ប្រធានក្រុមប្រឹក្សាជំនុំជម្រះនៃគណៈកម្មាធិការជាតិរៀបចំការបោះឆ្នោត (គ.ជ.ប) សម្រេចលុបឈ្មោះបេក្ខជនជិត ៦០នាក់នៅសង្កាត់ចំនួន៣ មកពីគណបក្សភ្លើងទៀន ចេញពីបញ្ជីឈរឈ្មោះក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ ក្រោយរកឃើញភាពមិនប្រក្រតីក្នុងដំណើរការដាក់បេក្ខជននាពេលកន្លងមក។
ការសម្រេចនេះ ធ្វើឡើងបន្ទាប់ពីដើមបណ្តឹងបានដាក់បណ្តឹងស្នើសុំលុបឈ្មោះបេក្ខជនដំបូងនៃគណបក្សភ្លើងទៀន ស្ថិតនៅក្នុង សង្កាត់ព្រែកលៀប សង្កាត់ផ្សារដើមគរ និងសង្កាត់មនោរម្យ រាជធានីភ្នំពេញ។
ក្រុមមេធាវីដើមបណ្តឹង រួមមាន លោក ឈន ពេជ្យអរុណរះ លោក សួស ព័រ និងលោក វង់ បាយ័ន បានលើកឡើងក្នុងបន្ទប់សវនាការនាព្រឹកថ្ងៃព្រហស្បតិ៍នេះប្រហាក់ប្រហែលគ្នាថា ការស្នើសុំលុបឈ្មោះបេក្ខជនឈរឈ្មោះបោះឆ្នោតឱ្យគណបក្សភ្លើងទៀនទាំង ៣សង្កាត់នេះ ដោយសារតែបេក្ខជនខ្លះឱ្យគេបំពេញឯកសារជំនួស និងបេក្ខជនខ្លះទៀត មិនចេះសរសេរនិងអានអក្សរ មិនបានចុះហត្ថលេខានិងផ្តិតមេដៃលើឯកសារជាដើម ដែលទង្វើទាំងនេះផ្ទុយនឹងច្បាប់។
ចំណែក លោក សំ សុគង់ ដែលជាមេធាវីការពារក្តីឱ្យចុងចម្លើយដែលជាបេក្ខជនមកពីគណបក្សភ្លើងទៀន បានទទួលស្គាល់ថា មានបេក្ខជនតិចតួចប៉ុណ្ណោះដែលមិនបានបំពេញគ្រប់លក្ខខណ្ឌ ប៉ុន្តែគណបក្សនេះបានដាក់បេក្ខជនបម្រុងជំនួសរួចហើយ។ ករណីនេះ លោកបានស្នើដល់ប្រធានក្រុមប្រឹក្សាជំនុំជម្រះ ពិចារណាក្នុងការលុបតែឈ្មោះបេក្ខជនណាដែលរកឃើញថាមានកំហុស ចំណែកបេក្ខជនផ្សេងទៀត គួររក្សាទុកនៅដដែល។
តែយ៉ាងណា ក្រោយពីស្តាប់ការបកស្រាយពីមេធាវីដើមបណ្តឹង និងមេធាវីចុងចម្លើយរួច ប្រធានក្រុមប្រឹក្សាជំនុំជម្រះនៃគណកម្មាធិការជាតិរៀបចំការបោះឆ្នោត និងជាប្រធាន គ.ជ.ប លោក ប្រាជ្ញ ចន្ទ បានសម្រេចលុបបញ្ជីបេក្ខជនដំបូងរបស់គណបក្សភ្លើងទៀនក្នុងសង្កាត់ព្រែកលៀប សង្កាត់មនោរម្យ និងសង្កាត់ផ្សារដើមគរ រាជធានីភ្នំពេញ ដែលជាសេចក្តីសម្រេចស្ថាពរបិទផ្លូវតវ៉ា។
បេក្ខជនពេញសិទ្ធិ និងបេក្ខជនបំរ៉ុងទាំង៣សង្កាត់ ដែលត្រូវប្រធានក្រុមប្រឹក្សាសម្រេចលុបបញ្ជីបោះឆ្នោតទាំងអស់សរុប៥៨រូប រួមមាន សង្កាត់ព្រែកលៀបបេក្ខជនពេញសិទ្ធិ៩រូប និងបេក្ខជនបំរ៉ុង៩រូប , សង្កាត់មនោរម្យបេក្ខជនពេញសិទ្ធិ៩រូប និងបេក្ខជនបំរ៉ុង៩រូប និងសង្កាត់ផ្សារដើមគរបេក្ខជនពេញសិទ្ធិ១១នាក់ និងបេក្ខជនបំរ៉ុង១១នាក់ ។
