មន្រ្តីជាន់ខ្ពស់គណបក្សភ្លើងទៀន បង្ហាញការមិនពេញចិត្តចំពោះជំនួបទ្វេភាគីជាមួយតំណាងភាគី គ.ជ.ប ក្រោយស្ថាប័នមួយនេះនៅរក្សាជំហរលុបបញ្ជីឈ្មោះបេក្ខភាពឈរជាមេឃុំចៅសង្កាត់របស់គណបក្សក្រៅរដ្ឋាភិបាលនេះមួយចំនួន ខណៈគណបក្សនេះនៅតែអះអាងថា ការលុបបញ្ជីឈ្មោះនោះមិនមានកំណត់នៅក្នុងច្បាប់សស្ដីពីការបោះឆ្នោតជ្រើសរើសក្រុមប្រឹក្សាឃុំសង្កាត់។
អនុប្រធានគណបក្សភ្លើងទៀន លោក សុន ឆ័យ បញ្ជាក់ថា លោកហាក់មិនមានការពេញចិត្តទេ ក្នុងជំនួបទ្វេភាគីដែលប្រព្រឹត្តទៅនៅទីស្ដីការ គ.ជ.ប នៅព្រឹកថ្ងៃទី១១ ខែមេសានេះ ព្រោះចម្លើយដែលស្ថាប័នជាតិរៀបចំការបោះឆ្នោតផ្ដល់ឱ្យមកវិញនេះ នៅតែមិនអាចរកច្រកចេញបាន ចំពោះបញ្ជីឈ្មោះបេក្ខភាពមេឃុំចៅសង្កាត់ដែលត្រូវបានលុបចេញហើយនោះ។
លោកបន្តថា៖ «បើនិយាយថាពេញចិត្តអត់ ពេញចិត្តអត់កើតទេ ពីព្រោះការសម្រេចចិត្តលុបបញ្ជីគណបក្សភ្លើងទៀនហ្នឹង គឺធ្វើទៅដោយមិនយុត្តិធម៌ ហើយសូម្បីកុំថាឡើយគណបក្សភ្លើងទៀនថាមិនយុត្តិធម៌ សូម្បីប្រជារាស្រ្តក៏លោកថាមិនយុត្តិធម៌ដែរ។ យើងមិនអាចឱ្យគណបក្សដែលប្រជែងគ្នានៅក្នុងសង្កាត់ដែលឈរឈ្មោះពីសមាជិកគណបក្សកាន់អំណាច ប្ដឹងរំលាយបញ្ជីទាំងមូលរបស់គណបក្សភ្លើងទៀន ហើយទុកខ្លួនឯងតែម្នាក់ឯងបែបនេះទេ»។
បើតាមអ្នកនយោបាយចាស់វស្សារូបនេះ បានប្រាប់នៅចំពោះមុខតំណាង គ.ជ.ប ថា ដូចករណីរំលាយបញ្ជីឈ្មោះទាំងមូលនៅសង្កាត់ទួលស្វាយព្រៃទី១ ជាជម្រើសល្អ ដើម្បីកុំឱ្យស្ថាប័ន គ.ជ.ប ចំណាយលុយលើក្រដាសសន្លឹកឆ្នោតឥតប្រយោជន៍ សង្កាត់មួយនេះគួរតែប្រកាសពីជ័យជម្នះរបស់គណបក្សប្រជាជនកម្ពុជាតែម្តងទៅ ល្អជាង។
បើតាមលោក សុន ឆ័យ បើទោះជាតំណាង គ.ជ.ប លោក ទេព នីថា លើកពីមាត្រាច្បាប់មួយចំនួន មកការពារចំពោះការរំលាយបញ្ជីឈ្មោះទាំងមូលនៅតាមឃុំសង្កាត់ខ្លះក្តី ប៉ុន្តែលោកអះអាងថា តំណាង គ.ជ.ប មើលទៅហាក់មានភាពស្ទាក់ស្ទើរក្នុងការពន្យល់ពីហេតុផលផ្លូវច្បាប់ ចំពោះការសម្រេចចិត្តនៃការរំលាយនេះ។
បើទោះជាបែបណា សេចក្តីប្រកាសព័ត៌មានដែលចេញដោយស្ថាប័នជាតិរៀបចំការបោះឆ្នោត(គ.ជ.ប) នៅថ្ងៃទី១១ ខែមេសានេះដែរ បង្ហាញថា បញ្ជីបេក្ខជនគណបក្សនយោបាយដែលឈរឈ្មោះបោះឆ្នោត និងបញ្ជីបេក្ខជនដំបូងនៃគណបក្សនយោបាយ ត្រូវបានដោះស្រាយចប់សព្វគ្រប់អស់ហើយ។ មិនតែប៉ុណ្ណោះ ដំណោះស្រាយដែលបានបិទបញ្ចប់ហើយនេះ នឹងមិនមានអ្វីកែប្រែទៀតឡើយ ព្រោះការបញ្ចប់វិវាទផ្នែកនយោបាយនេះ គឺ គ.ជ.ប ផ្អែកលើមូលដ្ឋានច្បាប់។
បន្ថែមលើសេចក្តីប្រកាសព័ត៌មាននេះ អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា ឯកភាពថា ថ្វីត្បិតជំនួបទ្វេភាគីនេះ លទ្ធផលមិនដូចការរំពឹងទុក ប៉ុន្តែយ៉ាងណានេះអាចនិយាយបានថា កិច្ចពិគ្រោះយោបល់នេះ ភាគីទាំងពីរយល់គ្នាបានច្រើន ហើយតទៅទៀត អាចនឹងឈានទៅបញ្ចប់ការនិយាយដើមគ្នាពីក្រោយខ្នងបានថែមទៀតផង។
