គណៈកម្មាធិការជាតិរៀបចំការបោះឆ្នោត (គ.ជ.ប) បញ្ជាក់ជាថ្មីទៀត ពីមូលហេតុផ្លូវច្បាប់រឹងម៉ាំដែលឈានទៅដល់ការលុបបញ្ជីបេក្ខជនឈរឈ្មោះជាមេឃុំចៅសង្កាត់មកពីគណបក្សភ្លើងទៀន នៅក្នុងសង្កាត់ខ្លះ។
គ.ជ.ប បានចេញសេចក្តីប្រកាសព័ត៌មានមួយនៅថ្ងៃទី៤ ខែមេសា ឆ្នាំ២០២២នេះ ដោយបញ្ជាក់ថា ការលុបបញ្ជីឈ្មោះនេះ គឺ គ.ជ.ប ផ្អែកលើអង្គហេតុ និងអង្គច្បាប់រឹងម៉ាំ និងច្បាស់លាស់ពោលមិនមែនចេះតែនឹកឃើញធ្វើតាមអារម្មណ៍ ឬកាត់ក្តីដោយលម្អៀងផ្នែកនយោបាយទេ។ សេចក្តីប្រកាសព័ត៌មាននេះ ជាឆ្លើយតបទៅនឹងគណបក្សភ្លើងទៀន ដែលនៅតែបន្តប្រតិកម្ម ប្រឆាំងសេចក្តីសម្រេចរបស់ គ.ជ.ប អំពីការលុបបញ្ជីបេក្ខជនរបស់គណបក្សក្រៅរដ្ឋាភិបាលមួយនេះ។
បើតាមសេចក្តីប្រកាសព័ត៌មានដដែល ស្ថាប័នជាតិរៀបចំការបោះឆ្នោត បានលើកយកមាត្រាមួយចំនួននៃច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់ និងអង្គហេតុ ព្រមទាំងរបាយការណ៍នៃការស្រាវជ្រាវ មកការពារ ពីការលុបបញ្ជីបេក្ខជននេះមកជាមួយផង។
អ្នកនាំពាក្យគណបក្សភ្លើងទៀន លោក ថាច់ សេដ្ឋា ប្រតិកម្មដោយចាត់ទុកការលុបបញ្ជីបេក្ខជនដោយ គ.ជ.ប នៅពេលនេះថា នៅតែមិនមានភាពច្បាស់លាស់ និងមិនផ្អែកលើគោលការណ៍ តម្លាភាព សេរី ត្រឹមត្រូវ និងយុត្តិធម៌ទេ។ លោកបន្តថា នៅក្នុងច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់ ពាក់ព័ន្ធនឹងទោសប្បញត្តិ គឺមិនមានចែងពីការលុបបញ្ជីបេក្ខជនទេ។
លោក ថាច់ សេដ្ឋា បន្ថែមថា វិធានការរបស់ស្ថាប័នជាតិរៀបចំការបោះឆ្នោតនេះ ពិតជាឆ្លុះបញ្ចាំងពីភាពលម្អៀងផ្នែកនយោបាយ។
លោកបន្តថា៖ «វាអត់មាននីតិវិធីណាដែលថាកំហុសកម្រិតណារំលាយបញ្ជី ហើយកំហុសកម្រិតណាត្រូវរំលាយបេក្ខជន ដូច្នេះបើបេក្ខជនមិនបានបំពេញតាមលក្ខណៈត្រឹមត្រូវ អាហ្នឹងលុបចុះវាអត់អីទេ។ ក៏ប៉ុន្តែបញ្ជីចុះរួចហើយនៅក្នុងស្ថាប័ន គ.ជ.ប ត្រឹមត្រូវនេះ ហេតុអីត្រូវលុបវាដែរ»។
បើតាមលោក ថាច់ សេដ្ឋា អ្វីដែលគួរឱ្យព្រួយបារម្ភជាងនេះ គឺប្រធានគណៈកម្មាធិការជាតិរៀបចំការបោះឆ្នោត លោក ប្រាជ្ញ ចន្ទ ជាតួអង្គថ្មី ដែលធ្លាប់ជាចៅហ្វាយខេត្តបាត់ដំបង និងខេត្តត្បូងឃ្មុំផង ហើយក៏ធ្លាប់ជានាយករដ្ឋបាលនៃក្រសួងមហាផ្ទៃ របស់គណបក្សប្រជាជនកម្ពុជា។ តាមរយៈអតីតភាពការងារ និងជាសមាជិកគណបក្សកាន់អំណាចទៀតនោះ ត្រូវបានលោក ថាច់ សេដ្ឋា អះអាងថា នេះអាចជាមូលហេតុ ដែលនាំឱ្យមានការលុបបញ្ជីឈ្មោះបេក្ខជនច្រើនសម្រាប់អាណត្តិនេះ។