លោកមេធាវី សំ សុគង់ ចាត់ទុការសម្រេចរបស់ប្រធានក្រុមប្រឹក្សា គ.ជ.ប ថា ជារឿងអយុត្តិធម៌ និងជារឿងនយោបាយច្រើនជាងការអនុវត្តតាមវិធានច្បាប់ដែលបានចែង។ លោកថា នៅក្នុងបញ្ជីបេក្ខជនឈរឈ្មោះដំបូងរបស់គណបក្សភ្លើងទៀន មានសំណុំរឿងក្នុងសង្កាត់ខ្លះមានកំហុស២នាក់ ក្នុងចំណោម១៩នាក់ និងខ្លះទៀត មានកំហុស៣នាក់ ក្នុងចំណោម២២នាក់ ប៉ុន្តែបែរជាប្រធានក្រុមប្រឹក្សាជំនុំជម្រះនៃ គ.ជ.ប សម្រេចលុបបញ្ជីបេក្ខជនចោលទាំងអស់ ទាំងអ្នកដែលមិនបានប្រព្រឹត្តកំហុស។
តែយ៉ាងណា អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍ថា គ.ជ.ប សម្រេចសេចក្តីឈរលើមូលដ្ឋានច្បាប់ជាគោល ដោយមិនទំនោរទៅគណបក្សនយោបាយណាមួយឡើយ ។
លោកមានប្រសាសន៍ថា៖ «លោកបានបំពានលើបទបញ្ញត្តិច្បាប់ លោកបានបំពានទៅលើការយល់ដឹង ដែលដឹងថា បញ្ជីបេក្ខជនត្រូវតែចេះអក្សរ បេក្ខជនត្រូវតែសរសេរសំណុំបែបបទដោយខ្លួនឯង នៅពេលដែលតំណាងគណបក្សប្រចាំមូលដ្ឋានគាត់ដឹងច្បាស់ ហើយគាត់នៅតែជួយសរសេរទៀត នោះឈានទៅដល់ការលុបបញ្ជីបេក្ខជននៃគណបក្សនយោបាយនោះឯង»។
នាយកប្រតិបត្តិអង្គការនិចហ្វិច លោក សំ គន្ធាមី មានប្រសាសន៍ថា តាមច្បាប់ បើសិនជាបេក្ខជនរបស់គណបក្សនយោបាយណាមួយ ចុះឈ្មោះជាបេក្ខជនដោយមិនបានគោរពតាមលក្ខខណ្ឌ និងច្បាប់ នោះគ.ជ.ប អាចសម្រេចលុបឈ្មោះបេក្ខជននោះបាន។ ផ្ទុយទៅវិញ បើសិនជាក្នុងបញ្ជីឈ្មោះបេក្ខជនមានច្រើននាក់ ហើយមានបេក្ខជនឈរឈ្មោះតែម្នាក់ឬពីរនាក់ មិនបានបំពេញតាមលក្ខខណ្ឌច្បាប់ ហើយ គ.ជ.ប សម្រេចលុបបញ្ជីបោះឆ្នោតក្នុងឃុំសង្កាត់នោះទាំងមូលនោះ លោកថា ជាការដាក់សម្ពាធទៅគណបក្សនយោបាយនោះ និងធ្វើឱ្យការបោះឆ្នោត មិនមានតម្លាភាព សេរី និងយុត្តិធម៌នោះទេ។
លោកមានប្រសាសន៍ថា៖ «វាធ្ងន់ធ្ងរពេលហើយ ការសម្រេចនេះ វាប៉ះពាល់ដល់ដំណើរការបោះឆ្នោតយើងដែរ ទីពីរ អវត្តមាន [បេក្ខជនឈឈ្មោះ] ក្នុងឃុំសង្កាត់ វាប៉ះពាល់ដល់អ្នកគាំទ្របេក្ខជន ពីព្រោះបេក្ខជនគេអត់ខុសក្នុងចំណោមបេក្ខដែលគេបានបំពេញបែបបទត្រឹមត្រូវ ព្រោះការដោះស្រាយវិវាទទាមទារឱ្យមានតម្លាភាព បើខុសតែម្នាក់ពីរនាក់ ហើយយើងមោឃភាពទាំងអស់ វាប៉ះពាល់ដល់អ្នកដែលរៀបចំឯកសារត្រឹមតូវ»។
បើតាមប្រតិទិនរបស់ គ.ជ.ប ការបោះឆ្នោតជ្រើសរើសក្រុមប្រឹក្សាឃុំសង្កាត់ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ខាងមុខនេះ៕
