ប្រធានក្រុមការងារគណបក្សភ្លើងទៀនប្រចាំខេត្តប៉ៃលិន លោក ខឹម មុនីកុសល បញ្ជាក់ជំហរថា ខ្លួននឹងនៅបន្តប្ដឹងអ្នកព្យាយាមធ្វើឃាតលោក តាមរយៈការប្រើប្រាស់ទោចក្រយានយន្ត ឬម៉ូតូ ជាមធ្យោបាយក្នុងការបង្កហេតុជាគ្រោះថ្នាក់ចរាចរណ៍ ខណៈអធិការនគរបាលក្រុងកោះហៅរូបលោកទៅដោះស្រាយដើម្បីរំលត់បណ្ដឹងនេះ។
លោក ខឹម មុនីកុសល បានប្រាប់វីអូឌីថា សមត្ថកិច្ចជំនាញនៃអធិការនគរបាលក្រុងប៉ៃលិន បានកោះហៅរូបលោកនៅព្រឹកថ្ងៃព្រហស្បតិ៍នេះ ដើម្បីឱ្យបញ្ចប់វិវាទ ប៉ុន្តែលោកប្ដេជ្ញាថានឹងបន្តសំណុំរឿងនេះទៅមុខទៀត ដោយមិនបញ្ចប់ ត្រឹមសម្អាងហេតុថា នៅថ្ងៃកើតហេតុ ជនបង្កមានជាតិអាល់កុលក្នុងខ្លួន ហើយបាត់បង់ម្ចាស់ការក្នុងការបើកបរម៉ូតូ ទើបនាំឱ្យហេតុការណ៍គ្រោះថ្នាក់នេះកើតឡើងទេ។
លោកបន្តថា៖ «ប៉ូលិសគេបានសួរខ្ញុំ ថាតើយើងអាចបញ្ចប់និងសម្របសម្រួលគ្នាត្រឹមហ្នឹងបានអត់? ប៉ុន្តែខ្ញុំបានឆ្លើយតបទៅវិញថា មិនមែនខ្ញុំថាមិនចង់បញ្ចប់ទេ តែថាករណីនេះ វាមិនមែនងាយដូចការនិយាយអ៊ីចឹងទេ។ ហេតុការណ៍ដែលវាកើតឡើង វាមិនមែនជារឿងចៃដន្យ ពីព្រោះទង្វើដែលធ្វើហ្នឹង វាមិនសមតែម្ដង វាមិនមែនបុកយើងតែម្ដងហើយចប់ហើយ គឺវាច្រើនដង»។
នៅលើបណ្ដាញសង្គមហ្វេសប៊ុក លោក ខឹម មុនីកុសល បានបង្ហោះសារកាលពីថ្ងៃទី១៣ ខែមេសា ថានគរបាលប៉ុស្តិ៍សង្កាត់អូរតាវ៉ៅ ក្រុងប៉ៃលិន ព្យាយាមផ្សះផ្សា និងសម្របសម្រួល ដើម្បីឈានទៅបញ្ចប់សំណុំរឿងជាមួយគូទំនាស់ឈ្មោះ ទ្រី ធា ក្រោយពីលោកបានដាក់ពាក្យបណ្ដឹងនៅទីនោះ។
ទាក់ទងរឿងក្ដីនេះ លោក ខឹម មុនីកុសល ឱ្យដឹងថា អង្គហេតុនេះកើតឡើងកាលពីថ្ងៃទី១១ ខែមេសា ឆ្នាំ២០២២ ដោយជនបង្កឈ្មោះ ទ្រី ធា អាយុ៣៩ឆ្នាំ បានព្យាយាមបើកបរម៉ូតូជិះកៀរ និងបំបុករូបលោកតាមដងផ្លូវម្ដងហើយម្ដងទៀតក្នុងថ្ងៃតែមួយ តែមិនបានសម្រេច។
នៅក្នុងអង្គហេតុតែមួយនេះដែរ លោក ខឹម មុនីកុសល ក៏បានដាក់ពាក្យប្ដឹងឈ្មោះ ទ្រី ធា ទៅអយ្យការអមសាលាដំបូងខេត្តប៉ៃលិន ដោយចោទប្រកាន់ពីបទ «ប៉ុនប៉ងមនុស្សឃាតដោយចេតនា»។
តាមរយៈការសម្របសម្រួលនៅព្រឹកថ្ងៃទី២៨ ខែមេសានេះ អធិការនគរបាលក្រុងប៉ៃលិនលើកឡើងថា ឈ្មោះ ទ្រី ធា ដែលរងការចោទប្រកាន់នេះ មានជាតិស្រវឹងក្នុងខ្លួន ហើយមិនមានចេតនាណាមួយដែលឈានទៅដល់ការប៉ុនប៉ងមនុស្សឃាតទេ។
បើតាមលោក ខឹម មុនីកុសល នគរបាលក្រុងបានស្នើឱ្យរូបលោកបញ្ចប់សំណុំរឿងនេះ ប៉ុន្តែលោកបានច្រានចោល ដោយលោកអះអាងថា នឹងបន្តរឿងក្ដីនេះទៅមុខទៀត ដោយសារជនបង្កមានគម្រោងផែនការច្បាស់លាស់ និងមានចេតនាប៉ុនប៉ងមនុស្សឃាតគិតទុកជាមុន។ លោកថា រឿងនេះអាចមានជនសមគំនិត ឬអ្នកនៅពីក្រោយថែមទៀត។
