អនុប្រធានគណបក្សភ្លើងទៀនប្រចាំខេត្តប៉ៃលិន បញ្ជាក់ថា ការប្ដឹងប្រឆាំងអំពីសារនយោបាយក្នុងពេលឃោសនារកសំឡេងឆ្នោតពីសំណាក់គណបក្សប្រជាជនកម្ពុជា គឺជាផ្នែកមួយមានចេតនារើសអើង និងជារូបភាពធ្វើទុក្ខបុកម្នេញខាងនយោបាយ បើទោះជាសារនយោបាយរបស់ខ្លួនបានអនុលោមតាមគោលការណ៍និងនីតិវិធីដែលមានកំណត់ដោយច្បាប់ស្ដីពីការបោះឆ្នោតយ៉ាងណាក្ដី។
លោក ថោង ធន ដែលជាអនុប្រធានគណបក្សភ្លើងទៀន ខេត្តប៉ៃលិន ប្រាប់ វីអូឌី នៅថ្ងៃអង្គារនេះថា សារនយោបាយដែលបេក្ខជនយកទៅឃោសនានៅអំឡុងពេលយុទ្ធនាការបោះឆ្នោតនេះ គឺមិនមានចំណុចណាមួយដែលប្រាសចាកពីគោលការណ៍ទេ។ លោកបន្តថា ការប្រើសារនយោបាយដែលលើកឡើង «ដូរមេឃុំបម្រើបក្ស ដាក់មេឃុំបម្រើរាស្រ្ត» នេះគឺជាផែនការដែលដាក់ចេញពីគណបក្សថ្នាក់ជាតិ ហើយគោលការណ៍នេះ ក៏បានឆ្លងកាត់ការពិនិត្យនិងអនុម័តរួចហើយដែរ មុននឹងយកមកប្រើប្រាស់នេះ។
លោកបន្តថា៖ «មែនទែន! ជាការសន្និដ្ឋានរបស់ខ្ញុំ នេះជាការទប់ស្កាត់និងរំខាន ខ្ញុំចោទអ៊ីចឹងចុះ រំខាន! យើងអត់បានញុះញង់អីផង! បើក្នុងខ្លឹមសារថ្នាក់ជាតិឱ្យមក សុទ្ធតែដកឃុំបម្រើបក្ស ដាក់មេឃុំបម្រើរាស្រ្ត។ អ៊ីចឹងទាំងអស់នេះ វាសុទ្ធតែក្ដៅហើយ តែយើង ប៉ុន្តែយើងអត់បានសំដៅលើក្រុមណាមួយណា ហើយបែរពួកគាត់ទៅរើសដាក់ខ្លួន ហើយនាំគ្នាទៅទទួលយក។ អាហ្នឹងខ្ញុំគិតទេណា»។
បើតាមលោក ថោង ធន សារនយោបាយដែលត្រូវបានយកទៅប្រើប្រាស់ក្នុងពេលឃោសនានេះ គឺគណបក្សភ្លើងទៀនមិនបានដៀមដាមឱ្យបក្សនយោបាយណាមួយទេ គឺជាសារនយោបាយត្រូវបានប្រើប្រាស់ជាលក្ខខណៈទូទៅ។
នៅក្នុងបណ្ដឹងបញ្ជូនមកជំនុំជម្រះដោយគណៈកម្មការរៀបចំការបោះឆ្នោតឃុំ-សង្កាត់ ខេត្តប៉ៃលិន បង្ហាញថា បេក្ខជនចំនួន៤រូបរបស់គណបក្សភ្លើងទៀន ត្រូវបានតំណាងគណបក្សប្រជាជនកម្ពុជាប្រចាំខេត្តនេះចោទប្រកាន់។
តាមរយៈបណ្ដឹងទាំង៤នោះ ដែលដាក់កាលបរិច្ឆេទខុសៗគ្នា បានចោទប្រកាន់បេក្ខភាពមេឃុំចៅសង្កាត់ទាំង៤រូបរបស់គណបក្សភ្លើងទៀន ពីបទ «ញុះញង់ និងរើសអើង» ហើយបទចោទទាំងនេះ តំណាងគណបក្សភ្លើងទៀនចាត់ទុកថា ជាការអនុវត្តផ្ទុយពីស្មារតីក្នុងមាត្រា៧១ នៃច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ-សង្កាត់។
វីអូឌី មិនទាន់អាចទាក់ទងតំណាងម្ចាស់ដើមបណ្ដឹងមកពីគណបក្សប្រជាជនកម្ពុជាបាននៅឡើយទេ នៅថ្ងៃអង្គារនេះ។
