មន្ត្រីជាន់ខ្ពស់នៃព្រឹទ្ធសភាសហរដ្ឋអាមេរិកលោក Paul Grove បានសម្តែងនូវកង្វល់អំពីស្ថានភាពសិទ្ធិមនុស្ស និងប្រជាធិបតេយ្យបច្ចុប្បន្ននៅកម្ពុជា។
ក្តីកង្វល់នេះ បានលើកឡើងនៅក្នុងជំនួបជាមួយលោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការរំលាយនៅឯគេហដ្ឋានរបស់លោក កឹម សុខា ស្ថិតនៅក្នុងរាជធានីភ្នំពេញ នៅព្រឹកថ្ងៃសៅរ៍នេះ។
បើតាមលោក កឹម សុខា ភាគីទាំងពីរបានពិភាក្សាគ្នាដោយផ្តោតលើបញ្ហាជាច្រើន ដូចជា បញ្ហាទំនាក់ទំនងរវាងកម្ពុជា និងសហរដ្ឋអាមេរិក កន្លងមក បច្ចុប្បន្ន និងទៅអនាគត ក៏ដូចជាបញ្ហាតំបន់ និងក្នុងពិភពលោកផងដែរ។ ជាពិសេសលោកបានសម្តែងនូវកង្វល់អំពីស្ថានភាពសិទ្ធិមនុស្ស ប្រជាធិបតេយ្យបច្ចុប្បន្ននៅកម្ពុជា និងបានពិភាក្សាអំពីដំណើរការសវនាការករណីនៃការចោទប្រកាន់មកលើរូបលោក ពីបទឃុបឃឹតជាមួយអង្គការ ឬ រដ្ឋបរទេស ដែលក្នុងនោះមានសហរដ្ឋអាមេរិកផងដែរ។
លោក Paul Grove គឺជាមន្ត្រីជំនាញក្នុងគណៈកម្មាធិការត្រួតពិនិត្យ (Appropriation commitee) នៃព្រឹទ្ធសភា ស.រ.អា ដ៏មានឥទ្ធិពល ក្នុងកិច្ចការគ្រប់គ្រងធនធានថវិកាក៏ដូចជាជំនួយរបស់ស.រ.អា កំពុងបំពេញបេសកម្មនៅក្នុងប្រទេសកម្ពុ។ ថ្មីៗនេះ លោកក៏បានជួបជាមួយលោក ហ៊ុន ម៉ាណែត បេក្ខជនអនាគតនាយករដ្ឋមន្ត្រីគណបក្សប្រជាជនកម្ពុជា និងលោក ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនផងដែរ។
លោក កឹម សុខា បានសរសេរនៅលើទំព័រហ្វេសប៊ុករបស់លោកថា ទំនាក់ទំនងការទូត និងកិច្ចសហប្រតិបត្តិការរបស់លោកជាមួយរដ្ឋបរទេស ជាពិសេសជាមួយសហរដ្ឋអាមេរិក តាំងពីឆ្នាំ១៩៩៣ មក គឺដើម្បីឧត្តមប្រយោជន៍រួមរបស់ជាតិ និងប្រជាពលរដ្ឋខ្មែរ លទ្ធិប្រជាធិបតេយ្យ សិទ្ធិមនុស្ស និងការអភិវឌ្ឍន៍ ខណៈដែលប្រទេសទាំងនោះជាមិត្តរបស់កម្ពុជា៕