វីអូឌី មិនអាចសុំការបញ្ជាក់ពីលោកវរសេនីយ៍ត្រី សួន ពិសិដ្ឋ នាយផ្នែកព្រហ្មទណ្ឌ នៃអធិការនគរបាលក្រុងប៉ៃលិន បានទេ នៅថ្ងៃព្រហស្បតិ៍នេះ។
បើទោះជាបែបណា នាយប៉ុស្តិ៍នគរបាលរដ្ឋបាលសង្កាត់អូរតាវ៉ៅ លោក ជា សូត្រា អះអាងថា បញ្ហានេះមិនមែនជារឿងឃាតកម្មដូចការចោទប្រកាន់របស់ដើមបណ្ដឹងទេ។ លោកបន្តថា ជនសង្ស័យក្នុងសំណុំរឿងនេះគ្រាន់តែជាជនពិការភ្នែក ហើយតែងមានបញ្ហាបែបនេះជារឿយៗមកហើយដែរ។
លោកបន្តថា៖ «គាត់អត់ព្រមសម្របសម្រួល គាត់ប្រកាន់។ [ជនបង្ក]គាត់ស្រវឹងមែន គាត់ងងឹងភ្នែកហ្នឹង! ភ្នែកគាត់ពីរ តែគាត់មើលឃើញតែម្ខាងទេ។ គាត់ដូចជាពិការតាំងពីកំណើតមកម៉្លេះ។ គាត់តែងតែអ៊ីចឹងឯង គាត់តែងតែបែបហ្នឹងឯង។ តែបង កុសល គាត់អត់ព្រម គាត់ប្រកាន់»។
ចំណែក អ្នកសម្របសម្រួលផ្នែកឃ្លាំមើលសិទ្ធិមនុស្សនៃអង្គការលីកាដូប្រចាំខេត្តបាត់ដំបង លោក អ៊ិន គង់ជិត យល់ឃើញថា បើពិនិត្យទៅលើអង្គហេតុ ករណីនេះអាចជាចេតនាប៉ុនប៉ងក្នុងហេតុផលអ្វីមួយមែន។ លោកថា ករណីនេះពុំមែនជារឿងចៃដន្យដោយសារជាតិស្រវឹងក្នុងខ្លួន ឬដោយបញ្ហាដទៃទៀតទេ។
លោកបន្តថា៖ «សមត្ថកិច្ចនគរបាលធ្វើការយឺតយ៉ាវ។ ករណីហ្នឹង បើគាត់ [លោក ខឹម មុនីកុសល] ជាអ្នកបង្កវិញ គឺគេចាប់ខ្លួនគាត់បាត់ហើយ។ ហើយបើគាត់បង្កទៅលើគេ គឺសមត្ថកិច្ចប្រាកដជាចាប់ខ្លួនគាត់ ហើយកសាងសំណុំរឿងបញ្ជូនទៅតុលាការបាត់ហើយ។ គេបង្កមកលើគាត់វិញ គឺសមត្ថកិច្ចអត់បានចាប់ខ្លួនជនប្រព្រឹត្តហ្នឹងទេ បើទោះជាគាត់ប្ដឹងចោទបទល្មើសជាក់ស្ដែងក៏ដោយ»។
លោក ខឹម មុនីកុសល ជាអតីតគ្រូពេទ្យក្រុងប៉ៃលិន ហើយបច្ចុប្បន្ន លោកជាប្រធានក្រុមការងារគណបក្សភ្លើងទៀនខេត្តប៉ៃលិន ត្រូវបានតុលាការខេត្តនេះកោះហៅឱ្យចូលខ្លួនទៅឆ្លើយបំភ្លឺ ក្នុងសំណុំរឿង២ផ្សេងទៀត។ បទចោទទី១ តុលាការតម្រូវឱ្យលោកចូលឆ្លើយបំភ្លឺនៅថ្ងៃទី៨ ខែមេសា ក្រោយរងការចោទពីបទ «បរិហារកេរ្តិ៍ជាសាធារណៈ» និងបទចោទ១ករណីទៀត ត្រូវចូលខ្លួននៅថ្ងៃទី២០ ខែមេសា ពីបទ «ញុះញង់ឱ្យមានការរើសអើង»។
លោក អ៊ិន គង់ជិត មន្រ្តីអង្គការលីកាដូដែលឃ្លាំមើលពីសំណុំរឿងនេះ មានប្រសាសន៍ថា បទចោទទាំង២ទៅលើលោក ខឹម មុនីកុសល បានសម្របសម្រួលចប់សព្វគ្រប់ហើយ ហើយភាគីក្នុងរឿងក្ដីនេះក៏យល់ព្រមលុបសាររបស់ខ្លួនដែលបានបង្ហោះនៅលើហ្វេសប៊ុករួចហើយដែរ។ ប៉ុន្តែដោយសារលោក ខឹម មុនីកុសល ហក់ចូលក្នុងឆាកនយោបាយ ទើបធ្វើឱ្យលោកត្រូវរងការចោទប្រកាន់ជាបន្តបន្ទាប់នៅនាទីចុងក្រោយនេះ។
ចំពោះលោក ខឹម មុនីកុសល បានហៅការចោទប្រកាន់រូបលោកតាមផ្លូវតុលាការនៅពេលនេះថាជារឿងនយោបាយ ហើយការប្រើប្រាស់តុលាការនេះ គឺដើម្បីបិទផ្លូវលោកមិនឱ្យចូលរួមក្នុងសកម្មភាពនយោបាយប៉ុណ្ណោះ៕