដែលគេមានជម្រើស គេគាំទ្រ»។
លោបន្ថែមថា៖ «នេះជាផ្នែកមួយនៃដំណើរការបោះឆ្នោតដែរ វាមិនមែនដល់ថ្នាក់ប៉ះពាល់ដល់ដំណើរការបោះឆ្នោតទាំងជាង១ ៦៥០ឃុំ ប៉ុន្តែវាជាការរឹតត្បិតសេរីភាពរបស់គណបក្សនយោបាយដែលបានដាក់ពង្រាយបេក្ខជន»។
កាលពីថ្ងៃទី៤ ដល់ថ្ងៃទី៦ ខែមីនា ឆ្នាំ២០២២ គ.ជ.ប បានបើកឱ្យគណបក្សនយោបាយចុះឈ្មោះបេក្ខជនរបស់ខ្លួន សម្រាប់ឈរឈ្មោះក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ ក្នុងនោះមានគណបក្សនយោបាយចំនួន១៧ដែលបានដាក់បញ្ជីបេក្ខភាពរបស់ខ្លួន។
បើតាមប្រតិទិនរបស់ គ.ជ.ប ការបោះឆ្នោតជ្រើសរើសក្រុមប្រឹក្សាឃុំសង្កាត់ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ខាងមុខនេះ៕