គណបក្សភ្លើងទៀន បានដាក់លិខិតទៅស្ថាប័នជាតិរៀបចំការបោះឆ្នោត (គ.ជ.ប) ដើម្បីស្នើសុំពិគ្រោះយោបល់អំពីបេក្ខភាពមេឃុំចៅសង្កាត់ ដែលគណបក្សក្រៅរដ្ឋាភិបាលនេះហៅថា «កំពុងរងការយាយី និងធ្វើទុក្ខបុកម្នេញផ្នែកនយោបាយ» ពីសំណាក់អាជ្ញាធរមូលដ្ឋាន នៅអំឡុងពេលយុទ្ធនាការដាក់បញ្ជីបេក្ខភាពមេឃុំចៅសង្កាត់នេះ។
ប្រាប់វីអូឌីនៅព្រហស្បតិ៍នេះ អនុប្រធានគណបក្សភ្លើងទៀន លោក ថាច់ សេដ្ឋា ឱ្យដឹងថា គណបក្សក្រៅរដ្ឋាភិបាលមួយនេះបានដាក់លិខិតទៅស្ថាប័ន គ.ជ.ប រួចហើយ។ លោកបន្តថា ការដាក់លិខិតទៅ គ.ជ.ប នេះ ក្នុងគោលបំណងដើម្បីពិគ្រោះនិងពិភាក្សាទៅលើបញ្ហាដែលកំពុងកើតឡើង នៅចំពោះមុខ។ បញ្ហាប្រឈមដែលលោក ថាច់ សេដ្ឋា លើកឡើង គឺបេក្ខជនដែលឈរជាមេឃុំចៅសង្កាត់ឱ្យគណបក្សភ្លើងទៀន នៅតែបន្តរងការគំរាមកំហែង ប្ដឹងផ្ដល់ទៅតុលាការ។
លោកបន្តថា៖ «ទាក់ទិននឹង គ.ជ.ប ហើយបញ្ហាដែលបានកើតឡើងបច្ចុប្បន្ន ធ្វើម៉េចឱ្យការប្រកួតប្រជែងមួយដែលយើងថាមានការខ្វះចន្លោះអី ដែលយើងអាចផ្ដល់យោបល់ឱ្យគ្នាទៅវិញទៅមក ដើម្បីកែលម្អឱ្យបានវាប្រពឹ្រត្តទៅល្អប្រសើរ»។
ផ្ដើមចេញពីបញ្ហានេះ គណបក្សភ្លើងទៀន ក៏ធ្លាប់បានដាក់លិខិតដូចគ្នាដែរទៅក្រសួងមហាផ្ទៃ។ តាមរយៈលិខិតដែលបានបញ្ជូនទៅក្រសួងមហាផ្ទៃ កាលពីថ្ងៃទី១០ ខែមីនា ឆ្នាំ២០២២ គណបក្សភ្លើងទៀន បានលើកឡើងនៅចំពោះមុខក្រសួងមហាផ្ទៃ ពីបញ្ហាប្រឈមទៅលើសកម្មជន និងបញ្ជីបេក្ខភាពបម្រើឱ្យការបោះឆ្នោតជ្រើសរើសក្រុមប្រឹក្សាឃុំសង្កាត់នៅក្នុងអាណត្តិទី៥នេះ។
អគ្គលេខាធិការរង នៃគណៈកម្មាធិការជាតិរៀបចំការបោះឆ្នោត លោក សោម សូរីដា បញ្ជាក់ថា គ.ជ.ប បានត្រៀមក្រុមការងារ ដើម្បីជួបតំណាងគណបក្សភ្លើងទៀនរួចហើយ នៅថ្ងៃទី១១ ខែមេសា ខាងមុខនេះ។
លោកបន្តថា៖ «ពីព្រឹកមិញនេះ ក៏បានជជែកគ្នាពីសមាសភាពដើម្បីជួបជាមួយនឹងតំណាងគណបក្សភ្លើងទៀន ក្នុងនោះមានឯកឧត្ដម អគ្គលេខាធិការ មានខ្ញុំ ហើយនិងមានឯកឧត្ដមអគ្គនាយកសេវាកម្មច្បាប់និងបច្ចេកទេស រួមទាំងប្រធាននាយកដ្ឋានជំនាញមួយចំនួនទៀត។ បាទ! តាមអ្វីដែលបានជជែកគ្នាហ្នឹង គឺគ្រោងជួបនៅថ្ងៃចន្ទ វេលាម៉ោង៩ព្រឹក សប្ដាហ៍ក្រោយនេះ»។
នៅក្នុងលិខិតវីអូឌីទទួលបាន ដែលគណបក្សភ្លើងទៀនផ្ញើទៅក្រសួងមហាផ្ទៃ បង្ហាញថា បើទោះជាកន្លងទៅ ទាំងលោកនាយករដ្ឋមន្រ្តី ហ៊ុន សែន និងលោក ស ខេង បានអំពាវនាវឱ្យមានការអត់ធ្មត់ខ្ពស់ និងបញ្ចៀសឱ្យបានពីហិង្សានយោបាយនៅពេលបោះឆ្នោត ប៉ុន្តែសកម្មភាពនៃការយាយីនេះ នៅតែកើតមានមិនឈប់ឈរ។
ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ លោក ស ខេង បានថ្លែងជាសាធារណៈជាថ្មីទៀតកាលពីម្សិលមិញ ដោយលើកឡើងថា គណបក្សភ្លើងទៀន គួរផ្ដល់ព័ត៌មានជាក់លាក់ទៅលើបញ្ហាដែលកើតឡើង។ បើតាមលោក ស ខេង មានតែការធ្វើដូច្នេះទេ ទើបអាចដោះស្រាយបញ្ហាបាន ហើយបើគ្រាន់តែលើកយកបញ្ហារួមនិងមិនច្បាស់លាស់ទៀត វាពិបាកនឹងឈានទៅរកដំណោះស្រាយណាស់។
