គណៈកម្មការរៀបចំការបោះឆ្នោតឃុំ-សង្កាត់ខេត្តកំពង់ចាម បានបញ្ជូនបណ្ដឹងគណបក្សប្រជាជនកម្ពុជាទៅគណៈកម្មការខេត្តរៀបចំការបោះឆ្នោតក្រោយពីគណបក្សកាន់អំណាចមិនទទួលយកការសម្របសម្រួល ដោយទាមទារដកបេក្ខភាពពីបក្សភ្លើងទៀនទាំង១១ឃុំ ក្នុងស្រុកកងមាស ចេញបញ្ជីបោះឆ្នោត។
គណៈកម្មការរៀបចំការបោះឆ្នោតឃុំ-សង្កាត់ នៅថ្ងៃពុធនេះ បានកោះហៅលោក គង់ រ៉ៃយ៉ា ទៅបំភ្លឺនៅចំពោះមុខគណៈកម្មការរៀបចំការបោះឆ្នោតឃុំ-សង្កាត់ នៅរសៀលថ្ងៃពុធនេះ តាមបណ្តឹងរបស់គណបក្សប្រជាជនកម្ពុជា រឿងបង្ហោះវីដេអូចែកថវិកាទៅឱ្យបេក្ខភាពមេឃុំមកពីគណបក្សភ្លើងទៀនកាលពីថ្ងៃទី២១ ខែឧសភានេះ។
លោក គង់ រ៉ៃយ៉ា ប្រាប់វីអូឌីបន្ទាប់ពីចូលបំភ្លឺថា តំណាងគណបក្សប្រជាជនកម្ពុជា អ្នកស្រី ជឹន ដាវី មិនព្រមធ្វើតាមការសម្របសម្រួលរបស់គណៈកម្មការរៀបចំការបោះឆ្នោតឃុំ-សង្កាត់ នោះទេ។
លោកថា ករណីនេះ គណៈកម្មការរៀបចំការបោះឆ្នោតឃុំ-សង្កាត់ សម្រេចបញ្ជូនបណ្ដឹងតំណាងគណបក្សប្រជាជនកម្ពុជា អ្នកស្រី ជឹន ដាវី ដែលប្ដឹងដកបេក្ខភាពគណបក្សភ្លើងទៀនទាំង១១ឃុំ ក្នុងស្រុកកងមាស ទៅកាន់គណៈកម្មការរៀបចំការបោះឆ្នោតថ្នាក់ខេត្តជាអ្នកដោះស្រាយវិញ។
តំណាងគណបក្សប្រជាជនកម្ពុជា អ្នកស្រី ជឹន ដាវី បានដាក់បណ្ដឹងទៅកាន់គណៈកម្មការរៀបចំការបោះឆ្នោតឃុំ-សង្កាត់ ដោយប្ដឹងបេក្ខភាពគណបក្សភ្លើងទៀនទាំង១១ឃុំ ចេញពីបញ្ជីផ្លូវការរបស់ គ.ជ.ប ពាក់ព័ន្ធនឹងការបង្ហោះវីដេអូចែកថវិកាទៅឱ្យបេក្ខភាពជាមេឃុំក្នុងស្រុកកងមាស ទាំង១១ឃុំ ដោយក្នុងមួយឃុំ ចំនួន១០០ដុល្លារ។
បើតាមលោក គង់ រ៉ៃយ៉ា ដែលជាប្រធានក្រុមទ្រទ្រង់ស្រុកកងមាស និងជាប្រធានគណបក្សភ្លើងទៀនឃុំស្ដៅ អះអាងថា ការចែកថវិកាកាលពីថ្ងៃទី២១ ខែឧសភា ទៅបេក្ខភាពគណបក្សភ្លើងទៀន ក្នុងឃុំនីមួយៗ ចំនួន១០០ដុល្លារ មិនមែនជាការទិញទឹកចិត្តអ្នកគាំទ្រនោះទេ ប៉ុន្តែថវិកានេះសម្រាប់ការចំណាយអំឡុងពេលឃោសនាបោះឆ្នោតរបស់គណបក្សតាមឃុំនីមួយៗតែប៉ុណ្ណោះ។
នាយកប្រតិបត្តិនៃអង្គការនិចហ្វិក លោក សំ គន្ធាមី មានប្រសាសន៍ថា ការផ្ដល់ថវិកាដល់បេក្ខភាពជាមេឃុំដែលជាគណបក្សរបស់ខ្លួន មិនខុសនឹងច្បាប់បោះឆ្នោត ហើយករណីនេះក៏មិនមែនជាការទិញទឹកចិត្តនោះដែរ៕