បើទោះជាបែបណា គ.ជ.ប បញ្ជាក់ថា ការសម្រេចលុបបញ្ជីបេក្ខជននេះ ស្ថាប័នជាតិរៀបចំការបោះឆ្នោតមួយនេះ រកឃើញគណបក្សភ្លើងទៀនរើសបេក្ខជនមិនចេះទាំងអាន និងសរសេរអក្សរខ្មែរ។ ជាងនេះទៀត សាម៉ីខ្លួនដែលត្រូវបក្សជ្រើសរើស គឺពុំបានដឹងខ្លួន ហើយក៏មិនមានឆន្ទៈឈរឈ្មោះជាបេក្ខជន មេឃុំចៅសង្កាត់ទៀតផង។
បន្ថែមលើសេចក្តីប្រកាសព័ត៌មាននេះ អ្នកនាំពាក្យ គ.ជ.ប លោក ហង្ស ពុទ្ធា ច្រានចោលការលើកឡើងរបស់គណបក្សភ្លើងទៀន ដោយអះអាងថា ការងារដែលស្ថាប័នជាតិរៀបចំការបោះឆ្នោតធ្វើ គឺអនុវត្តជាសមូហភាព មិនមែនសម្រេចជាឯកតោភាគីណាមួយទេ។
លោកបន្តថា៖ «ខ្ញុំសូមបដិសេធការលើកឡើងរបស់តំណាងគណបក្សភ្លើងទៀន ដោយសារ គ.ជ.ប ធ្វើការងារជាក្រុម។ ការងារដែលចេញ គឺមិនមែនជាការងារដែលធ្វើដោយអត្តនោម័តិនោះទេ ហើយអ្វីៗប្រព្រឹត្តទៅផ្អែកតាមច្បាប់ »។
ប្រតិទិនដែលចេញដោយ គ.ជ.ប បង្ហាញថា ការបិទបញ្ជីបេក្ខជនផ្លូវការ នឹងត្រូវផ្សព្វផ្សាយនៅថ្ងៃទី ២៨ ខែមេសា ខាងមុខនេះ។
ប៉ុន្តែ អគ្គលេខាធិការរង គ.ជ.ប លោក សោម សូរីដា បញ្ជាក់កាលពីថ្ងៃទី៤ ខែមេសា ថា គណៈកម្មការឃុំសង្កាត់រៀបចំការបោះឆ្នោត បានបិទបញ្ជីបេក្ខជនផ្លូវការក្នុងកម្រិតគណៈកម្មការឃុំសង្កាត់ រៀបចំការបោះឆ្នោត កាលពីថ្ងៃសៅរ៍ចុងសប្តាហ៍មុននេះ។
នាយកប្រតិបត្តិអង្គការនិចហ្វិកលោក សំ គន្ធាមី យល់ឃើញថា រឿងបេក្ខភាពប្រធាន គ.ជ.ប ចេញពីប្រភពណានោះ មិនសំខាន់ទេ អ្វីដែលចាំបាច់គឺការបំពេញការងារដោយត្រឹមត្រូវ និងឯករាជ្យ ដូចមានកំណត់នៅក្នុងបទបញ្ជាផ្ទៃក្នុង និងលក្ខខន្តិកៈរបស់ គ.ជ.ប ទៅបានហើយ។
លោកបន្តថា៖ «ខ្ញុំអត់ចង់និយាយពី Background គាត់ទេ។ គាត់ធ្លាប់ទៅធ្វើចៅហ្វាយខេត្តបាត់ដំបង ទៅធ្វើតំណាងរាស្រ្តស្អីៗចឹងហ្អា។ អាហ្នឹងវាជារឿងមួយ ហើយក៏ជា CV របស់គាត់ទេ។ ខ្ញុំគ្រាន់តែថាការងាររបស់គាត់ ត្រូវប្រកាន់ការងារដោយឯករាជ្យសម្រាប់ គ.ជ.ប ទី១ ហើយទី២ ធ្វើអីត្រូវធ្វើទៅតាមច្បាប់ដែលមានស្រាប់ »។
អ្នកនាំពាក្យគណបក្សភ្លើងទៀនលោក ថាច់ សេដ្ឋា ឱ្យដឹងថា គិតមកដល់ពេលនេះ បេក្ខជនដែលឈរជាមេឃុំចៅសង្កាត់គណបក្សភ្លើងទៀន ដែលត្រូវ គ.ជ.ប លុបចេញពីបញ្ជីបោះឆ្នោតនោះ មានចំនួន ២៩ឃុំសង្កាត់ ដែលនាំឱ្យគណបក្សក្រៅរដ្ឋាភិបាលមួយនេះ នៅសល់បេក្ខជនមេឃុំចៅសង្កាត់ចំនួន ១ ៦២៣ឃុំសង្កាត់ ក្នុងចំណោមឃុំសង្កាត់សរុប ១ ៦៥២ឃុំសង្កាត់ ក្នុងក្របខណ្ឌទូទាំងប្រទេស៕ម៉ម មុនីរតន៍
