ក្រសួងការងារនិងបណ្តុះបណ្តាលវិជ្ជាជីវៈ បានកំណត់កិច្ចប្រជុំដោះស្រាយវិវាទការងារនៅក្រុមហ៊ុនកាស៊ីណូណាហ្គាវើលដ៍ជាថ្មីនៅរសៀលថ្ងៃពុធ ទី៤ ខែឧសភា ខាងមុខនេះ បន្ទាប់ពីកិច្ចប្រជុំលើកទី៨ កាលពីថ្ងៃទី២២ ខែមេសា នៅមិនទាន់ឈានដល់ចំណុចព្រមព្រៀងគ្នានៅឡើយ។
យោងតាមសេចក្តីប្រកាសព័ត៌មានរបស់ក្រសួងការងារនិងបណ្តុះបណ្តាលវិជ្ជាជីវៈកាលពីថ្ងៃទី២២ ខែមេសា បានឱ្យដឹងថា កិច្ចប្រជុំដោះស្រាយវិវាទរួមនៅក្រុមហ៊ុនកាស៊ីណូណាហ្គាវើលដ៍កាលពីថ្ងៃទី២២ ខែមេសា នៅមិនទាន់ទទួលបានលទ្ធផលនោះទេ ដោយសារភាគីក្រុមហ៊ុននៅតែរក្សាជំហរដដែល ដោយមិនទទួលយកបុគ្គលិកជិត ២០០នាក់ ដែលក្រុមហ៊ុនបានបញ្ឈប់នោះ ឱ្យចូលធ្វើការងារវិញនោះឡើយ។
កិច្ចប្រជុំដោះស្រាយវិវាទនៅក្រុមហ៊ុនកាស៊ីណូណាហ្គាវើលដ៍កាលពីថ្ងៃទី២២ ខែមេសា ម្សិលមិញនេះ គឺជាកិច្ចប្រជុំលើកទី៨ ដោយមានការចូលរួមពីលោក ទេស រុក្ខាផល អគ្គលេខាធិការ នៃអគ្គលេខាធិការដ្ឋាន គ.ក.ប និងដោយមានការចូលរួមពីតំណាងភាគីកម្មករនិយោជិត រួមមាន លោកស្រី ឈឹម សុខន លោកស្រី រី សុវណ្ណឌី លោកស្រី សុន ស្រីពេជ្រ និងលោកស្រី ហៃ សុភាព ខណៈកញ្ញា ឈឹម ស៊ីថរ បានអវត្តមាន។ ចំណែកតំណាងភាគីនិយោជក រួមមាន លោក ហាយ វលាភ លោកស្រី ឌី សីហា និងលោកស្រី រស់ ប៊ុនឡេង ខណៈអវត្តមានលោក Hein Dames ដែលមានធុរៈចាំបាច់។
យ៉ាងណាក្តី កិច្ចប្រជុំលើកទី៨នេះ នៅតែមិនអាចបញ្ចប់វិវាទបុគ្គលិកក្រុមហ៊ុនកាស៊ីណូណាហ្គាវើលដ៍បានឡើយ ដោយសារភាគីបុគ្គលិកដែលត្រូវបញ្ឈប់ពីការងារបានស្នើឱ្យក្រុមហ៊ុនទទួលយកបុគ្គលិកជិត ២០០នាក់ឱ្យចូលធ្វើការងារឡើងវិញ ដោយភាគីក្រុមហ៊ុនមានជម្រើសដោះដូជាមួយបុគ្គលិកជិត ៣០០នាក់ដែលស្ម័គ្រចិត្តលាឈប់។ ប៉ុន្តែតំណាងភាគីក្រុមហ៊ុននៅតែអះអាងថា មិនទទួលយកម្មករនិយោជិតចំនួន ២០០ នាក់នោះចូលធ្វើការងារវិញឡើយ។