យ៉ាងនេះក្ដី អ្នកសម្របសម្របផ្នែកអង្កេត និងតស៊ូមតិ នៃអង្គការខុមហ្វ្រែល (Comfrel) លោក កន សាវាង្ស មានប្រសាសន៍ថា នេះជារូបភាពថ្មីទៀតហើយសម្រាប់បរិបទនយោបាយនៅកម្ពុជា។ លោកបន្តថា កន្លងទៅ មិនធ្លាប់មានទេ ការប្តឹងផ្តល់គ្នាតាមរយៈសារឃោសនានយោបាយ អំឡុងពេលគណបក្សនយោបាយបើកយុទ្ធនាការស្វែងរកការគាំទ្រនៅមុនការបោះឆ្នោតមកដល់។
ប្រភពដដែលបន្តថា បើពិនិត្យទៅលើនីតិវិធីដូចដែលបានបញ្ញត្តិស្ដីពី «ការបោះឆ្នោតជ្រើសរើសក្រុមប្រឹក្សាឃុំ-សង្កាត់» ការប្រើសារនយោបាយក្នុងន័យទូលាយបែបនេះ វាមិនទាស់ខុសអ្វីនោះទេ។
លោកបន្តថា៖ «បើខ្ញុំពិនិត្យមើល ដូចរកមិនឃើញចំណុចណាមួយដែលបង្ហាញថា គ្រាន់តែប្រើពាក្យថា “ផ្លាស់ប្ដូរ” វាជារឿងខុសច្បាប់ទេ បាទ! វាអត់មានឃើញនៅក្នុងនីតិវិធីណាដែលហាមប្រើពាក្យហ្នឹង។ ហើយបើមាននីតិវិធីដែលគេហាម ឧទាហរណ៍ថា កុំប្រើប្រាស់ភាសាហ្នឹង ទើបវាខុសច្បាប់។ អ៊ីចឹងច្បាប់អត់មានចែង ដូច្នេះបើច្បាប់អត់មានចែង និងអត់មានការហាមឃាត់ អ៊ីចឹងការនិយាយនិងការលើកឡើងហ្នឹង វាអត់មានការខុសឆ្គងទេ»។
អនុប្រធានគណបក្សភ្លើងទៀនប្រចាំខេត្តប៉ៃលិន លោក ថោង ធន បញ្ជាក់ថា ក្នុងចំណោមឃុំសង្កាត់ទាំង៤ គឺមានតែ១ឃុំទេ ដែលតំណាងគណបក្សប្រជាជនកម្ពុជាយល់ព្រមផ្សះផ្សា និងបញ្ចប់ទំនាស់ផ្នែកនយោបាយនេះ គឺឃុំអូរអណ្ដូង។ ដោយឡែក ឃុំស្ទឹងត្រង់ និងសង្កាត់អូរតាវ៉ៅ ភាគីទំនាស់បានចូលខ្លួនដោះស្រាយហើយ តែតំណាងភាគីគណបក្សប្រជាជនកម្ពុជាមិនយល់ព្រមរំលត់បណ្ដឹង ខណៈនៅសង្កាត់ប៉ៃលិន សំណុំរឿងនេះកំពុងស្ថិតនៅក្នុងនីតិវិធីនៅឡើយ។
គិតត្រឹមថ្ងៃអង្គារនេះ បេក្ខភាពគណបក្សភ្លើងទៀន រួមមាន លោក ចាន់ សោភ័ណ្ឌ, លោក អ៊ុក សារី, លោក រស់ រដ្ឋា និងលោក មឿង មិជ ដែលរងការចោទប្រកាន់ពីបទ «ញុះញង់ និងរើសអើង» នេះ វីអូឌី មិនទាន់អាចស្នើសុំការបំភ្លឺបានភ្លាមៗនៅឡើយទេ។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត បដិសេធថា បញ្ហានេះ ខាង គ.ជ.ប ថ្នាក់ជាតិ នៅមិនទាន់ទទួលបានព័ត៌មានលម្អិតនៅឡើយទេ។ លោកបន្តថា ស្ថាប័នជាតិរៀបចំការបោះឆ្នោតនឹងសិក្សាបន្ថែមទៀត ជុំវិញទំនាស់ផ្នែកនយោបាយនេះ។
លោកបន្តថា៖ «ខ្ញុំក្ដាប់អត់ទាន់បានពីបញ្ហាហ្នឹងនៅឡើយផង។ ចាំខ្ញុំស្រាវជ្រាវបន្តិចសិនណា»។
អនុប្រធានគណបក្សភ្លើងទៀន លោក ថោង ធន បញ្ជាក់ថា នៅក្នុងខេត្តប៉ៃលិន មានគណបក្សនយោបាយចំនួន៤ ដែលបានចុះឈ្មោះចូលរួមប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំសង្កាត់នៅក្នុងអាណត្តិទី៥នេះ ដូចជា គណបក្សភ្លើងទៀន គណបក្សប្រជាជនកម្ពុជា គណបក្សខ្មែររួបរួមជាតិ និងគណបក្សប្រជាធិបតេយ្យមូលដ្ឋាន៕