លោកបន្តថា៖ «មូលហេតុអីគេដកបណ្ណក្រីក្រ? មូលហេតុគាត់ឈរឈ្មោះបេក្ខជនឱ្យគណបក្សភ្លើងទៀន ឬមួយក៏មូលហេតុណាមួយផ្សេងទៀត យើងក៏អត់ដឹងដែរ។ ប៉ុន្តែអំឡុងពេលហ្នឹង ជាពេលបោះឆ្នោតអ៊ីចឹងទៅ ក្រែងលោព័ត៌មានហ្នឹងវាចេះតែមកអ៊ីចឹងទៅ តើវាពិតកម្រិតណា? អ៊ីចឹងយើងខ្ញុំសូមស្វាគមន៍ព័ត៌មានដែលពិត»។
ឆ្លើយតបរឿងនេះ អនុប្រធានគណបក្សភ្លើងទៀន លោក ថាច់ សេដ្ឋា អះអាងថា គណបក្សនឹងប្រមូលបញ្ហាឱ្យបានលម្អិតបន្ថែម មុននឹងដាក់ទៅក្រសួងមហាផ្ទៃជាថ្មីទៀត។ យ៉ាងណា សម្រាប់អ្នកនយោបាយចាស់វស្សារូបនេះយល់ឃើញថា ការបើកផ្លូវពីលោក ស ខេង នេះ ហិង្សាផ្នែកនយោបាយនៅមុនថ្ងៃបោះឆ្នោត និងក្នុងដំណាក់កាលបោះឆ្នោត អាចនឹងត្រូវបានកាត់បន្ថយ។
នាយកប្រតិបត្តិអង្គការនិចហ្វិក លោក សំ គន្ធាមី យល់ឃើញថា តាមរយៈជំនួបទ្វេភាគីដែលនឹងកើតឡើងនាពេលខាងមុខនេះ លោកមានជំនឿថា លទ្ធផលដែលនឹងទទួលបានអាចស្ថិតក្នុងកម្រិតមួយមិនដូចការរំពឹងទុកដូចដែលគណបក្សក្រៅរដ្ឋាភិបាលនេះចង់ឃើញនោះទេ។
លោកបន្តថា៖ «ខ្ញុំជឿថាមានចំណុចវិជ្ជមានហើយ ប៉ុន្តែបានតិចតួច។ វាមិនបានដូចអ្វីដែលគណបក្សភ្លើងទៀនសំណូមពរទេ។ វាបាន តែតិចតួចប៉ុណ្ណោះ»។
បើតាមអ្នកជំនាញកិច្ចការបោះឆ្នោតរូបនេះ ដើម្បីធានាឱ្យការបោះឆ្នោតមួយ គ្រប់ភាគីនយោបាយទទួលយកបានតាមគោលការណ៍សេរី ត្រឹមត្រូវ និងយុត្តិធម៌ គឺស្ថាប័នជាតិរៀបចំការបោះឆ្នោត គួរពង្រឹងនិងជំរុញឱ្យភាគីពាក់ព័ន្ធត្រូវគោរពឱ្យបាននូវបទបញ្ជានិងនីតិវិធី រួមទាំងច្បាប់ផ្សេងទៀតដែលមានស្រាប់ ឱ្យមានប្រសិទ្ធភាព។ លោក សំ គន្ធាមី បញ្ជាក់ថា មានតែការអនុវត្តបែបនេះទេ ទើបធានាបាននូវសុក្រឹត្យភាពនៃដំណើរការបោះឆ្នោត។
ការបោះឆ្នោតជ្រើសរើសក្រុមប្រឹក្សាឃុំសង្កាត់នឹងប្រព្រឹត្តទៅនៅថ្ងៃអាទិត្យទី៥ ខែមិថុនា ឆ្នាំ២០២២ ខាងមុខ។ សម្រាប់ការបោះឆ្នោតឃុំសង្កាត់ លើកទី៥នេះ មានគណបក្សនយោបាយចំនួន១៧ បានចុះឈ្មោះចូលរួមបោះឆ្នោត ក្នុងចំណោមគណបក្សដែលបានចុះបញ្ជីនៅក្រសួងមហាផ្ទៃចំនួន៤៥គណបក្សនយោបាយ។
ដោយឡែក គណបក្សភ្លើងទៀន អាចនិយាយបានថាជាគណបក្សឈរលំដាប់លេខរៀងទី២ បន្ទាប់ពីគណបក្សប្រជាជនកម្ពុជា ដែលបានដាក់បេក្ខជនឈរជាមេឃុំចៅសង្កាត់បានច្រើនជាងគេ។ គិតមកដល់ថ្ងៃបិទបញ្ជីបេក្ខជនផ្លូវការ ត្រឹមកម្រិតគណៈកម្មការឃុំសង្កាត់រៀបចំការបោះឆ្នោត គណបក្សភ្លើងទៀន បញ្ជាក់ថា មាន១១ឃុំសង្កាត់ហើយ ត្រូវបាន គ.ជ.ប លុបចេញពីបញ្ជីបោះឆ្នោត។ ឃុំសង្កាត់ដែលត្រូវបានស្ថាប័នជាតិរៀបចំការបោះឆ្នោតលុបទាំង១១នោះ មាន៨សង្កាត់ នៅភ្នំពេញ និង៣ឃុំសង្កាត់ផ្សេងទៀត នៅខេត្តកំពង់ចាម និងខេត្តពោធិ៍សាត់៕