ភាគីតំណាងក្រុមហ៊ុនបានះអាងថា ទោះបីជាមានបុគ្គលិកជិត ៥០០នាក់ដែលបន្តអវត្តមានពីកន្លែងការងារដើម្បីចូលរួមធ្វើកូដកម្មកន្លងមកនេះក្តី ក៏មិនប៉ះពាល់ដល់ដំណើរការអាជីវកម្មរបស់ក្រុមហ៊ុនដែរ ខណៈបុគ្គលិកដែលកំពុងបំពេញការងារសព្វថ្ងៃ នៅមិនទាន់មានការងារធ្វើពេញលេញនៅឡើយដែរ។
យ៉ាងណាក្តី ក្រសួងការងារបានកំណត់ឱ្យភាគីទាំងពីរជួបប្រជុំគ្នាជាថ្មីនៅរសៀលថ្ងៃពុធ ទី៤ ខែឧសភា ខាងមុខនេះ ដើម្បីទុកឱកាសឱ្យភាគីទាំងពីរពិចារណាឡើងវិញ អំពីលទ្ធភាពនៃការសម្បទានគ្នាទៅវិញទៅមកដែលអាចឈានទៅបញ្ចប់វិវាទនេះបាន។
គួរជម្រាបជូនថា នៅក្នុងកិច្ចប្រជុំដោះស្រាយវិវាទការងារនេះ ភាគីបុគ្គលិកក្រុមហ៊ុនណាហ្គាវើលដ៍ក៏បានស្នើតាមរយៈក្រសួងការងារ ឱ្យតុលាការទម្លាក់ចោលការចោទប្រកាន់មកលើតំណាងកម្មករនិយោជិតទាំងអស់, ស្នើសុំបើកការិយាល័យសហជីពឡើងវិញ និងស្នើសុំយកទូរស័ព្ទ កុំព្យូទ័រ និងសម្ភារផ្សេងៗទៀតមកប្រើប្រាស់ ដើម្បីធ្វើការទំនាក់ទំនងការងារឡើងវិញ។ បន្ថែមពីនេះ ស្នើសុំឱ្យក្រុមហ៊ុនផ្តល់ជម្រើសឱ្យមកខាងភាគីកម្មករនិយោជិត ដើម្បីឱ្យមានភាពយុត្តិធម៌ស្មើៗគ្នា។
វិវាទការងារនៅក្នុងក្រុមហ៊ុនកាស៊ីណូណាហ្គាវើលដ៍បានកើតឡើងអស់រយៈពេលជាងមួយឆ្នាំមកហើយ បន្ទាប់ពីភាគីក្រុមហ៊ុនបានបញ្ឈប់បុគ្គលិកចំនួន១ ៣២៩ នាក់ ក្នុងចំណោមបុគ្គលិកសរុបជាង ៨ ០០០នាក់ ដោយលើកហេតុផលថា ក្រុមហ៊ុនជួបវិបត្តិហិរញ្ញវត្ថុដោយសារតែវិបត្តិជំងឺកូវីដ-១៩។ ក៏ប៉ុន្តែតំណាងសហជីពប្រចាំនៅក្នុងកាស៊ីណូយល់ថា ផែនការបញ្ឈប់បុគ្គលិកទ្រង់ទ្រាយធំនេះ គឺជាការគាស់រំលើងសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនកាស៊ីណូណាហ្គាវើលដ៍ ចេញពីក្រុមហ៊ុននេះ ព្រោះបុគ្គលិកដែលបញ្ឈប់ភាគច្រើន គឺជាសមាជិក និងថ្នាក់ដឹកនាំសហជីព។
វិវាទនេះនៅតែគ្មានដំណោះស្រាយមកទល់នឹងបច្ចុប្បន្ននេះ ខណៈថ្នាក់ដឹកនាំសហជីពចំនួន ៨ នាក់ ត្រូវបានចោទប្រកាន់ពីបទពីបទ “ញុះញង់ឲ្យប្រព្រឹត្តបទឧក្រិដ្ឋជាអាទិ៍” តាមមាត្រា៤៩៤ និង៤៩៥ នៃក្រមព្រហ្មទណ្ឌកម្ពុជាក្តី៕