សម្រាប់លោក ហង្ស ពុទ្ធា មានសុទិដ្ឋិនិយមថា បើទោះជាការបោះឆ្នោតពេលនេះមានបញ្ហាខ្លះ ដែលមិនចុះសម្រុងនឹងគ្នា តែសម្រាប់ដំណើរការបោះឆ្នោតនៅអាណត្តិបន្ទាប់ឆ្នាំ២០២៣ គ.ជ.ប នឹងកែលម្អឱ្យល្អប្រសើរ។
ក្នុងន័យនេះ លោកថា បញ្ហាដែលនៅសេសសល់ពីភាគីពាក់ព័ន្ធ រួមទាំងគណបក្សនយោបាយផង នឹងដាក់ស្នើមក គ.ជ.ប ហើយកង្វល់នេះនឹងត្រូវអនុម័តតាមរយៈសេចក្តីសម្រេចចិត្តដោយសមូហភាព។
លោកបន្តថា៖ «ជាដំណើរការល្អ ត្រង់ដែលថាគូភាគីមានការជួបគ្នា ចៀសវាងការ[មិនយល់]អំពីគ្នាទៅវិញទៅ ហើយរាល់បញ្ហានឹងត្រូវបានដោះស្រាយ នៅពេលដែលរៀបចំនីតិវិធីថ្មី ឧទាហរណ៍ថាការការបោះឆ្នោតនៅឆ្នាំ២០២៣ នោះនីតិវិធីនឹងមានការចែក ហើយនិងដាក់ឱ្យភាគីពាក់ព័ន្ធ និងគណបក្សនយោបាយលោកចូលរួមជាមតិយោបល់។ ហើយពេលនោះ តំណាងគណបក្សនយោបាយ លោកអាចស្នើសុំយ៉ាងណា គឺស្ថិតនៅលើមតិភាគច្រើន ថាតើនីតិវិធីគួរចែងរបៀបណាដើម្បីឱ្យដំណើរការបោះឆ្នោត ប្រព្រឹត្តទៅបានល្អប្រសើរ»។
អនុប្រធានគណបក្សភ្លើងទៀន លោក សុន ឆ័យ ក៏ឯកភាពដែរថា នៅក្នុងជំនួបទ្វេភាគី នៅព្រឹកថ្ងៃចន្ទនេះ អគ្គលេខាធិការ គ.ជ.ប លោក ទេព នីថា ក៏សន្យាថានឹងធ្វើវិសោធនកម្មឡើងវិញ នូវមាត្រាច្បាប់មួយចំនួន ជាពិសេសច្បាប់ស្ដីពីការបោះឆ្នោតជ្រើសរើសក្រុមប្រឹក្សាឃុំសង្កាត់ កុំឱ្យមានភាពស្រពេចស្រពិលដូចសព្វថ្ងៃនេះ។
ទាំងគណបក្សនយោបាយ និងអ្នកឃ្លាំមើលពីបញ្ហាសង្គម យល់ឃើញថា ការប្តឹងផ្តល់គ្នារឿងបញ្ជីបេក្ខជនបោះឆ្នោតជ្រើសរើសក្រុមប្រឹក្សាឃុំសង្កាត់នេះ ទើបតែកើតមានឡើងជាលើកដំបូង ក្រោយពីកម្ពុជាធ្លាប់ឆ្លងកាត់ការបោះឆ្នោតឃុំសង្កាត់នេះតាំងពីឆ្នាំ២០០២មក។
ចំណែក នាយកប្រតិបត្តិអង្គការនិកហ្វិច លោក សំ គន្ធាមី យល់ថា ការសន្យាទុកមុននេះ មិនមែនទើបតែមាននៅអាណត្តិនេះទេ។ ប្រភពដដែលបន្តថា ដើម្បីឱ្យការបោះឆ្នោតមួយប្រព្រឹត្តទៅដោយសេរី ត្រឹមត្រូវ និងតម្លាភាព មានតែការអនុវត្តច្បាប់ជាមូលដ្ឋានទេ ទើបបញ្ចប់ការខ្វែងគំនិតគ្នាបាន។
លោកបន្តថា៖ «ការសន្យា យើងមិនអាចទុកចិត្តបាន។ យើងធម្មតាកាលណាស្ថាប័នរៀបចំការបោះឆ្នោតយើងធ្វើអីឱ្យមានភាពសុក្រឹត្យ ហើយមិនមែននិយាយតែមាត់ហើយអត់ធ្វើ។ វាបាត់បង់ជំនឿពីគណបក្សនយោបាយ សង្គមស៊ីវិល និងភាគីពាក់ព័ន្ធ ខ្ញុំចង់និយាយអ៊ីចឹងណាបាទ»។
អ្នកនាំពាក្យគណបក្សភ្លើងទៀន លោក ថាច់ សេដ្ឋា ឱ្យដឹងថា បញ្ជីបេក្ខជនដែលឈរជាមេឃុំចៅសង្កាត់ គណបក្សភ្លើងទៀន ត្រូវបាន គ.ជ.ប លុបចេញទាំងមូលពីបញ្ជីបោះឆ្នោតអស់ចំនួន២៩ឃុំសង្កាត់ នៅទូទាំងប្រទេស។
លោកថា បច្ចុប្បន្ន គណបក្សក្រៅរដ្ឋាភិបាលមួយនេះនៅសល់បេក្ខជនមេឃុំចៅសង្កាត់ចំនួន១ ៦២៣ ឃុំសង្កាត់ទៀត ក្នុងចំណោមឃុំសង្កាត់សរុប១ ៦៥២ឃុំសង្កាត់ ក្នុងក្របខណ្ឌទូទាំងប្រទេស។ ការបោះឆ្នោតឃុំសង្កាត់អាណត្តិទី៥នេះ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២៕