គណៈកម្មការរៀបចំការបោះឆ្នោតខេត្តកំពង់ចាម ផ្អាកការសម្របសម្រួលរវាងតំណាងគណបក្សប្រជាជនកម្ពុជា និងបេក្ខភាពឃុំមកពីគណបក្សភ្លើងទៀនទាំង១១ឃុំ នៃស្រុកកងមាស បន្ទាប់ពីបេក្ខភាពគណបក្សភ្លើងទៀនស្នើសុំផ្អាកការសម្របសម្រួល។
ប្រធានក្រុមទ្រទ្រង់ស្រុកកងមាស និងជាប្រធានគណបក្សភ្លើងទៀនឃុំស្ដៅ លោក គង់ រ៉ៃយ៉ា ប្រាប់វីអូឌីនៅថ្ងៃនេះថា មូលហេតុដែលរូបលោកស្នើឱ្យគណៈកម្មការរៀបចំការបោះឆ្នោតខេត្តកំពង់ចាមផ្អាកនីតិវិធីសិន ដោយសារភាគីខាងតំណាងគណបក្សប្រជាជនកម្ពុជាបានយកមេធាវីទៅចូលរួមស្ដាប់ អំឡុងពេលសម្របសម្រួល។ ចំណែកភាគីខាងលោកវិញ មិនមានមេធាវីឡើយ ករណីនេះ ទើបលោកថាស្នើសុំផ្អាកសិន។
លោកថា៖ «ខាងគណបក្សប្រជាជនកម្ពុជា គាត់មានមេធាវីតំណាងឱ្យគាត់ ចំណែកខាងគណបក្សភ្លើងទៀន យើងមិនមានមេធាវីតំណាងឱ្យទេ ដោយសារយើងយល់ថា នេះជានីតិវិធីផ្សះផ្សាគ្នា មិនមែនជានីតិវិធីចាញ់ឈ្នះក្ដីទេ។ នៅពេលគណបក្សប្រជាជនគាត់ពឹងពាក់មេធាវី តាំងពីគណៈកម្មការរៀបចំការបោះឆ្នោតឃុំ-សង្កាត់រហូតមក យើងយល់ថា ខាងគណបក្សភ្លើងទៀនស្រុកកងមាស គួរតែមានមេធាវីដែរ។ អ៊ីចឹងសម្រេចមិនបន្តនីតិវិធីទៀត»។
យ៉ាងណាក៏ដោយ នៅថ្ងៃដដែលនេះ គណៈកម្មការរៀបចំការបោះឆ្នោតខេត្តកំពង់ចាម បានចេញលិខិតអញ្ជើញបេក្ខភាពជាមេឃុំរបស់គណបក្សភ្លើងទៀនទាំង១១ឃុំ ឱ្យចូលបំភ្លឺនៅថ្ងៃទី២៨ ខែឧសភា ស្អែកទៀត។ បេក្ខភាពជាមេឃុំរបស់គណបក្សភ្លើងទៀនទាំង១១ឃុំ នៃស្រុកកងមាស ក្នុងនោះក៏មានលោក គង់ រៃយ៉ា ដែរ។
ការកោះអញ្ជើញនេះ ធ្វើឡើងបន្ទាប់ពីគណៈកម្មការរៀបចំការបោះឆ្នោតឃុំ-សង្កាត់ខេត្តកំពង់ចាម បានបញ្ជូនបណ្ដឹងគណបក្សប្រជាជនកម្ពុជាទៅគណៈកម្មការខេត្តរៀបចំការបោះឆ្នោត ក្រោយពីគណបក្សកាន់អំណាចមិនទទួលយកការសម្របសម្រួល ដោយទាមទារដកបេក្ខភាពពីបក្សភ្លើងទៀនទាំង១១ឃុំ ក្នុងស្រុកកងមាស ចេញបញ្ជីបោះឆ្នោត។
លោក គង់ រ៉ៃយ៉ា ដែលជាប្រធានក្រុមទ្រទ្រង់ស្រុកកងមាស និងជាប្រធានគណបក្សភ្លើងទៀនឃុំស្ដៅ ត្រូវបានតំណាងគណបក្សប្រជាជនកម្ពុជា អ្នកស្រី ជឹន ដាវី ប្ដឹងពាក់ព័ន្ធនឹងការបង្ហោះវីដេអូចែកថវិកាទៅឱ្យបេក្ខភាពជាមេឃុំក្នុងស្រុកកងមាស ទាំង១១ឃុំ ដោយក្នុងមួយឃុំ ចំនួន១០០ដុល្លារ។
លោក គង់ រ៉ៃយ៉ា អះអាងថា ការចែកថវិកាកាលពីថ្ងៃទី២១ ខែឧសភា ទៅបេក្ខភាពគណបក្សភ្លើងទៀន ក្នុងឃុំនីមួយៗ ចំនួន១០០ដុល្លារ មិនមែនជាការទិញទឹកចិត្តអ្នកគាំទ្រនោះទេ ប៉ុន្តែថវិកានេះសម្រាប់ការចំណាយអំឡុងពេលឃោសនាបោះឆ្នោតរបស់គណបក្សតាមឃុំនីមួយៗតែប៉ុណ្ណោះ។
ដោយឡែក នៅខេត្តសៀមរាបវិញ គណៈកម្មការរៀបចំការបោះឆ្នោតខេត្តសៀមរាប នៅថ្ងៃទី២៦ ខែឧសភា ឆ្នាំ២០២២នេះ បានព្រមានចាត់វិធានការតាមផ្លូវច្បាប់ ចំពោះគណបក្សភ្លើងទៀន នៅខេត្តសៀមរាប។ ការចេញលិខិតព្រមានរបស់គណៈកម្មការរៀបចំការបោះឆ្នោតខេត្តសៀមរាបធ្វើឡើងបន្ទាប់គណបក្សនេះហែក្បួនឃោសនាស្រែកថា «ជយោ! គណបក្សសង្គ្រោះជាតិ» នោះ។
ស្របពេលគណបក្សនយោបាយកំពុងធ្វើយុទ្ធនាការឃោសនានោះ ប្រធានអង្គការសហប្រជាជាតិប្រចាំកម្ពុជា អ្នកស្រី ផូលីន តាម៉េស៊ីស (Pauline Tamesis) កាលពីថ្ងៃទី២៥ ខែឧសភា ឆ្នាំ២០២២ បានជំរុញឱ្យរដ្ឋាភិបាលកម្ពុជា មេដឹកនាំនយោបាយ ព្រមទាំងអ្នកគាំទ្រទាំងអស់ ចូលរួមធានាឱ្យមានដំណើរការបោះឆ្នោតមួយប្រកបដោយបរិយាប័ន្ន ស្មោះត្រង់ និងសន្តិវិធី ក្នុងក្របខណ្ឌនៃគោរពសិទ្ធិមនុស្សឱ្យបានពេញលេញ។
ការជំរុញនេះ ធ្វើឡើងស្របពេលដែលប្រទេសកម្ពុជាកំពុងរៀបចំការបោះឆ្នោតជ្រើសរើសក្រុមប្រឹក្សាឃុំសង្កាត់។ អ្នកស្រីថា បរិការណ៍នេះមានសារៈសំខាន់ណាស់សម្រាប់ឆ្លុះបញ្ចាំងពីការសម្ដែងឆន្ទៈដោយសេរីរបស់ប្រជាពលរដ្ឋកម្ពុជា៕